Read dyu Masaw ka loon o loon kibaru kitabu fɔlɔ 27 Bible Online

Masaw ka loon o loon kibaru kitabu fɔlɔ 27 - dyu bible

Masaw ka loon o loon kibaru kitabu fɔlɔ 27

¹Isirayɛliden minw tun be masacɛ ka baara la, a gwatigiw fara a kɛlɛden waa kelen kelen kuntigiw kan, ani kɛmɛ kɛmɛ taw, ni ɲamɔgɔw, u ka baara tun ye jɛnkuluw kɔlɔsiko ye, minw be yɛlɛ baara la, ani minw be jigi, kalo o kalo, fɔɔ saan kuturu bɛɛ. Olu tun ye mɔgɔ waa mugan ni naani (24 000) le ye jɛnkulu kelen kɔnɔ.

²Kalo fɔlɔ ye jɛnkulu fɔlɔ ta ye, u ɲamɔgɔ tun ye Zabudiyɛli dencɛ Yasobeyamu ye. Mɔgɔ waa mugan ni naani le b'a ka jɛnkulu kɔnɔ.

³A tun be bɔ Pɛrɛti ka fadenyabolo la, ale lo tun be kɛlɛden kuntigiw bɛɛ mara o kalo fɔlɔ nin na.

⁴Kalo filanan jɛnkulu ɲamɔgɔ tun ye Dodayi ye, ka bɔ Awoyi ka fadenyabolo la, a ka jɛnkulu nin marabaga tun ye Mikilɔti ye. Mɔgɔ waa mugan ni naani le b'a ka jɛnkulu kɔnɔ.

⁵Kalo sabanan jɛnkulu ɲamɔgɔ tun ye sarakalasebagaw kuntigi Yoyada dencɛ Benayawu ye. Mɔgɔ waa mugan ni naani le b'a ka jɛnkulu kɔnɔ.

⁶Benayawu tun kɛra cɛfari ye kuntigi bi saba nunu cɛma, ale yɛrɛ le tun kɛra u ɲamɔgɔ ye. A dencɛ Amizabadi le nana kɛ jɛnkulu nin kuntigi ye.

⁷Kalo naaninan jɛnkulu ɲamɔgɔ tun ye Zowabu balimacɛ Azayɛli ye. A dencɛ Zebadiya nana sigi a nɔɔ na kɔfɛ. Mɔgɔ waa mugan ni naani le b'a ka jɛnkulu kɔnɔ.

⁸Kalo duurunan jɛnkulu ɲamɔgɔ tun ye kuntigi Samuti ye, ale tun be bɔ Yizira ka fadenyabolo la. Mɔgɔ waa mugan ni naani le b'a ka jɛnkulu kɔnɔ.

⁹Kalo wɔɔrɔnan jɛnkulu ɲamɔgɔ tun ye Ikɛsi dencɛ Ira ye ka bɔ Tekowa ka fadenyabolo la. Mɔgɔ waa mugan ni naani le b'a ka jɛnkulu kɔnɔ.

¹⁰Kalo wolonwulanan ta ɲamɔgɔ tun ye Efarayimu kɔmɔgɔ Ɛlɛsi ye ka bɔ Pelɔn. Mɔgɔ waa mugan ni naani le b'a ka jɛnkulu kɔnɔ.

¹¹Kalo seeginan ta ɲamɔgɔ tun ye Zari kɔmɔgɔ Sibekayi ye ka bɔ Usati. Mɔgɔ waa mugan ni naani le b'a ka jɛnkulu kɔnɔ.

¹²Kalo kɔnɔntɔnnan ta ɲamɔgɔ tun ye Bɛnzamɛn kɔmɔgɔ Abiyezɛri ye ka bɔ Anatɔti. Mɔgɔ waa mugan ni naani le b'a ka jɛnkulu kɔnɔ.

¹³Kalo tannan ta ɲamɔgɔ tun ye Zari kɔmɔgɔ Marayi ye ka bɔ Netofa. Mɔgɔ waa mugan ni naani le b'a ka jɛnkulu kɔnɔ.

¹⁴Kalo tan ni kelennan ta ɲamɔgɔ tun ye Efarayimu kɔmɔgɔ Benaya ye ka bɔ Piratɔn. Mɔgɔ waa mugan ni naani le b'a ka jɛnkulu kɔnɔ.

¹⁵Kalo tan ni filanan ta ɲamɔgɔ tun ye Otiniyɛli kɔmɔgɔ Ɛlidayi ye ka bɔ Netofa. Mɔgɔ waa mugan ni naani le b'a ka jɛnkulu kɔnɔ.

¹⁶Ɲamɔgɔ minw tun be Isirayɛli kɔmɔgɔw kunna, olu filɛ: Zikiri dencɛ Eliyezɛri le tun be Urubɛn kɔmɔgɔw kunna. Maaka dencɛ Sefatiya fana le tun be Simeyɔn taw kunna.

¹⁷Kemuyɛli dencɛ Asabiya le tun be Levi taw kunna. Sadɔki le tun be Arɔn taw kunna.

¹⁸Dawuda balimacɛ Eliwu le tun be Zuda taw kunna. Mikayɛli dencɛ Omuri tun be Isakari taw kunna.

¹⁹Zabulɔn taw ta kɛra Obadiyawu dencɛ Yisimayawu ye. Nɛfutali taw ta tun ye Aziriyɛli dencɛ Yerimɔti ye.

²⁰Efarayimu taw ta tun ye Azaziyawu dencɛ Oseya ye. Manase taw tilancɛ ta tun ye Pedayawu dencɛ Yowɛli ye.

²¹Tilancɛ kelen min tun be Galaadi mara la, ale ta tun ye Zakariyawu dencɛ Ido ye. Bɛnzamɛn taw ta tun ye Abinɛri dencɛ Yaaziyɛli ye.

²²Dan taw ta tun ye Yerowamu dencɛ Azarɛli ye. Olu le tun ye Isirayɛli kɔmɔgɔw ɲamɔgɔw ye.

²³ Mɔgɔ minw sii tun ma tɛmɛ saan mugan kan, Dawuda tun ma olu mɔgɔda jati, bari Masaba tun y'a fɔ ko a bena Isirayɛlidenw caya i n'a fɔ lolow.

²⁴ Seruya dencɛ Zowabu tun y'a daminɛ k'u jati, nga a m'a laban, bari Masaba tun dimina Isirayɛlidenw kɔrɔ k'u tɔɔrɔ o le kama. O la, u daa ma se ka sɛbɛn masacɛ Dawuda ka loon o loon kibaru sɛbɛ kɔnɔ.

²⁵Adiyɛli dencɛ Azimawɛti tun be masacɛ ka nafolo marayɔrɔ kunna. Masacɛ ka nafolo minw tun be kongo kɔnɔ, ani dugubabaw ni dugudenninw, ani kɔlɔsilikɛlaw ka sangasow kɔnɔ, Uziyawu dencɛ Yonatan tun be olu kunna.

²⁶Kelubu dencɛ Eziri tun be forobaara kunna kongo kɔnɔ.

²⁷Simeyi ka bɔ Arama tun be *ɛrɛzɛnforow kunna. Zabudi ka bɔ Sefamu tun be duvɛn labɛnko kunna.

²⁸Mɔgɔ min tun be olivuforow ni torosunforow kunna kulujukɔrɔ mara la, o tun ye Baalanan ye ka bɔ Gɛdɛri. Yowasi le tun be tuluko kunna.

²⁹Begɛn minw tun be dɛndɛ Sarɔn mara kɔnɔ, Sitirayi ka bɔ Sarɔn le tun be olu kunna. Minw tun be dɛndɛ kɔkɛnɛ na, Adilayi dencɛ Safa le tun be olu kunna.

³⁰Isimayɛli kɔmɔgɔ Obili tun be ɲɔgɔmɛw kunna. Yediya ka bɔ Meronɔti tun be faliw kunna.

³¹Agiricɛ Yazizi tun be begɛnmisɛnw kunna. Nunu le tun ye masacɛ Dawuda ka nafolo marabagaw ye.

³²Dawuda facɛfitini Yonatan le tun ye ladilikɛbaga ye. Mɔgɔ kalannin hakilitigi tun lo. Akimoni deen Yeyɛli tun be masacɛ deenw kalan.

³³Ayitofɛli tun ye masacɛ ladibaga ye. Arikicɛ Usayi tun ye masacɛ tericɛ ye.

³⁴Mɔgɔ minw tugura Ayitofɛli kɔ, o tun ye Benayawu dencɛ Yoyada ye, ani Abiyatari. Zowabu kɛra masacɛ ka kɛlɛdenw ɲamɔgɔba ye.