Read dyu Masaw ka loon o loon kibaru kitabu filanan 25 Bible Online

Masaw ka loon o loon kibaru kitabu filanan 25 - dyu bible

Masaw ka loon o loon kibaru kitabu filanan 25

¹Sanni Amaziyasi ka kɛ masacɛ ye, a sii tun sera saan mugan ni duuru. A ye saan mugan ni kɔnɔntɔn kɛ masaya la Zeruzalɛmu. A bamuso tɔgɔ tun ko Yowadan ka bɔ Zeruzalɛmu.

²A ye koɲuman kɛ Masaba ɲakɔrɔ, nga a m'a kɛ ni kɔnɔgwɛ ye.

³A sigira ka ɲa a ka masaya la tuma min na, a ka dakɔrɔsigi minw tun y'a facɛ masacɛ faga, a ye olu faga.

⁴ Nga a ma u dencɛw faga, ka kɛɲɛ ni Musa ka sariyasɛbɛ kɔnɔnakuma ye, Masaba y'a fɔ yɔrɔ min na ko: «Faaw tena faga u deen nɔɔ na, deenw fana tena faga u faaw nɔɔ na, mɔgɔ kelen kelen bɛɛ bena faga a yɛrɛ ka kojuguw kosɔn.»

⁵Amaziyasi ye Zuda mara mɔgɔw lajɛn, ka kɛlɛden waa kelen kelen kuntigiw ni kɛmɛ kɛmɛ kuntigiw sigi ka kɛɲɛ n'u ka fadenyabolow ye, Zuda ni Bɛnzamɛn mara bɛɛ la. O kɔ, a ye mɔgɔw jati k'a ta mɔgɔw ma minw sii sera saan mugan ma ka yɛlɛ. A ye mɔgɔ waa kɛmɛ saba sɔrɔ minw be se ka taga kɛlɛ la, n'u be se taman ni nigɛkunbɛnnan na.

⁶A ye Isirayɛli mara cɛfari waa kɛmɛ (100 000) fana ta warigwɛ tɔni saba ɲɔgɔn la.

⁷Nga Ala ka mɔgɔ dɔ nan'a fɔ a ye ko: «Masacɛ, Isirayɛli mara kɛlɛdenw man kan ka taga n'i ye, bari Masaba te ni Isirayɛli mara mɔgɔ nunu si ye, Efarayimu kɔmɔgɔ nunu.

⁸N'i tagara n'u ye, hali n'i y'i seko bɛɛ kɛ kɛlɛ la, Ala ben'a kɛ i be dɛsɛ ka lɔ i juguw ɲa, bari see b'a ye ka mɔgɔ dɛmɛ, walima k'a kɛ a te se ka lɔ a juguw ɲa.»

⁹A y'a fɔ Ala ka mɔgɔ nin ye ko: «Ne ye warigwɛ tɔni saba ɲɔgɔn min di Isirayɛli mara kɛlɛdenw ma, n ka kan k'o koo kɛ cogo di?» Ala ka mɔgɔ nin y'a jaabi ko: «Masaba be se ka dɔ d'i ma tugu min ka ca n'o ye kosɔbɛ.»

¹⁰Kɛlɛden minw bɔra Efarayimu mara la, Amaziyasi ye olu bila ka kɔsegi u ka yɔrɔ la. U dimina Zuda mara mɔgɔw kɔrɔ kosɔbɛ, u dimininba le kɔsegira ka taga soo.

¹¹Amaziyasi y'a jaa gwɛlɛya ka wili ka taga n'a ka kɛlɛdenw ye, kɔgɔ be kɔkɛnɛ min na, ka edɔmu mɔgɔ waa tan (10 000) faga yen.

¹²Zuda mara kɛlɛdenw ye mɔgɔ waa tan ɲanamanw minɛ fana ka taga n'u ye fara dɔ sanfɛ, k'u ɲɔti ka jigi, u bɛɛ ɲɔɲɔna.

¹³Amaziyasi tun ye Isirayɛli mara kɛlɛden minw bila ka kɔsegi, a ma sira di minw ma ka taga n'a ye kɛlɛ la, olu tagara don Zuda mara duguw kɔnɔ, k'a ta Samari fɔɔ ka taga se Bɛtorɔn. U ye mɔgɔ waa saba (3 000) faga, k'u bololafɛn caaman ta ka taga n'u ye.

¹⁴Amaziyasi sera edɔmuw kɔrɔ ka ban tuma min na, a kɔsegitɔ y'u ka joow ta ka na n'u ye. A y'u kɛ a ka joow ye ka biri u kɔrɔ, ani ka fɛɛn kasadimanw jɛni u ye.

¹⁵Masaba dimin'a kɔrɔ ka kira dɔ ci a fɛ. Ale y'a fɔ a ye ko: «Mun na i ye siya nin ka joow ɲininga? O do ma se k'u tigiw bɔsi i bolo.»

¹⁶K'a to kuma na, Amaziyasi y'a fɔ a ye ko: «An y'i sigi k'i kɛ masacɛ ladibaga ye wa? I daa tugu! Mun na i b'a fɛ u k'i bugɔ?» O la, kira nin y'a ka kuma laban ko: «Ne y'a lɔn ko Ala le y'a latigɛ ko a bena i halaki, bari, e ye nin kɛ, e ma sɔn ne ka ladili ma fana.»

¹⁷Zuda mara masacɛ Amaziyasi ye ɲɔgɔnye kɛ n'a ka mɔgɔw ye. O kɔ, a ye cidenw bila ka ta'a fɔ Zewu deen Yowakazi dencɛ Zowasi, Isirayɛli mara masacɛ ye ko a ka na u be ɲɔgɔn kɛlɛ.

¹⁸Isirayɛli mara masacɛ Zowasi ye cira bila k'a fɔ a ye ko: «Liban kulu kan ŋɔniyiri ye cira bila k'a fɔ Liban sɛdiriyiri ye ko a k'a denmuso di ale dencɛ ma furu la. Nga Liban kongosogo dɔ tagara ŋɔniyiri nin dɔndɔn.

¹⁹I sera edɔmuw kɔrɔ, o le b'i kɔnɔ. O la, e b'i yɛrɛ funu k'i yɛrɛ boɲa. Nga to i ka yɔrɔ la! Mun na e b'i yɛrɛ don kɛlɛjugu la? I bena ben e ni Zuda mara fana!»

²⁰Nga Amaziyasi ma sɔn ka mɛnni kɛ, bari koo nin bɔra Ala le la, janko a ka se k'a don a juguw bolo bari u tun tugura edɔmuw ka joow kɔ.

²¹Isirayɛli mara masacɛ Zowasi nan'a kɛlɛ. U ye ɲɔgɔn sɔrɔ Bɛtisɛmɛsi, Zuda mara la.

²²Isirayɛli mara mɔgɔw sera Zuda mara taw kɔrɔ, u kelen kelen bɛɛ bolila ka taga u ka soow kɔnɔ.

²³Isirayɛli mara masacɛ Zowasi ye Zuda mara masacɛ Amaziyasi, Yowakazi [1] deen Zowasi dencɛ minɛ Bɛtisɛmɛsi. A nana n'a ye Zeruzalɛmu, ka dugu laminikogo ci k'a ta Efarayimu donda ma fɔɔ ka ta'a bila Nɔnkɔn donda la. O jaɲa be ɲini ka se mɛtɛrɛ kɛmɛ fila ma.

²⁴Sanu ni warigwɛ, ani minan minw tun be Ala ka soo kɔnɔ, Obɛdi Edɔmu tun be minw kɔlɔsira, a y'o bɛɛ ta, ani masacɛ ka soo nafolow fana. A ye mɔgɔ dɔw minɛ fana ka sɔrɔ ka kɔsegi Samari.

²⁵Zuda mara masacɛ Zowasi, Amaziyasi dencɛ tora sii la saan tan ni duuru Isirayɛli masacɛ Zowasi, Yowakazi dencɛ sanin kɔ.

²⁶Amaziyasi ka kɛwali tɔw, k'a ta u daminɛ na fɔɔ u laban na, o be sɔrɔ Zuda ni Isirayɛli mara masacɛw ka kitabu kɔnɔ.

²⁷Kabini Amaziyasi y'a kɔɔ sin Masaba ma, u ye janfa siri a la Zeruzalɛmu, a bolila ka taga Lakisi. U ye mɔgɔw bila ka tugu a kɔ Lakisi, k'a faga o yɔrɔ la.

²⁸U y'a suu ta soo kan ka ta'a don a faaw kɔrɔ Zuda mara dugu kɔnɔ.