Read dyu Ɛsidirasi ka kitabu 10 Bible Online

Ɛsidirasi ka kitabu 10 - dyu bible

Ɛsidirasi ka kitabu 10

¹Ɛsidirasi y'a kunbiri gwan Ala ka soo ɲafɛ ka to ka kasi n'a b'u ka kojuguw fɔra, ka Ala daali. O waati la, Isirayɛliden caaman nana ɲɔgɔn lajɛn a gɛrɛfɛ, cɛɛw ni musow ani denmisɛnw. U tun be kasira kosɔbɛ.

²O la, Elamu kɔmɔgɔ Yeyɛli dencɛ Sekaniya ye kuma ta k'a fɔ Ɛsidirasi ye ko: «An ye jamana nin kɔnɔ siya wɛrɛw musow furu ka kojugu kɛ an ka Ala la. O t'a bali ko Isirayɛlidenw ta te se ka ɲa tugu do.

³Sisan an ka layidu ta an ka Ala ye k'a fɔ ko an bena muso nunu bɛɛ n'o deenw gwɛn, ka kɛɲɛ n'i ka ladili ye, ani mɔgɔ wɛrɛw ta, minw bɛɛ be siran an ka Ala ka sariya ɲa. O ka kɛ ka kɛɲɛ ni sariya ye.

⁴Wili, koo nin kɔni y'i kunko ye. An b'i kɔ, i jaa gwɛlɛya ka dɔ kɛ.»

⁵O tuma na, Ɛsidirasi wilila k'a ɲini sarakalasebagaw kuntigiw ni Levi kɔmɔgɔw, ani Isirayɛlidenw bɛɛ fɛ k'u ka kali ka kɛɲɛ n'o kuma ye k'u bena o kɛ. U kalila.

⁶O kɔ, Ɛsidirasi bɔra Ala ka soo daa la, ka taga don Eliyasibu dencɛ Yowanan ka soo kɔnɔ. K'a to o yɔrɔ la, a ma sɔn ka dumuni kɛ, a ma jii min, bari a hakili tun cɛnnin lo mɔgɔ minw bɔra jɔnya la, olu ka kojuguw kosɔn.

⁷U ye cii fɔ Zeruzalɛmu dugu kɔnɔ ani Zuda mara kɔnɔ ko mɔgɔ minw bɔra jɔnya la ka na, k'olu bɛɛ ka ɲɔgɔn sɔrɔ Zeruzalɛmu.

⁸Ko ni mɔgɔ o mɔgɔ ma na yanni tile saba kɔnɔ, k'o tigi bololafɛnw bɛɛ bena bɔsi ka bila Ala ye. Mɔgɔ minw bɔra jɔnya la ka na, a tigi niin bena bɔ olu ka koo la fana, ka kɛɲɛ ni ɲamɔgɔw ni cɛkɔrɔbaw ka latigɛli ye.

⁹Zuda kɔmɔgɔw ni Bɛnzamɛn kɔmɔgɔ cɛmanw bɛɛ nana Zeruzalɛmu o tile saba nin kɔnɔ. O tun bɛnna saan kalo kɔnɔntɔnnan tile mugannan loon ma. Jama bɛɛ tun be Ala ka soo ɲafɛ. U tun be yɛrɛyɛrɛla koo nin siranya kosɔn ani sanji fana kosɔn, min tun be benna.

¹⁰Sarakalasebaga Ɛsidirasi wilila k'a fɔ u ye ko: «Aw ye kojugu kɛ bari aw ye siya wɛrɛw ka sunguruw furu, ka dɔ fara Isirayɛlidenw ka jalakiko kan.

¹¹Sisan aw k'o kojugu nunu fɔ Masaba, aw faaw ka Ala ye, ani k'a sago kɛ. Aw ka faran ka bɔ jamana nin kɔnɔ siyaw, n'u ka musow la.»

¹²Jama bɛɛ y'a fɔ belebele ko: «Tiɲɛ b'i fɛ! An ka kan k'i ka fɔta kɛ.

¹³Nga jama ka ca, samiɲa fana lo, mɔgɔ te se ka to kɛnɛma. Hali n'o yɛrɛ tɛ, baara nin te tile kelen baara ye, walima tile fila, bari mɔgɔ caaman b'an cɛma minw ye hakɛ nin kɛ.

¹⁴O la do, an ɲamɔgɔw ka to yan, jama tɔgɔ la. O kɔ, mɔgɔ minw ye siya wɛrɛ musow furu k'o to dugu o dugu kɔnɔ, olu ka kɔsegi ka na n'u ka cɛkɔrɔbaw n'u ka kititigɛlaw ye waati la min bena latigɛ u ye, fɔɔ ka taga se an ka Ala ka dimi bannin ma o la an faan fɛ.»

¹⁵Azayɛli dencɛ Yonatan ni Tikiwa dencɛ Yazeya, dama le tun y'o miiriya nin sɔsɔ. O kɔ, Mesulamu ni Levi kɔmɔgɔ Sabitayi farala u kan.

¹⁶Koo min fɔra, mɔgɔ minw bɔra jɔnya la ka na, olu sɔnna k'o lo kɛ. U ye sarakalasebaga Ɛsidirasi woloma, [1] ani gwatigiw, ka kɛɲɛ n'u ka fadenya ye. U tun ye u kelen kelen bɛɛ wele u tɔgɔw ma, olu sigira janko u k'o koo ɲanabɔ saan kalo tannan tile fɔlɔ loon.

¹⁷Mɔgɔ minw tun ye siya wɛrɛ musow furu, u tilara olu ka koo la yanni sankura kalo fɔlɔ tile fɔlɔ loon ka se.

¹⁸Sarakalasebagaw cɛma, mɔgɔ minw tun ye siya wɛrɛ musow furu, olu ye: Yozadaki dencɛ Zozuwe n'a badenw, olu deenw cɛma, Maaziya ni Eliyezɛri ni Yaribu ani Gedaliya.

¹⁹Olu kalila k'a fɔ ko u bena u ka musow bila ani ka sagajigi bɔ saraka ye u ka kojugu kosɔn.

²⁰Imɛri kɔmɔgɔw cɛma, minw ye siya wɛrɛ musow furu, o tun ye Anani ni Zebadiya ye.

²¹Arimu kɔmɔgɔw cɛma fana, o tun ye Maaziya ni Eliya ni Semaya ani Yeyɛli ni Uziya ye.

²²Pasewuri kɔmɔgɔw cɛma, o tun ye Eliyoyenayi, ni Maaziya, ni Isimayɛli, ani Netanɛli, ni Yozabadi, ni Eleyaza ye.

²³Levi kɔmɔgɔw cɛma, o tun ye Yozabadi, ni Simeyi, ani Kelaya n'u b'a wele fana ko Kelita, ani Petaya ni Yewuda ani Eliyezɛri ye.

²⁴Dɔnkililabagaw cɛma, o tun ye Eliyasibu ye. Daa kɔlɔsibagaw cɛma, o tun ye Salumu ni Tɛlɛmu ani Uri ye.

²⁵Isirayɛliden tɔw cɛma, Parewɔsi kɔmɔgɔw tun ye Aramiya ni Yiziya ni Malikiya, ani Miyamin, ni Eleyazari ni Malikiya ani Benaya ye.

²⁶Elamu kɔmɔgɔw cɛma, o tun ye Mataniya ni Zakari ni Yeyɛli ni Abidi, ani Yeremɔti, ni Eliya ye.

²⁷Zatu kɔmɔgɔw cɛma, o tun ye Eliyoyenayi ni Eliyasibu ani Mataniya, ni Yeremɔti ani Zabadi ni Aziza ye.

²⁸Bebayi kɔmɔgɔw cɛma, o tun ye Yowanan ni Ananiya, ani Zabayi, ni Atilayi ye.

²⁹Bani kɔmɔgɔw cɛma, o tun ye Mesulamu ni Maluki ani Adaya, ni Yasubu ni Seyali ani Yeremɔti ye.

³⁰Paati Mowabu kɔmɔgɔw cɛma, o tun ye Adina ni Kelali ani Benaya, ni Maaziya ani Mataniya ni Besalɛli, ni Binuwi ani Manase ye.

³¹Arimu kɔmɔgɔw cɛma, o tun ye Eliyezɛri, ni Yisiya, ni Malikiya ani Semaya, ni Simeyɔn,

³²ani Bɛnzamɛn ni Maluki, ani Semariya ye.

³³Asumu kɔmɔgɔw cɛma, o tun ye Matenayi ni Matata ani Zabadi, ni Elifɛlɛti ni Yeremayi ni Manase ani Simeyi ye.

³⁴Bani kɔmɔgɔw cɛma, o tun ye Maadayi ni Amuramu ani Uyɛli,

³⁵ni Benaya, ni Bediya ani Keluyi,

³⁶ni Waniya, ani Meremɔti, ni Eliyasibu,

³⁷ni Mataniya ani Matenayi, ni Yaazayi,

³⁸ni Bani ani Binuwi ni Simeyi,

³⁹ani Selemiya ni Natan ani Adaya,

⁴⁰ni Makinadebayi ani Sasayi ni Sarayi,

⁴¹ni Azarɛli ani Selemiyawu ni Semariya,

⁴²ani Salumu ni Amariya, ani Yusufu ye.

⁴³Nebo kɔmɔgɔw cɛma, o tun ye Yeyɛli ni Matitiya, ni Zabadi ani Zebina ni Yadayi ani Yowɛli ni Benaya ye.

⁴⁴Olu bɛɛ tun ye siya wɛrɛ musow furu, u dɔw tun ye deenw sɔrɔ u fɛ fana.