Read dyu Neemi ka kitabu 13 Bible Online

Neemi ka kitabu 13 - dyu bible

Neemi ka kitabu 13

¹ U ye Musa ka kitabu yɔrɔ dɔ kalan o waati la jama ɲana, u y'a ye ko a fɔra o yɔrɔ la ko amoniw ni mowabuw tun man kan k'o niin don Ala ka jama cɛma abada.

² Ko bari u tun ma sɔn ka Isirayɛlidenw kunbɛn ni dumuni ani jii ye, ani fana k'u tun ye wari di Balamu ma janko a ka na Isirayɛlidenw danga. Nga an ka Ala ma sɔn, a y'o danga nin yɛlɛma k'o kɛ duba ye.

³U ye sariya kuma mɛn ka ban tuma min na, u ye lonanw bɛɛ faran ka bɔ Isirayɛlidenw na.

⁴O y'a sɔrɔ sarakalasebaga Eliyasibu tun wolomana ka kɛ an ka Ala ka soo kɔnɔ minanmarayɔrɔ kuntigi ye. Tobiya baden tun lo,

⁵a tun ye bonba dɔ di Tobiya ma, u tun be to ka suman sarakaw bila min kɔnɔ fɔlɔfɔlɔ, ani wusulan, ni Ala ka soo kɔnɔ baarakɛminanw, ani sumanw jaka ni duvɛnkɛnɛ ani tulu taw fana, minw koo tun latigɛra Levi kɔmɔgɔw ni dɔnkilibagaw ani daa kɔlɔsibagaw kosɔn, ani fɛɛn minw tun latigɛra sarakalasebagaw kosɔn.

⁶O kɛwaati la, ne tun te Zeruzalɛmu, bari Babilɔni masacɛ Aritasɛrisɛsi ka masaya saan bi saba ni filanan na, ne tun kɔsegira ka taga masacɛ fɛ. O kɔ, ne ye sira daali a fɛ,

⁷ne kɔsegira ka na Zeruzalɛmu. Eliyasibu tun ye kojugu min kɛ, ne y'o ye, a tun ye boon dɔ di Tobiya ma Ala ka soo luu kɔnɔ.

⁸N dimina kosɔbɛ. N ye Tobiya ka minanw bɛɛ ta k'o bɛɛ fili kɛnɛma.

⁹O kɔ, n y'a fɔ k'u ka boon nunu saniya, n segira ka Ala ka soo kɔnɔ baarakɛminanw, ni suman sarakaw, ani wusulan bila yen.

¹⁰ N fana tun y'a mɛn ko Levi kɔmɔgɔw niyɔrɔ tun te dira u ma, o la Levi kɔmɔgɔw ni dɔnkililabaga minw tun be baara kɛra Ala ka soo kɔnɔ, olu bɛɛ tun bolila ka taga u ka yɔrɔ la.

¹¹N ye kititigɛlaw jalaki k'a fɔ u ye ko: «Mun na Ala ka soo kɔnɔ baarakɛlaw bɛɛ bolila ka soo nin to ten?» O kɔ, ne ye Levi kɔmɔgɔw ni dɔnkililabagaw lajɛn k'u don u ka baara la tugu.

¹² O kɔ, Zuda mara mɔgɔw bɛɛ nana n'u ka suman ni duvɛnkɛnɛ ani tulu jaka ye k'u bila bondow kɔnɔ.

¹³O kɔ, n ye bondo nunu kalifa sarakalasebaga Selemiya ni sariya karamɔgɔ Sadɔki ani Levi kɔmɔgɔ Pedaya ma, n fana ye Mataniya deen Zakuri dencɛ Hanan fara u kan, bari olu tɔgɔɲuman tun bɔra kosɔbɛ. Olu wolomana janko ka fɛɛn nunu tilan u badenw cɛ.

¹⁴N ka Ala, i k'i hakili to ne la, o koo nunu kama. Ne ye min kɛ kantigiya la janko i ka soo n'a kɔnɔ batoli ka ɲa, i kana ɲinɛ n'o ye.

¹⁵ O tile fila nin na, ne ye mɔgɔ dɔw ye Zuda mara la, minw b'u ka *ɛrɛzɛn nɔɔnina lafiɲɛlon na, ani k'u ta faliw kan ni duvɛn ani ɛrɛzɛnw, ni toro ani fɛɛn bɛɛ. U tun b'u tara ka na n'u ye Zeruzalɛmu lafiɲɛlon na. N y'u ladi u feerelon na.

¹⁶Tirika minw tun siginin be Zeruzalɛmu, olu tun be to ka na ni jigɛw ye ani feerefɛn sifa bɛɛ ye k'o feere Zuda mara mɔgɔw ma lafiɲɛlon na Zeruzalɛmu dugu kɔnɔ.

¹⁷O la, n ye Zuda mara mɔgɔw ɲamɔgɔw jalaki k'a fɔ u ye ko: «O ye mun kojugu sifa ye aw be min kɛra ka lafiɲɛlon cɛn ten?

¹⁸Aw faaw tun y'o koo ɲɔgɔn le kɛ, tɔɔrɔ min bɛɛ sera an ma, ni dugu nin ma, an ka Ala y'o kɛ u ka kojugu nunu le kosɔn. Aw fana b'a la tugu ka to ka lafiɲɛlon cɛn, ka Ala dusu dimi Isirayɛlidenw kɔrɔ.»

¹⁹O kɔ, n y'a latigɛ ko Zeruzalɛmu dugu dondaw ka kan ka tugu yanni lafiɲɛlon ka se, u k'u tugu tilekun dontuma na, ani lafiɲɛlon tɛmɛnin kɔ, u k'u dayɛlɛ. N fana ye n ka baarakɛla dɔw bila daaw la janko ka mɔgɔw bali ka don ni doni ye dugu kɔnɔ lafiɲɛlon na.

²⁰Fɛɛn sifa bɛɛ sanbagaw ni feerelikɛlaw tun sira Zeruzalɛmu dugu kɔfɛ siɲɛ kelen, walima siɲɛ fila.

²¹N y'u lasɔmi ko: «Mun na aw be na to sufɛ kogo gɛrɛfɛ? N'aw y'o ɲɔgɔn kɛ tugu, ne ben'a to u b'aw minɛ.» O kɔ, u ma sɔn ka na lafiɲɛlon na tugu.

²²O kɔ, n y'a fɔ Levi kɔmɔgɔw ye k'olu k'u yɛrɛ saniya ka na lɔ daaw la ka kɔlɔsili kɛ, janko lafiɲɛlon ka se ka saniya. Ne ka Ala, i hakili to ne la o koo nunu kosɔn, i ka makari kosɔn i ka ne mara.

²³ O waati kelen na fana, n tun ye zuwifu dɔw ye minw tun ye Asidɔdikaw ni amonimusow ani mowabumusow furu.

²⁴U deenw tilancɛ tun be to ka Asidɔdikaw ka kaan le fɔ, u tun te se ka zuwifuw ka kaan fɔ, u tun be siya wɛrɛw ka kaan le fɔ dama.

²⁵Ne y'u jalaki, k'u danga, n yɛrɛ ye dɔw bugɔ, ka dɔw kunsigi bɔnbɔn yɛrɛ. N y'a kɛ u kalila ni Ala tɔgɔ ye k'u tena sɔn u denmusow be furu siya wɛrɛ nunu dencɛw fɛ, ani k'u tena sɔn fana ka siya wɛrɛ nunu denmusow furu n'u dencɛw fana.

²⁶ N ko: «O ɲɔgɔn le ma kɛ sababu ye Isirayɛlidenw ka masacɛ Solomani ye kojugu kɛ wa? Siya bɛɛ ka masacɛw cɛma, a ɲɔgɔn tun te yen, a koo tun ka di a ka Ala ye, a y'a kɛ Isirayɛlidenw bɛɛ ka masacɛ ye. O bɛɛ n'a ta, siya wɛrɛw ka musow y'a nigɛnigɛ k'a bila kojugu la.

²⁷An fana ka kan k'o kojuguba nin ɲɔgɔn koo mɛn aw cɛma wa? Ko aw ye kojugu kɛ ka siya wɛrɛ musow furu wa?»

²⁸ Sarakalasebagaw kuntigi Eliyasibu deen Yoyada dencɛw dɔ tun kɛra Oronayimuka Sanbala birancɛ ye. O la, ne y'ale gwɛn ka taga yɔrɔjan.

²⁹Ne ka Ala, i k'i hakili to u la, bari u y'i ka baara n'i ka bɛɛn dɔgɔya, i ye min kɛ ni sarakalasebagaw ni Levi kɔmɔgɔ tɔw ye.

³⁰N y'a kɛ u ye lonanw bɛɛ bɔ u cɛma, ani sarakalasebagaw ni Levi kɔmɔgɔ tɔw tun ka kan ka baara minw kɛ, n y'u bila o la.

³¹Mɔgɔw ka kan ka na ni lɔgɔ minw ye k'u di Ala ka baara kama a waati latigɛnin na, ani sɛnɛfɛn deen fɔlɔw, n ye olu koo bila seen kan tugu. Ne ka Ala, i k'i hakili to ne la ka hɛrɛ kɛ ne ye.