Read dyu Masaw ka loon o loon kibaru kitabu filanan 10 Bible Online

Masaw ka loon o loon kibaru kitabu filanan 10 - dyu bible

Masaw ka loon o loon kibaru kitabu filanan 10

¹Orobowamu tagara Sisɛmu, bari Isirayɛlidenw bɛɛ tun nana janko k'a sigi masaya la.

²Nebati dencɛ Zerobowamu y'o mɛn tuma min na, a bɔra Ezipiti jamana na ka kɔsegi. A tun bolila masacɛ Solomani ɲa ka taga sigi yen.

³U ye mɔgɔ bila ka ta'a wele. Zerobowamu ni Isirayɛlidenw bɛɛ nana ɲɔgɔn sɔrɔ k'a fɔ Orobowamu ye ko:

⁴«I facɛ ye sigɛnba la an kan. Sisan, ele k'o baaragwɛlɛn n'o sigɛn nin nɔgɔya an ye, i faa tun ye min la an kan, an bena baara kɛ i ye.»

⁵A y'a fɔ u ye k'u ka taga ka segi ka na yanni tile saba. Jama tagara.

⁶Masacɛ Orobowamu ye cɛkɔrɔbaw ɲininga, minw tun ye baara kɛ n'a faa Solomani ye, k'a fɔ ko: «Aw be ladili jumɛn di ne ma? Ne ka jaabili jumɛn di jama nin ma?»

⁷Cɛkɔrɔba nunu y'a jaabi ko: «N'i ye jama nin minɛ ka ɲa k'i janto u la, ani k'u jaabi ni kumaɲuman ye, u bena to i fɛ ka baara kɛ i ye tuma bɛɛ.»

⁸Nga Orobowamu ye cɛkɔrɔba nunu ka ladili to yen ka ta'a tɔɲɔgɔn kanbelenw ɲininga, a mɔna ni minw ye, n'u be baara kɛ a ye.

⁹A y'a fɔ u ye ko: «Ne ka kan ka mun le fɔ jama nin ye? Minw y'a fɔ ne ye ko: ‹I faa ye sigɛn min la an kan, i k'o nɔgɔya an ma.› »

¹⁰A tɔɲɔgɔnw y'a jaabi ko: «Mɔgɔ minw y'a fɔ i ye ko i faa ye sigɛnba min la olu kan, i k'o nɔgɔya olu ye, i ben'a fɔ u ye ko ele bolokunnadennin ka bon n'i facɛ cɛɛ ye.

¹¹Ko i faa tun ye sigɛnba la u kan, ko sisan e bena dɔ fara o kan. Ko i faa tun be to k'u bugɔ ni busan ye, ko ele bena to k'u bugɔ ni ŋɔni ye.»

¹²Tile sabanan loon sera, Zerobowamu ni jama bɛɛ kɔsegira ka na masacɛ Orobowamu fɛ, i ko a tun y'a fɔ cogo min na k'u ka taga ka na yanni tile saba.

¹³Cɛkɔrɔbaw tun ye ladili min d'a ma, a y'o to yen, k'u jaabi ni kuma gwɛlɛ ye.

¹⁴A ye kanbelen nunu ka ladilikuma ta k'o fɔ u ye ko: «Ne faa ye sigɛnba la aw kan, ne fana bena dɔ fara o sigɛn nin kan. Ne faa tun be to k'aw bugɔ ni busan ye, ne bena aw bugɔ ni ŋɔni ye.»

¹⁵A kɛra ten, masacɛ ma sɔn ka mɛnni kɛ jama fɛ, bari Ala le y'a kɛ ten janko a tun ye kuma min fɔ kira Ayiya ye ka bɔ Silo ko a k'a fɔ Nebati dencɛ Zerobowamu ye, o ka kɛ.

¹⁶ Isirayɛlidenw bɛɛ y'a ye ko masacɛ t'a fɛ ka mɛnni kɛ u fɛ minkɛ, u y'a fɔ a ye ko: «Mun le be anw ni Dawuda cɛ? Foyi te an ni Zese dencɛ cɛ! Isirayɛlidenw, aw ka taga aw ka soo! Sisan Dawuda ka banba n'a ka soo ye!» A kɛra ten, Isirayɛli mara mɔgɔw bɛɛ segira ka taga u ka soow kɔnɔ.

¹⁷Isirayɛliden minw tun siginin be Zuda mara duguw kɔnɔ, Orobowamu kɛra olu dama ka masacɛ ye.

¹⁸Masacɛ Orobowamu ye Adoramu ci, min tun ye fasobaara kuntigi ye. Nga Isirayɛli mara mɔgɔw y'a bon ni kabakuru ye k'a faga. Masacɛ Orobowamu kɔni sera ka don a ka wotoro kɔnɔ ka boli ka taga Zeruzalɛmu.

¹⁹A kɛra ten Isirayɛliden tɔw faranna ka bɔ Dawuda ka soo la fɔɔ ka na se bii ma.