Read dyu Masaw ka loon o loon kibaru kitabu filanan 6 Bible Online

Masaw ka loon o loon kibaru kitabu filanan 6 - dyu bible

Masaw ka loon o loon kibaru kitabu filanan 6

¹O kɔ, Solomani y'a fɔ ko: «Masaba tun ko ale bena to dibi la!

²Nga ne kɔni ye soo ɲanaman lɔ a ye, a bena to yɔrɔ min na kudayi!»

³Masacɛ y'a ɲaa yɛlɛma, ka duba kɛ Isirayɛli jama bɛɛ ye, o y'a sɔrɔ u bɛɛ tun lɔnin be seen kan.

⁴ A y'a fɔ ko: «Masaba, Isirayɛli ka Ala ka tanu, ale min tun y'a daa di ne facɛ Dawuda ma. A ye min fɔ, a fana y'o kɛ. A tun y'a fɔ ko:

⁵‹Kabini loon min na ne ye n ka jama bɔ Ezipiti jamana na, ne ma dugu woloma Isirayɛlidenw ka maraw si la, janko ka soo lɔ n yɛrɛ tɔgɔ la. N ma mɔgɔ woloma fana ko a ka kɛ n ka jama Isirayɛli kuntigi ye.

⁶Nga ne ye Zeruzalɛmu woloma janko ka sigi yen. Ne ye Dawuda fana woloma k'a kɛ n ka jama Isirayɛli ɲamɔgɔ ye.›

⁷Ayiwa, a tun be ne faa Dawuda kɔnɔ ka soo lɔ Masaba, Isirayɛli ka Ala tɔgɔ la.

⁸Nga, Masaba tun y'a fɔ a ye ko: ‹A tun be i kɔnɔ ka soo lɔ ne tɔgɔ la minkɛ, o miiriya ka ɲi.

⁹Nga, ele t'o soo nin lɔbaga ye. I dencɛ, i yɛrɛ woloden le bena soo nin lɔ ne ye.›

¹⁰Masaba y'a fɔ cogo min na, a fana y'a kɛ ten. Ne sigira n facɛ Dawuda nɔɔ na, ka kɛ Isirayɛlidenw ka masacɛ ye i ko a tun y'a fɔ cogo min na. Ne ye soo lɔ Masaba, Isirayɛli ka Ala ye,

¹¹k'a ka layidu taamasiɲɛ kɛsu bila a kɔnɔ, a ka layidu sɛbɛnnin be min kɔnɔ, a tun ye min ta Isirayɛlidenw ye.»

¹²Solomani lɔra Masaba ka sarakabɔyɔrɔ ɲafɛ, Isirayɛli jama bɛɛ ɲafɛ, k'a bolo wili.

¹³A tun ye lɔyɔrɔ dɔ lalaga ni zira ye k'a bila kɛnɛma luu cɛmancɛ la. O jaɲa tun ye mɛtɛrɛ fila ni tilan ye, a boɲa tun ye mɛtɛrɛ fila nin tila ye, a jaɲa sanfɛ, o tun ye mɛtɛrɛ kelen ni tilan ye. A yɛlɛla o kan k'a kunbiri gwan Isirayɛli jama bɛɛ ɲana, k'a bolo wili sanfɛ,

¹⁴k'a fɔ ko: «Masaba, Isirayɛli ka Ala! Batofɛn wɛrɛ si te yen min b'i bɔ. A te sankolo la, a te dugukolo kan. I b'i ka layidu dafa, ka makari i ka baarakɛlaw la, minw jigi b'i kan.

¹⁵I ye layidu min ta i ka baarakɛla, ne facɛ Dawuda ye, i y'o dafa. I ye min fɔ, i y'o kɛ n'i ka sebagaya ye i n'a fɔ a be cogo min na bii.

¹⁶ Sisan Masaba, Isirayɛli ka Ala, i ka janto i ka layidu la i ye min ta i ka baarakɛla, ne facɛ Dawuda ye, k'a fɔ ko kɔmɔgɔ tena fɔn a fɛ i ɲakɔrɔ, min bena kɛ Isirayɛlidenw ka masacɛ ye, ko a daan ye u ka banba ka kɛ i n'a fɔ ale, i ɲakɔrɔ, ka kɛɲɛ n'i ka sariya ye.

¹⁷Ayiwa, sisan, Masaba, Isirayɛli ka Ala, i ye layidu min ta i ka baarakɛla ne facɛ Dawuda ye, o ka kɛ.

¹⁸ «Ala, i bena sɔn ka to adamadenw cɛma dugukolo kan sɔbɛ la wa? I te kun sankolo mumɛ bɛɛ kɔnɔ, sankofɛrɛ ne ka soo lɔnin nin kɔnɔ!

¹⁹O bɛɛ n'a ta Masaba ne ka Ala, mɛnni kɛ i ka baarakɛla ka daalili la, n'a ka makarikan. I ka baarakɛla kasikan n'a ka daalili lamɛn.

²⁰ I hakili to soo nin la suu fara tile kan, i y'a fɔ ko i bena sigi yɔrɔ min na. I ka baarakɛla bena daalili min kɛ o yɔrɔ la, i k'o lamɛn.

²¹N'i ka baarakɛla an'i ka jama Isirayɛli y'u ɲaa sin yɔrɔ nin ma k'i daali, i k'u lamɛn. K'i to i sigiyɔrɔ la sankolo kɔnɔ, i ka mɛnni kɛ ka yafa.

²²«Ni mɔgɔ dɔ y'a tɔɲɔgɔn hakɛ ta, n'u y'a wajibiya ka kali, n'o tigi nana kali sarakabɔyɔrɔ nin ɲafɛ, i ka soo kɔnɔ,

²³k'i to sankolo la, i ka mɛnni kɛ. I ka kiti tigɛ i ka baarakɛlaw ni ɲɔgɔn cɛ, koo cɛnna min fɛ, i k'ale sara, k'a kunko la a yɛrɛ kunna. I ka mɔgɔɲuman ka tiɲɛ d'a ma.

²⁴«N'a kɛra ko i ka jama Isirayɛli juguw sera u kɔrɔ kɛlɛ la, bari u y'i hakɛ ta, n'u nimisara ka kɔsegi i ma ka boɲa la i tɔgɔ kan, ka daalili kɛ i ɲakɔrɔ kosɔbɛ soo nin kɔnɔ,

²⁵k'i to sankolo la, i ka mɛnni kɛ, k'u ka hakɛ yafa, k'u kɔsegi u ka jamana na, e tun ye min di u n'u faaw ma.

²⁶«Ni san lɔra n'a te nana, k'o sababu kɛ u y'i hakɛ ta, n'u y'u ɲaa sin yɔrɔ nin ma k'i daali, ka boɲa la i tɔgɔ kan, n'u nimisara ka faran u ka kojugu la bari i y'u tɔɔrɔ,

²⁷k'i to sankolo la, i ka mɛnni kɛ, k'i ka baarakɛlaw, i ka jama Isirayɛli ka hakɛ yafa. I ka siraɲuman don u seen kɔrɔ u bena min taama, k'a to sanji ka na jamana nin kɔnɔ i ye min d'u ma.

²⁸«Ni kɔngɔ, walima fɔɲɔbana, walima sigɛn, walima sumancɛnbana, walima ni tɔɔnw donna jamana nin kɔnɔ, n'u juguw nana ko u b'u ka duguw dɔ lamini k'u kɛlɛ jamana kɔnɔ, a mana kɛ balawu sifa o sifa ye, ni bana sifa o sifa ye,

²⁹ni mɔgɔ o mɔgɔ y'i daali, i ka jama Isirayɛli cɛma, a mana fɛɛn o fɛɛn daali, a mana kɛ koo o koo ye, n'a y'a ka tɔɔrɔ n'a ka sigɛn faamu k'a bolo wili k'a sin soo nin ma,

³⁰k'i to i sigiyɔrɔ la sankolo la, mɛnni kɛ ka yafa u ma ka kɛɲɛ n'u kelen kelen bɛɛ ka kɛtaw ye, e min b'u bɛɛ kɔnɔnako lɔn. Bari ele kelen le be adamadenw bɛɛ kɔnɔnako lɔn.

³¹O la, k'u to jamana nin kɔnɔ i ye min di an faaw ma, u bena siran i ɲa, k'i ka siraw taama u sii bɛɛ la.

³²«Ni lonan, min te i ka jama Isirayɛli dɔ ye, n'a bɔra jamanajan dɔ la ka na i tɔgɔba kosɔn, n'i ka sebagaya n'i ka fangatigiya kosɔn, n'a nana k'a ɲaa sin soo nin ma k'i daali,

³³k'i to i sigiyɔrɔ la sankolo la, i ka mɛnni kɛ. Lonan nin ye fɛɛn min ɲini i fɛ, i k'o kɛ a ye, janko dugukolo kan siyaw bɛɛ k'i lɔn ani ka siran i ɲa i n'a fɔ i ka jama Isirayɛli, ani k'a lɔn ko ne ye soo min lɔ, ko i tɔgɔ le b'a kan.

³⁴«N'i ka jama bɔra k'u be taga u juguw kɛlɛ, ka kɛɲɛ n'i ka fɔta ye u ye, n'u y'i daali, k'u ɲaa sin i ka dugu wolomanin nin ma, ani ne ye soo min lɔ i ye, k'u ɲaa sin o ma,

³⁵k'i to sankolo la, i k'u ka daalili mɛn, ka see d'u ma.

³⁶«N'u y'i hakɛ ta, bari adamaden si te yen min te hakɛ kɛ, n'i dimina u kɔrɔ k'u don u juguw bolo, olu k'u minɛ ka taga n'u ye jamanajan, walima jamanasurun na,

³⁷k'u to o jamana na, u minɛna ka taga min na, n'u sigira ka miiri ka nimisa ka faran u ka kojugu la, k'i daali ko: ‹An ye kojugu kɛ, an ye kodagabali kɛ, an ma koɲuman kɛ›, i k'u ka daalili mɛn, k'u dɛmɛ.

³⁸K'u to u minɛna ka taga yɔrɔ min na, n'u nimisara ka kɔsegi e ma n'u dusu bɛɛ ye k'i daali, k'u ɲasinnin to jamana nin ma, i ye min di u faaw ma, n'i ka dugu wolomanin ma, ani ne ye soo min lɔ i ye,

³⁹k'i to i sigiyɔrɔ la sankolo la, i k'u ka daalili mɛn, k'u dɛmɛ. I ka jama y'i hakɛ ta, yafa u ma.

⁴⁰Sisan ne ka Ala, i ɲaa yɛlɛnin ka mɛnni kɛ daalili la min kɛra yan yɔrɔ la.

⁴¹ Masa Ala, wili ka na to i ka lafiɲɛyɔrɔ la, e ni kɛsu min ye i ka sebagaya taamasiɲɛ ye. Masa Ala, i ka duba ka kɛ i ka sarakalasebagaw kan u ka kokɛtaw bɛɛ la. I ka mɔgɔw ka nisɔndiya hɛrɛ la.

⁴²Masa Ala, kan'i ka mɔgɔ wolomanin bila. Koɲuman min tun kɛra i ka baarakɛla Dawuda ye, i hakili to o la.»