Read dyu Neemi ka kitabu 1 Bible Online

Neemi ka kitabu 1 - dyu bible

Neemi ka kitabu 1

¹Akaliya dencɛ Neemi ka kuma ye nin ye. Ka ne to Suzi dugu kɔnɔ min ye masadugu ye, masacɛ Aritasɛrisɛsi ka masaya saan mugannan na, *Kisilewu kalo la,

²ne baden kelen nana, ka bɔ Zuda mara la. O tun ye Anani ye, ale ni mɔgɔ dɔw. Ne y'u ɲininga Zeruzalɛmu koo la, ani zuwifuw ka koo la fana, minw bɔra jɔnya la ka taga yen.

³U ye ne jaabi ko: «Mɔgɔ minw bɔra jɔnya la ka taga, n'u be mara nin kɔnɔ, n'u sigɛnnin be kosɔbɛ, maloya b'u kan, Zeruzalɛmu kogo benna, dugu donda koonw jɛnina.»

⁴Ne y'o kuma mɛn tuma min na, ne sigira ka kasi. Ne ye tile damani kɛ o dusukasi la. Ne tun ye suun don ka Sankolotigi Ala daali ko:

⁵«Masa Ala, e min ye Sankolotigi ye, e ka bon, mɔgɔ ka kan ka siran e ɲa, i koo ka di mɔgɔ minw ye n'u b'i ka sariya bato, i be koɲuman kɛ olu ye k'i ka layidu dafa.

⁶E k'an filɛ k'i tulo malɔ, ka mɛnni kɛ i ka baarakɛla ka daali la, ne be min kɛ suu fara tile kan, Isirayɛlidenw kosɔn minw ye i ka baarakɛlaw ye. An Isirayɛlidenw ye kojugu minw kɛ k'i hakɛ ta, ne be olu yafa daali i fɛ, ne ni n bɛmaw ye minw kɛ.

⁷An y'i hakɛ ta, tiɲɛ na, an ma i ka sariyaw, n'i ka landaw, n'i ka kuma bato, i tun ye min d'i ka baarakɛla Musa ma.

⁸ E k'i hakili to kuma nin na, e tun ye min fɔ i ka baarakɛla Musa ye ko a k'a fɔ i tɔgɔ la. I tun ko: ‹N'aw ma tilen, ne b'aw jɛnsɛn siya wɛrɛw cɛma.

⁹ Nga n'aw kɔsegira ka nimisa, ani ka ne ka sariyaw bato, hali n'aw tun jɛnsɛnna ka taga yɔrɔ o yɔrɔ diɲɛ na, ne bena aw minɛ ka bɔ o yɔrɔ la, ka na aw lajɛn yan, ne ye yɔrɔ min woloma k'a kɛ n sigiyɔrɔ ye.›

¹⁰Masaba, u kɛra ele ka baaradenw, n'i ka jama ye, ele le y'u kunmabɔ i ka sebagaya la n'i bolo barikaman ye.

¹¹Ee! Matigi, mɛnni kɛ i ka baarakɛla ka daali la, n'i ka baarakɛla tɔw ta fana na, a ka di minw ye k'i tɔgɔ boɲa! I ka baarakɛla dɛmɛ bii k'a koo diya cɛɛ nin ye.» O waati la, ne le tun be to ka masacɛ ka minnifɛn d'a ma.