Read dyu Masaw ka loon o loon kibaru kitabu filanan 19 Bible Online

Masaw ka loon o loon kibaru kitabu filanan 19 - dyu bible

Masaw ka loon o loon kibaru kitabu filanan 19

¹Zuda mara masacɛ Zozafati segira ka ta'a ka soo hɛrɛ la Zeruzalɛmu.

²Anani dencɛ, kira Zewu bɔra k'a kunbɛn, k'a fɔ a ye ko: «I ka kan ka mɔgɔjugu dɛmɛ wa? Masaba koo man di mɔgɔ minw ye, i ka kan ka olu kanu wa? Masaba dimina i kɔrɔ o le kosɔn.

³Nga jogoɲuman b'i la, bari i ye *Asera jaaw ban jamana kɔnɔ, i y'i jija ka Ala ɲini!»

⁴Zozafati tora Zeruzalɛmu. O kɔ, a bɔra ka taga munumunu jama cɛma, k'a ta Bɛriseba fɔɔ ka ta'a bila Efarayimu mara kuluyɔrɔ ma. A ye jama dɛmɛ ka kɔsegi Masaba a faaw ka Ala ma.

⁵A ye kititigɛlaw sigi jamana kɔnɔ, Zuda mara dugu barikamanw kelen kelen bɛɛ kɔnɔ.

⁶A y'a fɔ u ye ko: «Aw bena min kɛ, aw ka jija k'o kɛ ka ɲa, bari aw bena kiti minw tigɛ, aw tena olu tigɛ adamaden kama, Masaba kama lo. Ale lo bena to n'aw ye aw ka tiɲɛfɔwaati la.

⁷Aw ka siran Masaba ɲa sisan. Aw k'aw ka kɛwaliw kɔlɔsi, bari namara te Masaba an ka Ala ka koo la. A te mɔgɔ bɔ mɔgɔ la, a te dasanfɛn fɛ.»

⁸Zozafati ye Levi kɔmɔgɔ dɔw, ni sarakalasebaga dɔw, ani Isirayɛlidenw ka gwatigi dɔw woloma k'u sigi Zeruzalɛmu fana, janko u ka kiti tigɛ Masaba tɔgɔ la, ani ka dugu mɔgɔw ka sɔsɔlikow ɲanabɔ.

⁹A y'a fɔ u ye ko: «Aw ka kan ka baara kɛ Masaba ɲasiran la, ni tilenninya ani kɔnɔgwɛ ye.

¹⁰Aw balimaw mana bɔ u ka duguw la k'aw sɛgɛrɛ n'u ka koo ye, mɔgɔfagako lo wo, sariya dɔ, walima kolatigɛnin dɔ batoko lo wo, aw k'u ladi, janko u kana Masaba hakɛ ta, a kana dimi aw n'aw balimaw kɔrɔ. Aw k'a kɛ ten janko aw kana kojugu kɛ.

¹¹Sarakalasebagaw kuntigi Amariya b'aw kunna Masaba ka koo ɲanabɔ kama. Yisimayɛli dencɛ Zebadiyawu min ye masacɛ ka lasigiden ye Zuda mara kunna, ale b'aw kunna janko k'aw dɛmɛ masacɛ ka koo ɲanabɔ la. Levi kɔmɔgɔw fana b'aw kunna, ka kɛ kititigɛlaw ye. Aw ka baara kɛ ni jagwɛlɛya ye. Masaba ka to ɲumankɛlaw fɛ.»