Read dyu Masaw ka loon o loon kibaru kitabu filanan 12 Bible Online

Masaw ka loon o loon kibaru kitabu filanan 12 - dyu bible

Masaw ka loon o loon kibaru kitabu filanan 12

¹Orobowamu sigira ka ɲa a ka masaya la ka barika sɔrɔ tuma min na, a ma Masaba ka sariya bato tugu, ale ni Isirayɛlidenw bɛɛ.

²A saan duurunan masaya la, Ezipiti masacɛ Sisaki nana Zeruzalɛmu kɛlɛ, bari u tun ma tilen Masaba ɲakɔrɔ.

³Sisaki nana ni kɛlɛkɛwotoro waa kelen ni kɛmɛ fila (1 200) ye, ni sotigi waa bi wɔɔrɔ (60 000), ani jamaba min y'a bila sira ka bɔ Ezipiti jamana na: Libikaw, ni sukiw, ani Etiyopikaw.

⁴A ye Zuda mara dugu barikamanw minɛ, a sera fɔɔ Zeruzalɛmu.

⁵O kɔ, kira Semaya nana Orobowamu ni Zuda mara ɲamɔgɔw fɛ, minw tun ye ɲɔgɔn lajɛn Zeruzalɛmu, bari, Sisaki tun be surunyana. A y'a fɔ u ye ko: «Masaba y'a fɔ ko aw y'ale bila. K'o la, ale bena aw bila k'aw don Sisaki bolo.»

⁶Isirayɛlidenw ka ɲamɔgɔ nunu ni masacɛ y'u yɛrɛ majigi k'a fɔ ko: «Tiɲɛ be Masaba fɛ.»

⁷Masaba y'a ye ko u y'u yɛrɛ majigi tuma min na, a y'a fɔ Semaya ye ko: «U y'u yɛrɛ majigi minkɛ, ne tena u halaki tugu, yanni dɔɔni, ne bena bɔyɔrɔ di u ma, ne tena Sisaki kɛ ka n dimi bɔ Zeruzalɛmu na tugu.

⁸O bɛɛ n'a ta, Sisaki bena to u kunna. O la, faranfasi min be ne ka baara, ni jamana wɛrɛ masaw ta cɛ, u ben'o lɔn.»

⁹ Ezipiti masacɛ Sisaki ye Zeruzalɛmu kɛlɛ ka Masaba ka soo kɔnɔ nafolow, ni masacɛ ka soo kɔnɔ ta cɛ ka taga n'a ye. A y'o bɛɛ ta, hali nigɛkunbɛnnan sanulamanw, Solomani tun ye minw dilan.

¹⁰Masacɛ Orobowamu ye dɔ wɛrɛw dilan u nɔɔ na ni zira ye, k'o kalifa masaso donda kɔlɔsibagaw kuntigiw ma.

¹¹Ni masacɛ be taga Masaba ka soo kɔnɔ tuma min na, daa kɔlɔsibaga nunu tun be to k'u ta k'a bila sira. O kɔ, u be kɔsegi ka na u bila daa kɔlɔsibagaw ka soo.

¹²Orobowamu y'a yɛrɛ majigi minkɛ, Masaba ma dimi a kɔrɔ tugu, a m'a halaki pewu. Koɲuman dɔw tun be sɔrɔ Zuda mara la.

¹³Masacɛ Orobowamu sigira ka ɲa Zeruzalɛmu, a tora masaya la. Yanni a ka kɛ masacɛ ye, a sii tun sera saan bi naani ni kelen ma. A ye saan tan ni wolonwula kɛ masaya la Zeruzalɛmu, Masaba tun ye dugu min woloma Isirayɛlidenw ka duguw bɛɛ cɛma, k'a tɔgɔ la a kan. A bamuso tɔgɔ tun ko Naama, amonimuso tun lo.

¹⁴Orobowamu ye kojugu kɛ, bari a tun ma Masaba ɲini n'a sɔbɛ ye.

¹⁵A ka kɛwali tɔw, k'a ta a daminɛ ma fɔɔ ka taga se a laban na, o be sɔrɔ kira Semaya ka kɛwaliw kitabu kɔnɔ, ani kira Ido ta la, minw be mɔgɔw burujuw koo fɔ. Kɛlɛ tun be Orobowamu ni Zerobowamu cɛ tuma bɛɛ.

¹⁶Orobowamu sara, u y'a suu don Dawuda ka ciin kɔnɔ. O kɔ, a dencɛ Abiya sigir'a nɔɔ na masaya la.