Read dyu Ɛsidirasi ka kitabu 6 Bible Online

Ɛsidirasi ka kitabu 6 - dyu bible

Ɛsidirasi ka kitabu 6

¹Masacɛ Dariyusi ye sira di k'u ka ɲinini kɛ sɛbɛw kɔnɔ minw bilanin tun be nafolo marayɔrɔ la Babilɔni.

²U tagara sɛbɛ dɔ ye Ɛkibatani, Mɛdi mara la. A tun sɛbɛnnin be o kɔnɔ ko:

³«Masacɛ Sirusi ka masaya saan fɔlɔ la, a ye sira di ko Ala ka soo ka lalaga ka lɔ Zeruzalɛmu, ka kɛ sarakabɔyɔrɔ ye, a tun be yɔrɔ min na ka kɔrɔ. A jaɲa sanfɛ ka kɛ mɛtɛrɛ bi saba ye, a kɔnɔ boɲa ka kɛ mɛtɛrɛ bi saba ye fana.

⁴A ka lɔ ni kabakuru lɛsɛninw ye, sira saba, ni lɔgɔ sira kelen. Masacɛ le bena lɔ n'o musaka ye.

⁵O kɔ, Nabukodonozɔri tun ye Ala ka soo kɔnɔ minan sanulamanw ni warigwɛlaman minw ta Zeruzalɛmu ka na n'u ye Babilɔni, olu ka kan ka di u ka kɔsegi ka taga n'u ye Zeruzalɛmu k'u bila u bilayɔrɔ la Ala ka soo kɔnɔ.»

⁶O la, masacɛ ko: «Ne ka lasigiden Tatinayi e min be baji kɔfɛ, ani Setari Bozinayi n'aw tɔɲɔgɔn minw be Afarisaki baji kɔfɛ, aw kana gwɛrɛ o yɔrɔ la.

⁷Aw kan'u bali Ala ka soo nin lɔbaara la. N ka lasigiden min be zuwifuw kunna, ale ni zuwifuw ka cɛkɔrɔbaw ka soo nin lalaga k'a lɔ a lɔyɔrɔkɔrɔ la yen.

⁸N be baara min kalifara aw ma, n'aw ka kan k'o kɛ cɛkɔrɔba nunu ye Ala ka soo nin lɔbaara la, o filɛ nin ye. Aw bena wari min sɔrɔ lɛnpo la baji kɔfɛmara kɔnɔ n'o kɛra masacɛ ta ye, aw k'o di mɔgɔ nunu ma janko baara kana lɔ.

⁹U mako be se fɛɛn minw ma ka saraka jɛnita bɔ Sankolotigi Ala ye, i n'a fɔ turaw kɛɲɛninw, ni sagajigiw ani sagadenw, ni suman ni kɔgɔ ani duvɛn ni tulu, o bɛɛ, ni Zeruzalɛmu sarakalasebagaw ye olu ɲini aw fɛ, aw k'o di u ma loon o loon, u kana fɔn o la,

¹⁰janko u ka se ka to ka sarakaw bɔ Sankolotigi Ala ye minw ka d'a ye, ani k'a daali masacɛ n'a deenw ka hɛrɛ kosɔn.

¹¹Mɔgɔ min bena ban n ka kuma nunu na, ne be sariya nin le sigi olu kama: u ben'a ka soo kɔnɔ lɔgɔ dɔ bɔ k'a dulon o kan, [1] ani a ka soo bena yɛlɛma ka kɛ ɲamabɔnyɔrɔ ye.

¹²Masacɛw, walima siya minw b'a fɛ ka sariya nin cɛn, walima ka Ala ka soo nin ci Zeruzalɛmu, Ala min b'a yɛrɛ yira o yɔrɔ la, ale ka olu halaki. Ne Dariyusi le y'o sariya sigi. U k'a kɛ ka kɛɲɛ n'a cogo ye.»

¹³Masacɛ ka lasigiden Tatinayi, ale min be Efarati baji kɔfɛ mara la, ni Setari Bozinayi, ani u tɔɲɔgɔnw ye masacɛ Dariyusi ka cii kɛ a cogo la.

¹⁴ Zuwifuw ka cɛkɔrɔbaw tagara ɲa ka soo nin lɔ ka kɛɲɛ ni kira Aze ni Ido dencɛ Zakari ka kuma ye. U ye soo nin lɔ ka ban ka kɛɲɛ ni Isirayɛli ka Ala ka fɔta ye, ani Pɛrɛsi masacɛ Sirusi ni Dariyusi ani Aritasɛrisɛsi ka fɔtaw ye.

¹⁵Soo nin baara bɛɛ banna masacɛ Dariyusi ka masaya saan wɔɔrɔnan na *Adari kalo tile sabanan loon na.

¹⁶Sarakalasebagaw ni Levi kɔmɔgɔ tɔw ni mɔgɔkɔrɔba minw bɔra jɔnya la ka na, Isirayɛlidenw nunu ye Ala ka soo nin kalifa a ma ni nisɔndiya ye.

¹⁷Soo nin kalifako la Ala ma, u ye tura kɛmɛ bɔ saraka ye, ni sagajigi kɛmɛ fila ni sagaden kɛmɛ naani, ani ka bakɔrɔnin tan ni fila kɛ saraka ye Isirayɛli deen tan ni fila kɔmɔgɔw bɛɛ tɔgɔ la u ka hakɛ kosɔn.

¹⁸U ye sarakalasebagaw sigi ka kɛɲɛ n'u lɔyɔrɔ ye, ka Levi kɔmɔgɔw fana tilantilan ka kɛɲɛ n'u ka jɛnkuluw ye, u ka se ka baara kɛ Ala ye Zeruzalɛmu, i n'a fɔ a sɛbɛnnin be cogo min na Musa ka kitabu kɔnɔ.

¹⁹ Mɔgɔ minw bɔra jɔnya la ka na, olu ye *Hɔrɔnya ɲanagwɛ kɛ saan kalo fɔlɔ tile tan ni naaninan loon.

²⁰Sarakalasebagaw ni Levi kɔmɔgɔ tɔw ye ɲɔgɔn lajɛn k'u yɛrɛ saniya. A kɛra ten, u bɛɛ tun saniyara. Mɔgɔ minw bɔra jɔnya la ka na, u ye olu ka Hɔrɔnya ɲanagwɛ saraka bɔ, n'o balima sarakalasebagaw ta, ani olu yɛrɛ ta.

²¹Isirayɛliden minw bɔra jɔnya la ka na, olu ye saraka nin dumu ni minw bɛɛ tun ye siya wɛrɛw ka konɔgɔninw dabila, ka fara u kan ka to ka Masaba, Isirayɛli ka Ala bato.

²²U ye *Buru funubali ɲanagwɛ kɛ ni nisɔndiya ye tile wolonwula kɔnɔ, bari Masaba tun y'u koo diya masacɛ ye [2] fɔɔ a y'u dɛmɛ ka Ala ka soo lɔ, Isirayɛli ka Ala. A kɛra ten, Masaba y'u nisɔn diya kosɔbɛ.