Read dyu Masaw ka loon o loon kibaru kitabu fɔlɔ 26 Bible Online

Masaw ka loon o loon kibaru kitabu fɔlɔ 26 - dyu bible

Masaw ka loon o loon kibaru kitabu fɔlɔ 26

¹Daa kɔlɔsibagaw ka jɛnkuluw filɛ: ka bɔ Kore ka fadenyabolo la, o ye Azafu kɔmɔgɔ Mesɛlɛmiyawu ye. Kore deen tun lo.

²Mesɛlɛmiyawu deenw filɛ nin ye: Zakariyawu le ye deen fɔlɔ ye, Yediyayɛli ye filanan ye, Zebadiyawu ye sabanan ye, naaninan ye Yatiniyɛli ye,

³duurunan ye Elamu ye, wɔɔrɔnan ye Yoyanan ye, wolonwulanan ye Eliyoyenayi ye.

⁴ Obɛdi Edɔmu deenw filɛ nin ye: Semaya le ye deen fɔlɔ ye, Yozabadi ye filanan ye, sabanan ye Yowa ye, naaninan ye Sakari ye, duurunan ye Netanɛli ye,

⁵wɔɔrɔnan ye Amiyɛli ye, wolonwulanan ye Isakari ye, seeginan ye Pewuletayi ye, bari Ala tun y'a ta ɲa.

⁶A deen Semaya ye deenw sɔrɔ minw kɛra kuntigiw ye u ka soo, bari u tun be se u ka baara la kosɔbɛ.

⁷Semaya deenw filɛ: Ɔtini ni Erefayɛli, ani Obɛdi ni Ɛlizabadi n'u balimaw Eliwu ni Semakiyawu, olu tun be se u ka baara la fana.

⁸Olu bɛɛ tun ye Obɛdi Edɔmu kɔmɔgɔw ye, olu n'u deenw n'u balimaw tun be se u ka baara la. U bɛɛ lajɛnnin tun ye mɔgɔ bi wɔɔrɔ ni fila ye.

⁹Mesɛlɛmiyawu tun ye deenw sɔrɔ, balimaw fana tun b'a fɛ. U tun be se u ka baara la. U bɛɛ lajɛnnin tun ye mɔgɔ tan ni seegi ye.

¹⁰Merari ka fadenyabolo la, Oza ye deen naani sɔrɔ. Simiri te deen fɔlɔ ye, nga ale lo tun kɛra kuntigi ye, bari u facɛ le tun y'o kɛ.

¹¹Ilikiyawu ye deen filanan ye, Tebaliyawu ye sabanan ye, naaninan ye Zakariyawu ye. Oza deenw n'a balimaw lajɛnnin kɛra mɔgɔ tan ni saba ye.

¹²Daa kɔlɔsibagaw ka jɛnkulu nunu kuntigiw n'u ka jɛnkuludenw tun be baara kɛ Masaba ka soo kɔnɔ, i n'a fɔ u balimaw.

¹³K'a ta denmisɛnw ma fɔɔ ka taga se a mɔgɔkɔrɔbabaw ma, u ye kala la ka sɔrɔ ka daa nunu kɔlɔsiko tilan u ni ɲɔgɔn cɛ ka kɛɲɛ n'u ka gwasow ye.

¹⁴Daa min be kɔrɔn fɛ, u ye kala la, o sera Selemiyawu ma. Daa min be kɔgɔdugu ɲafan na, u ye kala la tugu, o ser'a dencɛ Zakariyawu ma, min tun ye ladilikɛbaga hakiliman ye.

¹⁵Worodugu faan fɛ daa sera Obɛdi Edɔmu ma, minanw bilaso daaw ser'a deenw na.

¹⁶Daa min be tileben fɛ ani daa min be wele Salɛkɛti, n'a sinnin be tintinyɔrɔ sira ma, olu sera Supimu ni Oza ma. Jɛnkulu nunu sigicogo filɛ.

¹⁷Kɔrɔn fɛ, Levi kɔmɔgɔw mɔgɔ wɔɔrɔ le tun b'o yɔrɔ la loon o loon, kɔgɔdugu ɲafan na, mɔgɔ naani. Worodugu ɲafan na, mɔgɔ naani fana. Mɔgɔ fila fila le tun be to ka lɔ minanw bilaso daa la.

¹⁸Sodennin min be soo nin gɛrɛn na tileben fɛ, mɔgɔ naani le tun be o sira kan, mɔgɔ fila b'a kɔnɔ.

¹⁹Daa kɔlɔsibagaw ka jɛnkuluw le ye o ye ka bɔ Kore ka fadenyabolo la, ani Merari ta la.

²⁰Levi kɔmɔgɔ dɔ wɛrɛw [1] le tun bilara baara la Ala ka soo nafolo marayɔrɔ n'a ka minanw marayɔrɔ kunna.

²¹Gɛrisɔn ka fadenyabolo la, Layedan kɔmɔgɔw tun ye gwatigiw ye, o gwatigi nunu tun ye Yeyɛli ye,

²²an'a deenw, ni Zetamu n'a balimacɛ Yowɛli, olu tun bilara Masaba ka soo minanw marayɔrɔ kunna.

²³Amuramu ka fadenyabolo la, ni Yiseyari ta, ani Eburɔn ta, ni Uziyɛli ta la,

²⁴mɔgɔ min tun be minanw marayɔrɔ nin kɔlɔsibagaw ɲafɛ, o tun ye Musa deen Gɛrisɔn kɔmɔgɔ Sobuwɛli ye.

²⁵Ale balima minw ye Eliyezɛri kɔmɔgɔw ye, olu tun ye Eliyezɛri deen Ereyabiyawu, ni ale deen Yesayawu, ni o fana deen Zoramu, ni o fana deen Zikiri, ani Zikiri deen Selomiti.

²⁶Fɛɛn minw bɛɛ tun dira Masaba ma, ale Selomiti n'a balimaw le tun bilara olu kɔlɔsiko kunna: masacɛ Dawuda tun ye minw di wo, gwatigiw tun ye minw di wo, kɛlɛden waa kelen kelen kuntigiw ye minw di wo, kɛmɛ kɛmɛ kuntigiw ta wo, ani kɛlɛdenw kuntigi dɔ wɛrɛw ta.

²⁷U tun ye minan minw sɔrɔ u juguw fɛ kɛlɛyɔrɔ la, u tun nana o di Masaba ka soo kama.

²⁸Kira Samuyɛli ye fɛɛn minw bɛɛ di Ala ma, ni Kisi dencɛ Sayuli ta, ani Nɛri dencɛ Abinɛri ta, ni Seruya deen Zowabu ta, ani fɛɛn o fɛɛn tun dira Ala ma, Selomiti n'a balimaw tun be olu kɔlɔsi.

²⁹Yiseyari ka fadenyabolo la, Kenaniyawu n'a deenw le tun kɛra Isirayɛlidenw ka konyanabɔbagaw ni kititigɛlaw ye jamana kɔnɔ.

³⁰Eburɔn ka fadenyabolo la, Asabiyawu n'a balima mɔgɔ waa kelen ni kɛmɛ wolonwula (1 700), o bɛɛ be se u ka baara la, olu le tun be Isirayɛli jamana kɔlɔsi, Zurudɛn baji kɔfɛ tileben fɛ, ani ka Masaba ka koo bɛɛ ɲanabɔ, ani masacɛ ta.

³¹Eburɔn ka fadenyabolo la, Yeriya le tun kɛra kuntigi ye. U ye sɛgɛsɛgɛli kɛ u ka buruju koo la Dawuda ka masaya saan bi naaninan kɔnɔ, k'a ye ko mɔgɔ dɔw tun b'u cɛma minw be se u ka baara la, o ye Yazɛrikaw ye ka bɔ Galaadi mara la.

³²Ale Yeriya n'a balimaw tun be se u ka baara la, u mɔgɔ waa fila ni kɛmɛ wolonwula (2 700). Gwatigiw lo, masacɛ Dawuda tun ye u sigi Urubɛn kɔmɔgɔw ni Gadi taw ani Manase taw tilancɛ kunna, janko u ka Alako bɛɛ ni masacɛ taw ɲanabɔ.