Read dyu Masaw ka loon o loon kibaru kitabu fɔlɔ 5 Bible Online

Masaw ka loon o loon kibaru kitabu fɔlɔ 5 - dyu bible

Masaw ka loon o loon kibaru kitabu fɔlɔ 5

¹ Isirayɛli deen fɔlɔ Urubɛn deenw filɛ nin ye. (Ale Urubɛn le tun ye kɔrɔ ye u facɛ fɛ, nga a lara n'a facɛ ka gɛrɛfɛmuso ye minkɛ, o la, a ka kɔrɔya bɔsir'a la, ka di Isirayɛli deen Yusufu deenw ma. O la, u tun t'a jati i n'a fɔ u kɔrɔ tugu.

² Zuda tun ye barika sɔrɔ kosɔbɛ a balimaw cɛma, masacɛ bɔra ale lo kɔmɔgɔ la, nga kɔrɔya tun dira Yusufu ma.)

³Isirayɛli deen fɔlɔ Urubɛn deenw le ye Anɔki ni Palu, ani Ɛsirɔn ni Karimi ye.

⁴Yowɛli kɔmɔgɔw ye: a deen Semaya, n'a deen Gɔgi, n'ale deen Simeyi,

⁵n'a deen Mika, n'ale deen Ereyaya, ani ale deen Baali,

⁶ n'a deen Beera ye. Asiri masacɛ Tiligati Pilinezɛri y'ale lo minɛ ka taga n'a ye jɔnya la. Ale tun ye Urubɛn kɔmɔgɔw kuntigi dɔ ye.

⁷A balimaw buruju fɔra ka kɛɲɛ n'u ka fadenyabolow ye. U kuntigiw ye Yeyɛli ye, ni Zakariyawu,

⁸ani Yowɛli deen Sɛma deen Azazi dencɛ Bɛla ye. U ka sigiyɔrɔ tun ye Arowɛri ye, fɔɔ ka se Nebo kulu ma, ani Baalimeŋɔn, kɔgɔdugu faan fɛ.

⁹K'a ta kɔrɔn fɛ, u sigira fɔɔ ka taga se kongokolon daminɛyɔrɔ la, min be u ni Efarati baji cɛ, bari u ka begɛnw tun ka ca Galaadi mara la.

¹⁰U ye agariw kɛlɛ ka se u kɔrɔ Sayuli ka tile la. U sigira Galaadi mara bɛɛ la kɔrɔn fɛ.

¹¹Gadi kɔmɔgɔw tun sigira Urubɛn kɔmɔgɔw gɛrɛfɛ *Basan mara la fɔɔ ka taga se Salika mara la.

¹²U ɲamɔgɔw tun ye: fɔlɔ, Yowɛli, minw tugura, Safamu ni Yayenayi, ani Safati, Basan mara la.

¹³U balimaw tɔgɔ filɛ ka kɛɲɛ n'u ka gwaaw ye: Mikayɛli ni Mesulamu, ani Seba ni Yorayi, ani Yayekan ni Ziya ani Ebɛri. Olu ye mɔgɔ wolonwula ye.

¹⁴Buzi deen, Yado deen, Yesisayi deen Mikayɛli deen, Galaadi deen, Yaroya deen, Huri dencɛ Abiyayili deenw le ye olu ye.

¹⁵Guni deen Abidiyɛli dencɛ Ayi ye fadenyabolo nunu kuntigi ye.

¹⁶Gadi kɔmɔgɔw sigira Galaadi ni Basan mara la, ani o lamini na, ni Sarɔn kongo kɔnɔ bɛɛ la, fɔɔ ka taga se u daan na.

¹⁷U bɛɛ tɔgɔw sɛbɛnna Zuda mara masacɛ Yotamu, ni Isirayɛli mara masacɛ Zerobowamu ka tilew la.

¹⁸Urubɛn kɔmɔgɔw, ni Gadi taw, ani Manase taw tilancɛ niin tun be cɛfariw cɛma. U tun be se nigɛkunbɛnnanw ni murujan na, ani kalabon na fana. U tun be se kɛlɛ la. U ka mɔgɔ waa bi naani ni naani ani kɛmɛ wolonwula ni bi wɔɔrɔ (44 760) le tun be se ka taga kɛlɛ la.

¹⁹U ye kɛlɛ kɛ ni agariw ye, ni Yeturi kɔmɔgɔw, ni Nafisi taw, ani Nodabu taw ye.

²⁰U tun ye dɛmɛ sɔrɔ, Ala ye agariw don u bolo, ani minw bɛɛ tun be ni olu ye. Bari k'u to kɛlɛ la, u ye Ala daali. A fana y'u jaabi, bari u tun y'u jigi la a kan.

²¹U y'u ka begɛnw minɛ: ɲɔgɔmɛ waa bi duuru (50 000), ni begɛnmisɛn waa kɛmɛ fila ni waa bi duuru (250 000), ani fali waa fila (2 000), ni mɔgɔ waa kɛmɛ (100 000).

²²U jugu caaman sara kɛlɛ nin na, bari Ala le tun y'a to kɛlɛ nin kɛra. U sigira o mɔgɔ nunu ka sigiyɔrɔ la fɔɔ ka na se u minɛtuma ma ka taga jɔnya la.

²³Manase kɔmɔgɔw tilancɛ sigira jamana nin kɔnɔ k'a ta *Basan mara la, worodugu ɲafan fɛ, fɔɔ ka taga se Baalɛrɛmɔn ni Seniri, Ɛrɛmɔn kulu kan, kɔgɔdugu faan fɛ. U tun ka ca.

²⁴U ka gwatigiw le ye nunu ye: Efɛri ni Yiseyi, ani Eliyɛli ni Aziriyɛli, ani Yirimeya ni Odawiya, ani Yadiyɛli. Olu tun ye cɛfariw ye, u tɔgɔ tun bɔra.

²⁵Nga o kɔ, u ma tilen u faaw ka Ala ma, u ye kakalaya kɛ. Ala tun ye siya minw halaki u ɲa jamana nin kɔnɔ, u ye olu ka joow sɔn.

²⁶ O la, Isirayɛli ka Ala y'a to Asiri masacɛ Puli n'u b'a wele fana ko Tiligati Pilinezɛri, ale dimina u kɔrɔ ka wili u kama, ka Urubɛn kɔmɔgɔw ni Gadi taw, ani Manase taw tilancɛ minɛ ka taga n'u ye Hala ni Abɔri, ani Ara, ni Gozan baa daa la. U tora o yɔrɔ la fɔɔ ka na se bii ma.

²⁷Levi deenw ye nunu ye: Gɛrisɔn ni Keyati ani Merari.

²⁸Keyati ka deenw ye Amuramu ye, ani Yiseyari ni Eburɔn, ani Uziyɛli.

²⁹Amuramu deenw ye Arɔn ni Musa ani Miriyama ye. Arɔn deenw ye Nadabu ye, ni Abiyu, ani Eleyazari ni Itamari ye.

³⁰Eleyazari ye Pinasi wolo, Pinasi ye Abisuwa wolo.

³¹Abisuwa ye Buki wolo. Buki ye Uzi wolo.

³²Uzi ye Zeraya wolo. Zeraya ye Merayɔti wolo.

³³Merayɔti ye Amariya wolo. Amariya ye Ayitubi wolo.

³⁴Ayitubi ye Sadɔki wolo. Sadɔki ye Ayimasi wolo.

³⁵Ayimasi ye Azariya wolo. Azariya ye Yowanan wolo.

³⁶Yowanan ye Azariya wolo. Masacɛ Solomani tun ye Alabatoso min lɔ Zeruzalɛmu kɔnɔ, ale Azariya le tun ye sarakalasebaga ye o kɔnɔ.

³⁷Azariya ye Amariya wolo. Amariya ye Ayitubi wolo.

³⁸Ayitubi ye Sadɔki wolo. Sadɔki ye Salumu wolo.

³⁹Salumu ye Ilikiya wolo. Ilikiya ye Azariya wolo.

⁴⁰Azariya ye Seraya wolo. Seraya ye Yozadaki wolo.

⁴¹Masaba y'a kɛ Nabukodonozɔri ye Zuda mara mɔgɔw ni Zeruzalɛmukaw minɛ ka taga n'u ye jɔnya la tuma min na, Yozadaki tagara fana.