Read dyu Masaw ka loon o loon kibaru kitabu filanan 1 Bible Online

Masaw ka loon o loon kibaru kitabu filanan 1 - dyu bible

Masaw ka loon o loon kibaru kitabu filanan 1

¹Dawuda dencɛ Solomani ka masaya sabatira. Masaba a ka Ala tun be n'a ye, k'a kɛ mɔgɔbaba ye kosɔbɛ.

²Solomani kumana Isirayɛlidenw bɛɛ fɛ, mɔgɔ waa kelen kelen, ni kɛmɛ kɛmɛ kuntigiw, ani kititigɛlaw ni Isirayɛlidenw ɲamɔgɔw bɛɛ, o kɔrɔ ko gwatigiw fɛ.

³Solomani ni jama bɛɛ tagara batolikɛyɔrɔ la Gabaŋɔn. Masaba ka baarakɛla Musa tun ye Ɲɔgɔnkunbɛn fanibugu min dilan Ala ye kongokolon kɔnɔ, ale tun be o yɔrɔ la.

⁴ O y'a sɔrɔ Dawuda tun ye fanibugu lɔ Ala ka layidu taamasiɲɛ kɛsu kama. A tun ye kɛsu nin ta Kiriyati Yarimu ka taga n'a ye Zeruzalɛmu k'a bila o yɔrɔ nin na.

⁵ Huri deen Uri dencɛ Besalɛli tun ye sarakabɔyɔrɔ ziralaman min dilan, o tun bilanin be Masaba ka Ɲɔgɔnkunbɛn fanibugu ɲafɛ Gabaŋɔn. Solomani ni jama tun ye Masaba daali o yɔrɔ la.

⁶Solomani tagara sarakabɔyɔrɔ nin na Masaba ɲakɔrɔ, fanibugu gɛrɛfɛ, ka begɛn caaman kɛ saraka jɛnita ye o yɔrɔ la.

⁷O suu la, Ala y'a yɛrɛ yira Solomani na, k'a fɔ a ye ko: «I be fɛɛn min fɛ, o daali, ne ben'a d'i ma.»

⁸Solomani y'a fɔ a ye ko: «I makarila ne facɛ Dawuda la kosɔbɛ, ka tila ka ne kɛ masa ye a nɔɔ na.

⁹ Masa Ala, e tun ye kuma min fɔ ne facɛ Dawuda ye, a t'o ka kɛ sisan, bari ele ye ne sigi jama kunna min ka ca i n'a fɔ dugukolo kan cɛncɛn.

¹⁰Hakilitigiya ni lɔnniya di ne ma, janko ne ka se ka jama nin maracogo lɔn. Bari jɔn le be se k'i ka jama mara, nin jamaba nin?»

¹¹Ala y'a fɔ Solomani ye ko: «O le b'i kɔnɔ, i ma nafolo ɲini, walima fɛntigiya, walima nɔɔrɔ, walima i juguw ka saya, walima sijan. I ye hakilitigiya ni lɔnniya le daali janko ka se ka ne ka jama mara, ne y'i sigi min kunna.

¹²O kosɔn, ne bena hakilitigiya ni lɔnniya d'i ma. Ne bena nafolo ni fɛntigiya, ani nɔɔrɔ d'i ma fana. Masa minw tɛmɛna i ɲa, olu si ma o ɲɔgɔn sɔrɔ ka ye, ani minw bena na i kɔ, olu si tena o ɲɔgɔn sɔrɔ tugu.»

¹³ Solomani bɔra Ɲɔgɔnkunbɛn fanibugu yɔrɔ la, batolikɛyɔrɔ nin na Gabaŋɔn, ka taga Zeruzalɛmu, ka sigi Isirayɛlidenw kunna.

¹⁴ Solomani ye kɛlɛkɛwotorow ni soow lajɛn. Wotoro waa kelen ni kɛmɛ naani (1 400), ni soo waa tan ni fila (12 000) tun b'a fɛ. A y'u to kɛlɛkɛwotorow maraduguw la, ani Zeruzalɛmu fana, a yɛrɛ kɔrɔ.

¹⁵Masacɛ ye warigwɛ ni sanu caya Zeruzalɛmu i n'a fɔ bɛrɛ. Sɛdiriyiri fana cayara i n'a fɔ sikomɔriyiri ka ca kulujukɔrɔ mara la cogo min na.

¹⁶ Solomani ka soow tun be bɔ Ezipiti ni Kewe jamana na. Masacɛ ka sannikɛlaw tun be to ka taga u san yen.

¹⁷Ka wotoro kelen ta Ezipiti jamana na ka na n'a ye, o sɔngɔ tun ye warigwɛ kuru kɛmɛ wɔɔrɔ ye. Soo kelen tun ye warigwɛ kuru kɛmɛ ni bi duuru ye. Itiw ni Siri masacɛw bɛɛ tun b'u san ten fana o jagokɛla nunu fɛ.

¹⁸Solomani y'a latigɛ ko u ka soo lɔ Masaba ye, ani ka dɔ lɔ ale yɛrɛ ye fana.