Read dyu Masaw ka loon o loon kibaru kitabu filanan 33 Bible Online

Masaw ka loon o loon kibaru kitabu filanan 33 - dyu bible

Masaw ka loon o loon kibaru kitabu filanan 33

¹Manase tun ye saan tan ni fila sɔrɔ, a sigituma na masaya la. A ye saan bi duuru ni duuru kɛ masaya la Zeruzalɛmu.

² A ye kojugu kɛ Masaba ɲakɔrɔ. Masaba tun ye siya minw gwɛn ka bɔ Isirayɛlidenw ɲa, a ye olu ka landajuguw le ɲɔgɔn kɛ.

³A facɛ Ezekiyasi tun ye sɔnnikɛyɔrɔ minw cɛn, a ye olu lalaga k'o lɔ tugu, ka *Baali sɔnyɔrɔ dɔw lɔ, ka *Asera jaaw tutu. A ye lolow ni kalo, ani tile bato.

⁴ A ye sarakabɔyɔrɔ dɔ wɛrɛw lɔ Masaba ka soo kɔnɔ, Masaba tun ye soo min koo fɔ ko ale tɔgɔ bena to Zeruzalɛmu tuma bɛɛ.

⁵A ye sarakabɔyɔrɔw lɔ lolow ni kalo, ani tile tɔgɔ la Masaba ka soo lukɛnɛ fila nunu kɔnɔ.

⁶A y'a dencɛw jɛni ka joo sɔn n'u ye Bɛninɔmu kɔkɛnɛ na, ka filɛli kɛ, ani ka subagaya kɛ. A tagara sukɔrɔw welebagaw ni lagwɛlikɛlaw fɛ. A ye kojugu caaman kɛ Masaba ɲakɔrɔ k'a dimi.

⁷ Ala tun y'a fɔ Dawuda n'a dencɛ Solomani ye ko ale bena sigi soo min kɔnɔ Zeruzalɛmu, ko ale ye yɔrɔ min woloma k'o kɛ a batoyɔrɔ ye tuma bɛɛ Isirayɛli kɔmɔgɔw bɛɛ cɛma, a tun ye joo min lɛsɛ, a y'o sigi o kɔnɔ.

⁸Ko ni Isirayɛlidenw banbana k'ale k'a fɔta bɛɛ bato sariyaw, n'a ka latigɛtaw, ani a ka ɲinitaw faan fɛ, a tɛmɛna Musa fɛ ka min di u ma, ko ale tena u gwɛn ka bɔ jamana nin kɔnɔ tugu, ale tun y'a latigɛ ka min di u faaw ma.

⁹Nga Manase y'a kɛ Zeruzalɛmukaw ni Zuda mara mɔgɔ tɔw filila, ka kojugu kɛ. Masaba tun ye siya minw halaki ka bɔ Isirayɛlidenw ɲa, olu yɛrɛ tun ma o kojugu nunu ɲɔgɔn kɛ.

¹⁰Masaba kumana Manase n'a ka jama fɛ, nga u ma mɛnni kɛ.

¹¹O la, Masaba y'a kɛ Asiri masacɛ ka kɛlɛkuntigiw nana u kama. U ye Manase minɛ ka nigɛ don a nuun na, k'a siri ni zirajɔrɔkɔw ye ka taga n'a ye Babilɔni.

¹²K'a to dusukasi la, a ye Masaba a ka Ala daali k'a yɛrɛ majigi a faaw ka Ala ɲa kosɔbɛ.

¹³A y'a daali tuma min na, Masaba y'a ka daalili mɛn, ka sɔn a ma. A y'a kɔsegi Zeruzalɛmu a ka masaya la. O tuma na, Manase y'a lɔn ko Masaba le ye Ala ye.

¹⁴O kɔ, kogo min be Dawuda ka ciin laminikogo kɔfɛ, a y'o lɔ kura ye kɔkɛnɛ na, Giyɔn kɔɔ daminɛyɔrɔ la tileben fɛ fɔɔ ka taga se Jigɛminɛyɔrɔ donda la, ka Ofɛli tintin lamini n'a ye. A ye dɔ fara kogo nin kan sanfɛ fɔɔ a tun ka jan kosɔbɛ. A fana ye kɛlɛkuntigiw sigi Zuda mara dugu barikamanw bɛɛ la.

¹⁵A ye siya wɛrɛw ka batofɛnw ni joow ta ka bɔ Masaba ka soo kɔnɔ. A tun ye sarakabɔyɔrɔ minw lɔ Masaba ka soo kulu kan ani Zeruzalɛmu kɔnɔ, a y'o bɛɛ bɔ k'u fili dugu kɔfɛ.

¹⁶A ye Masaba ka sarakabɔyɔrɔ lalaga, ka jɛnɲɔgɔnya sarakaw ni foli taw bɔ a kan, k'a fɔ Zuda mara mɔgɔw ye ko u ka baara kɛ Masaba, Isirayɛli ka Ala ye.

¹⁷O bɛɛ n'a ta, jama tora ka sarakaw bɔ sɔnnikɛyɔrɔw la, k'a sɔrɔ u tun b'o kɛ Masaba u ka Ala dama le ye.

¹⁸Manase ka kɛwali tɔw, n'a ye daalili min kɛ a ka Ala fɛ, ani kiraw ye kuma minw fɔ a ye Masaba, Isirayɛli ka Ala tɔgɔ la, o bɛɛ be sɔrɔ Isirayɛli mara masaw ka loon o loon kibaru sɛbɛ kɔnɔ.

¹⁹A ka daalili, ani Ala y'a jaabi cogo min na, a ye kojugu ni tilenbaliyako minw bɛɛ kɛ, ani ka sɔnnikɛyɔrɔw dilan ka Asera jaaw ni joo wɛrɛw tutu yɔrɔ minw na sanni k'a yɛrɛ majigi, o bɛɛ be sɔrɔ Ozayi ka sɛbɛ kɔnɔ.

²⁰Manase sara, u y'a suu don a ka soo kɔnɔ. O kɔ, a dencɛ Amɔn sigir'a nɔɔ na masaya la.

²¹Amɔn tun ye saan mugan ni fila sɔrɔ, ka sɔrɔ ka sigi masaya la. A ye saan fila kɛ masaya la Zeruzalɛmu.

²²A ye kojugu kɛ Masaba ɲakɔrɔ i n'a fɔ a facɛ Manase. A facɛ tun ye joo minw dilan, a ye olu bɛɛ bato k'u sɔn.

²³A m'a yɛrɛ majigi Masaba ɲakɔrɔ i n'a fɔ a facɛ Manase tun y'a kɛ cogo min na. A ye kojugu kɛ ka tɛmɛ a facɛ kan.

²⁴A ka dakɔrɔsigiw ye janfa siri a la, k'a faga masaso kɔnɔ.

²⁵Nga jamana kɔnɔ mɔgɔw wilila k'a janfabaga nunu bɛɛ faga. O kɔ, u y'a dencɛ Zoziyasi kɛ masacɛ ye a nɔɔ na.