Read dyu Masaw ka loon o loon kibaru kitabu filanan 15 Bible Online

Masaw ka loon o loon kibaru kitabu filanan 15 - dyu bible

Masaw ka loon o loon kibaru kitabu filanan 15

¹Ala ka Nii jigira Odɛdi dencɛ Azariya kan.

²A bɔra ka taga Aza kunbɛn k'a fɔ a ye ko: «Aza, e ni Zuda kɔmɔgɔw, ani Bɛnzamɛn taw bɛɛ, aw ka mɛnni kɛ ne fɛ. N'aw tora Masaba fɛ, a be to n'aw ye. N'aw y'a ɲini, aw ben'a ye. Nga ni aw bann'a la, a bena ban aw la fana.

³Waatijan kɔnɔ, Ala yɛrɛ yɛrɛ tun te Isirayɛlidenw fɛ, sarakalasebaga tun t'u fɛ min bena u kalan, sariya tun t'u fɛ.

⁴Nga k'u to sigɛn na, u segira ka na Masaba, Isirayɛli ka Ala fɛ, k'a ɲini, a fana y'a to u y'a ye.

⁵O waati la, mɔgɔ tun te se ka taama hɛrɛ la, bari sigɛnba tun be jamanaw bɛɛ mɔgɔw kan.

⁶Siyaw tun be ɲɔgɔn kɛlɛla, duguw fana tun be ɲɔgɔn kɛlɛla, bari Ala le tun y'u sigɛn ni tɔɔrɔ sifa bɛɛ sababu ye.

⁷Nga aw kɔni, aw ka jija, aw kan'a to aw fari be faga, bari aw bena aw ka baara tɔnɔ sɔrɔ.»

⁸Aza ye Odɛdi dencɛ kira Azariya, ka kirayakuma nin mɛn tuma min na, a ye jagwɛlɛya sɔrɔ. A ye joow bɔ yɔrɔ bɛɛ Zuda ni Bɛnzamɛn maraw la, n'a tun ye dugu minw minɛ Efarayimu kuluyɔrɔ la. Masaba ka sarakabɔyɔrɔ min tun be Masaba ka bulonda ɲafɛ, a y'o lalaga.

⁹Isirayɛliden minw tun bolila ka na sigi u cɛma ka bɔ Efarayimu ni Manase ani Simeyɔn maraw la, a ye olu ni Zuda ni Bɛnzamɛn mara mɔgɔw bɛɛ lajɛn. Bari, Isirayɛli mara mɔgɔw y'a ye ko Masaba a ka Ala be n'a ye tuma min na, u caaman tun nana fara a kan.

¹⁰U ye ɲɔgɔn lajɛn Zeruzalɛmu, Aza ka masaya saan tan ni duurunan kalo sabanan na.

¹¹O waati la, u tun ye fɛɛn minw sɔrɔ kɛlɛkɛyɔrɔ la, u ye misi kɛmɛ wolonwula ni begɛnmisɛn waa wolonwula (7 000) bɔ o la k'o bɔ saraka ye Masaba ye.

¹²U ye layidu ta ko u bena Masaba u faaw ka Ala ɲini n'u kɔnɔ bɛɛ, an'u dusu bɛɛ ye.

¹³Ko ni mɔgɔ min banna ka Masaba, Isirayɛli ka Ala ɲini, k'o tigi bena faga, denmisɛn fara mɔgɔkɔrɔba kan, cɛɛ ni musow.

¹⁴U kalila k'u daa di Masaba ma ni mankanba, ni pɛrɛnkan, ani buru fiyɛkan ni filew kaan ye.

¹⁵Zuda mara mɔgɔw bɛɛ nisɔndiyara o kalili nin kosɔn, bari u tun y'a kɛ n'u dusu bɛɛ ye. U tun ye Masa Ala ɲini n'u sɔbɛ ye, a y'a to u y'a ye. O la, a ye lafiɲɛyɔrɔ d'u ma yɔrɔ bɛɛ.

¹⁶Masacɛ mamamuso Maaka tun ka kan ni boɲa min ye, masacɛ Aza y'o bali, bari ale tun ye *Asera jaa dɔ dilan, min ma ɲi fewu. Aza ye lɔgɔ nin tigɛ k'a karikari, k'a jɛni Sedirɔn kɔkɛnɛ na.

¹⁷A ma sɔnnikɛyɔrɔw bɛɛ bɔ yen, nga Masaba koo tun b'a dusu la a sii bɛɛ la.

¹⁸Ale n'a facɛ tun ye sanu ni warigwɛ, ani minan minw di Ala ma, a y'o ta ka na n'u ye Ala ka soo kɔnɔ.

¹⁹Kɛlɛ tun te yen tugu fɔɔ ka taga se Aza ka masaya saan bi saba ni duurunan ma.