Read dyu Masaw ka loon o loon kibaru kitabu filanan 3 Bible Online

Masaw ka loon o loon kibaru kitabu filanan 3 - dyu bible

Masaw ka loon o loon kibaru kitabu filanan 3

¹ Solomani y'a daminɛ ka Masaba ka soo lɔ Zeruzalɛmu, Moriya kulu kan. Masaba tun y'a yɛrɛ yira a facɛ Dawuda la yɔrɔ min la, zebuzicɛ Ɔrinan ka sumangosikɛnɛ kan. Dawuda tun y'o yɔrɔ labɛn.

²A ye lɔli daminɛ a ka masaya saan naaninan, kalo filanan tile filan loon.

³Solomani ye Ala ka boon nin juu jaɲa kɛ mɛtɛrɛ bi saba ye k'a kɔnɔ boɲa kɛ mɛtɛrɛ tan ye.

⁴Soo nin bulonda jaɲa tun ye mɛtɛrɛ tan ye. O ni boon nin kɔnɔ boɲa tun ye kelen ye. Bulonda nin jaɲa sanfɛ tun ye mɛtɛrɛ bi wɔɔrɔ ye. Solomani tun ye sanu yɛrɛ yɛrɛ kɛ k'a kɔnɔna mɔ.

⁵A ye sipɛrɛyiri kɛ ka bonba nin kogo datugu, ka sɔrɔ ka sanu yɛrɛ yɛrɛ la o kan, ka tamarofuraburuw ni jɔrɔkɔw taamasiɲɛw lɛsɛ a kan.

⁶A ye kabakuru sɔngɔgwɛlɛnw kɛ ka soo nin masiri. Sanu nin tun bɔra Pariwayimu.

⁷A ye boon nin mɔ ni sanu ye: a banabiriw fara a bonda lɔgɔ kan, ni kogow ani koonw. A ye *serubɛn jaaw lɛsɛ kogow kan.

⁸ O kɔ, sodennin min tun kɛra Ala ka sigiyɔrɔ ye, a y'o lɔ. Ale jaɲa kɛra mɛtɛrɛ tan ye. O ni boon nin kɔnɔ boɲa tun ye kelen ye. Sodennin nin kɔnɔ boɲa tun ye mɛtɛrɛ tan ye. A ye sanu yɛrɛ yɛrɛ tɔni mugan kɛ k'ale kɔnɔ mɔ.

⁹U tun ye puwɛnti sanulaman minw kɛ ka baara kɛ, olu gwiliya tun sera kilo tilancɛ ma. A ye sanu kɛ ka sanfɛbonw fana kɔnɔ mɔ.

¹⁰ A fana ye lɛsɛli kɛ ka serubɛn jaa fila dilan k'o bila Ala ka sigiyɔrɔ la, k'u mɔ ni sanu ye.

¹¹Serubɛn nunu gaman jaɲa tun ye mɛtɛrɛ tan ye. Serubɛn fɔlɔ gaman kelen tun ye mɛtɛrɛ fila ni tilan ye. Ale tun be maga soo nin kogo la. A gaman dɔ nin fana tun ye mɛtɛrɛ fila ni tilan ye. Ale tun be maga serubɛn filanan gaman kelen na faan dɔ nin na.

¹²Serubɛn filanan fana gaman kelen tun ye mɛtɛrɛ fila ni tilan ye, o tun be maga soo nin kogo faan dɔ la. A gaman dɔ nin fana tun be maga serubɛn fɔlɔ ta la.

¹³Serubɛn nunu gaman jaɲa tun ye mɛtɛrɛ tan ye. U lɔnin tun be u seenw kan, k'u ɲaa sin bonba ma.

¹⁴ A ye jese ɲanaman kɔlɔbolaman, ni wuleman, ani wuleman cɔncɔn kɛ ka bugu cɛtigɛfani dan, ka serubɛn jaaw kɛ a kan.

¹⁵A ye tutunan fila dilan, minw jaɲa tun ye mɛtɛrɛ tan ni wolonwula ye, k'u lɔ Ala ka soo ɲafɛ. Fɛɛn minw tun be u sanfɛ, olu jaɲa sanfɛ tun ye mɛtɛrɛ fila ni tilan ye.

¹⁶A ye jɔrɔkɔw dilan i n'a fɔ minw tun be Ala ka sigiyɔrɔ la, k'o kɛ tutunanw kan. A ye gerenadiyiriden jaa kɛmɛ dilan k'o dulon jɔrɔkɔw la.

¹⁷A ye tutunan nunu tutu Alabatoso ɲafɛla la, kelen tun be kinibolo fɛ, kelen be numanbolo fɛ. Min tun be kinibolo fɛ, a y'ale tɔgɔ la ko Yakin, ka numanbolo ta tɔgɔ la ko Bowazi. [1]