Read dyu Neemi ka kitabu 2 Bible Online

Neemi ka kitabu 2 - dyu bible

Neemi ka kitabu 2

¹Masacɛ Aritasɛrisɛsi ka masaya saan mugannan na, *Nisan kalo la, u nana duvɛn bila ne masacɛ ɲakɔrɔ. Ne y'a ta k'a d'a ma. O y'a sɔrɔ ne ɲaa tun kumunin bɛ kosɔbɛ, n tun ma deli ka min ɲɔgɔn kɛ ka ye a ɲakɔrɔ.

²O la, masacɛ y'a fɔ ne ye ko mun na n ɲaa kumunin be ten. Ko n fana do ka kɛnɛ, k'o te foyi ye fɔɔ miirikojugu. O waati la, ne tun siranna kosɔbɛ.

³ N ye masacɛ jaabi ko: «Matigi, e ka sii sɔrɔ! Ne faaw kaburuw be dugu min kɔnɔ, ale cɛnna, tasuma y'a donda koonw jɛni, n bena kɛ di ni n ɲaa te kumu?»

⁴O kɔ, masacɛ ye n ɲininga ko n be mun le fɛ. Ne ye Sankolotigi Ala daali o yɔrɔnin bɛɛ.

⁵N ye masacɛ jaabi ko n'a be sɔn, n'a ka baaraden koo diyar'a ye, a ka sira di n ma n ka taga Zuda mara la, n faaw kaburuw be dugu min kɔnɔ, n ka se k'o lalaga k'a lɔ.

⁶O y'a sɔrɔ masacɛ ka muso tun siginin be a gɛrɛfɛ. A y'a fɔ ne ye ko: «I bena mɛn o taama na wa? I bena segi ka na waati jumɛn?» A diyara masacɛ ye, a ye sira di ne ma, n ye waati dɔ fɔ a ye.

⁷O kɔ, n y'a fɔ masacɛ ye ko: «Ni masacɛ be sɔn, u ka batakiw di ne ma, n be taga o di a ka lasigidenw ma, minw be Efarati baji kɔfɛ maraw la, janko olu ka n to n be tɛmɛ ka don Zuda mara la.»

⁸N y'a fɔ fana k'u ka bataki dɔ di fana n bena min di jamana kɔnɔ yiriw kɔlɔsibaga Azafu ma, janko ale ka se ka yiriw di n ma, an bena minw lɛsɛ ka kɛ koonw ye k'u don masadugu dondaw la, Ala ka soo gɛrɛfɛ. Ani ka dɔw kɛ dugu nin laminikogo la ani ne yɛrɛ ka boon na fana. Masacɛ ye bataki nunu di n ma, bari ne ka Ala min ka ɲi tun be n fɛ.

⁹N tagara se ka bataki nunu di lasigiden nunu ma, minw be baa kɔfɛ. Masacɛ tun ye kɛlɛdenw ka kuntigi dɔw, ni sotigi dɔw fara n kan olu ka n bila sira.

¹⁰Sanbala ka bɔ Oronayimu, ale ni Tobiya, min ye amoni ye n'a be masacɛ ka baara la, olu y'a mɛn tuma min na ko mɔgɔ dɔ be yen min be Isirayɛlidenw ka hɛrɛ ɲini dɔrɔn, o ma diya u ye fewu.

¹¹Ne sera Zeruzalɛmu tuma min na, ne lafiɲɛna tile saba.

¹²O kɔ, ne wilila sufɛ, ne ni mɔgɔ damani dɔw. O y'a sɔrɔ n ka Ala tun ye koo min miiri don ne dusu la ka n'o kɛ Zeruzalɛmu, ne tun m'o fɔ mɔgɔ si ye fɔlɔ. Ne tun ma bɔ ni begɛn wɛrɛ ye fɔɔ n tun yɛlɛla min kan.

¹³Sufɛ, ne bɔra ni daa ye min be kɔkɛnɛ faan fɛ, ka tɛmɛ ka taga Sogojugu ka kɔɔ faan fɛ ani Ɲamabɔnyɔrɔ faan daa fɛ, ne tun be Zeruzalɛmu laminikogo cɛnni filɛra ka ɲa, n'a koon jɛnininw.

¹⁴Ne tagara tɛmɛ daa min be jii bɔyɔrɔ faan fɛ, ani masacɛ ka dalan faan fɛ. O yɔrɔ la, tɛmɛyɔrɔ tun ma sɔrɔ n ka begɛn fɛ.

¹⁵O la, ne taamana kɔɔ kɔnɔ o yɔrɔ la sufɛ ka to ka kogo nin kɔlɔsi. O kɔ, n kɔsegira ka taga don ni kɔkɛnɛ daa ye.

¹⁶Ɲamɔgɔw tun m'a lɔn ne tagara yɔrɔ min na, ani n be fɛɛn min kɛra. Fɔɔ ka na se o waati ma, n tun ma sɔn ka foyi fɔ zuwifuw ye fɔlɔ ani sarakalasebagaw, ni ɲamɔgɔbabaw, ani kititigɛlaw ye, hali mɔgɔ tɔ minw tun bena janto o baara nunu na.

¹⁷N y'a fɔ u ye ko: «Gwɛlɛya min b'an kan, aw ɲaa b'o la kɛ! Zeruzalɛmu dugu cɛnna, tasuma y'a donda koonw jɛni. Aw ye wili an b'a laminikogo lalaga k'a lɔ, o la, an ka maloya bena ban.»

¹⁸O kɔ, ne ka Ala tora ni ne ye cogo min na, ani masacɛ tun ye kuma min fɔ n ye, ne y'o lakali u ye. O la, u y'a fɔ ko: «An ka wili k'a lɔ!» A kɛra ten, u jijara o baaraɲuman nin na.

¹⁹Sanbala ka bɔ Oronayimu, ni Tobiya, min ye amoni ye n'a be masacɛ ka baara la, ani arabucɛ Gɛsɛmu, olu y'an koo mɛn dɔrɔn, u yɛlɛla an ma, k'an lɔgɔbɔ. U y'a fɔ ko: «Aw be mun le kɛra yan? Aw be murutira masacɛ ma wa?»

²⁰Ne y'u jaabi ko: «Sankolotigi Ala le bena an dɛmɛ an ka baara be ɲa. An minw y'a ka baarakɛlaw ye, an bena wili ka baara nin kɛ. Aw kɔni, niyɔrɔ si t'aw fɛ yan. Aw fana tena kuntigiya sɔrɔ yan. Aw koo fana kana fɔ Zeruzalɛmu.»