Read dyu Neemi ka kitabu 3 Bible Online

Neemi ka kitabu 3 - dyu bible

Neemi ka kitabu 3

¹Sarakalasebagaw kuntigi Eliyasibu n'a tɔɲɔgɔn sarakalasebagaw wilila ka Sagaw ka donda lɔ. U y'o kalifa Masaba ma, o kɔ u ye koonw don. U ye kogo lɔ fɔɔ ka na se Sangaso yɔrɔ la min be wele ko Meya. U y'o kalifa Ala ma fana, ka tɛmɛ ka taga se fɔɔ Ananeyɛli sangaso yɔrɔ ma.

²Zerikokaw tun be lɔli kɛra Eliyasibu gɛrɛfɛ, Imuri dencɛ Zakuri tun be lɔli kɛra ka tugu Zerikokaw kɔ.

³Asena deenw ye Jigɛminɛyɔrɔ donda lɔ, k'a kuun biri, ka koonw don a la, k'a sɔgɔnanw don.

⁴Akɔsi deen Uriya dencɛ Meremɔti tun be kogo lalagara Asena deenw gɛrɛfɛ. Olu fana gɛrɛfɛ Mesezabeyɛli deen Berekiya dencɛ Mesulamu tun be baara kɛra. Baana dencɛ Sadɔki tun be baara kɛra olu fana gɛrɛfɛ.

⁵Tekowakaw tun be baara kɛra olu gɛrɛfɛ. Olu ɲafɛmɔgɔw tun banna ka kolo u kuntigiw ye, ka baara kɛ.

⁶Pazeya dencɛ Yoyada ni Bezodiya dencɛ Mesulamu, le ye Daa kɔrɔma lalaga k'a kuun biri ka koonw don ani ka sɔgɔnanw kɛ a la.

⁷Olu gɛrɛfɛ, Melatiya ka bɔ Gabaŋɔn, ni Yadɔn ka bɔ Meronɔti tun be baara kɛra, ani Gabaŋɔnkaw ni Misipakaw fana. U tun be baara kɛra baji kɔfɛ lasigiden tɔgɔ la.

⁸Sanufagalaw cɛma, Araya dencɛ Uziyɛli tun be lɔli kɛra olu gɛrɛfɛ. Wusulandilanbagaw cɛma, Ananiya tun be lɔli kɛra Uziyɛli gɛrɛfɛ fana. Zeruzalɛmu laminikogo ka bon yɔrɔ min na, u ye kogo lɔ ka taga se o yɔrɔ ma.

⁹Huri dencɛ Erefaya, min tun ye Zeruzalɛmu dugu tilancɛ kelen dugutigi ye, ale tun be lɔli kɛra Ananiya gɛrɛfɛ.

¹⁰Arumafi dencɛ Yedaya tun be lɔli kɛr'a yɛrɛ ka soo ɲafɛ olu gɛrɛfɛ. Olu fana gɛrɛfɛ Asabineya dencɛ Atusi tun be lɔli kɛra.

¹¹Arimu dencɛ Malikiya ni Paati Mowabu dencɛ Asuba, ye kogo dɔ lalaga, ani Fɛnwusuyɔrɔ sangaso.

¹²Zeruzalɛmu dugu tilan kelen dugutigi Alowɛsi dencɛ Salumu n'a denmusow tun be lɔli kɛra olu gɛrɛfɛ.

¹³Anuni ni Zanowakaw ye kɔɔ faan fɛ daa lalaga ka koonw don k'a sɔgɔlanw don. O kɔ, u ye kogo lɔ fɔɔ ka tɛmɛ mɛtɛrɛ kɛmɛ duuru ma ka taga se daa ma min be ɲamabɔnyɔrɔ la.

¹⁴Erekabu dencɛ Malikiya min ye Bɛtikɛrɛmu mara ɲamɔgɔ ye, ale ye Ɲamabɔnyɔrɔ daa lalaga. A y'a lɔ ka koonw n'a sɔgɔlanw don.

¹⁵Koliwoze dencɛ Salumu min ye Misipa mara ɲamɔgɔ ye, ale ye daa lalaga min be jii bɔyɔrɔ faan fɛ. A y'a lɔ k'a kuun biri, ka koonw ni sɔgɔnanw don a la. O kɔ, kogo min be taga Silowe jii bɔyɔrɔ faan fɛ, masacɛ ka nankɔ gɛrɛfɛ, min be Dawuda ka ciin ɲafɛ a y'o lɔ.

¹⁶Olu kɔfɛ, Bɛtisuri dugu tilan kelen dugutigi Azibuki dencɛ Neemi ye kogo lalaga fɔɔ ka taga se Dawuda ka kaburu ɲafɛ, u tun ye dalan lalaga yɔrɔ min na, ani ka taga se Cɛfariw ka soo ma.

¹⁷Levi kɔmɔgɔw n'u ɲamɔgɔ Bani dencɛ Ereyumu ye lɔli kɛ ka tugu olu la. Keyila dugu tilan kelen dugutigi Asabiya tun gunna ale kɔ ka to ka baara kɛ a ka mara ye.

¹⁸Enadadi dencɛ Binuwi min tun ye Keyila dugu tilan kelen nin dugutigi ye, ale tun gunna a badenw na n'u be lɔli kɛra.

¹⁹Kɛlɛkɛminanw be mara kulu min kan, kogo min be o gɛrɛfɛ, Yesuwa dencɛ Ezɛri, min ye Misipa mara ɲamɔgɔ ye, ale tun be kogo lalagara Binuwi gɛrɛfɛ, k'a ta o yɔrɔ la fɔɔ ka taga se kogo gɔngɔrɔyɔrɔ la.

²⁰Zabayi dencɛ Baruki gunna Ezɛri kɔ, ale tun jijara o baara la k'a ta kogo gɔngɔrɔyɔrɔ la fɔɔ ka taga se sarakalasebagaw kuntigi Eliyasibu ka soo daa la.

²¹Akɔsi deen Uriya dencɛ Meremɔti tun be kogo yɔrɔ dɔ fana lalagara ale fana kɔfɛ, k'a ta Eliyasibu ka soo daa la fɔɔ ka ta'a bila a ka soo daan na.

²²Zeruzalɛmu mara sarakalasebagaw tun be lɔli kɛra ale fana kɔfɛ.

²³Olu fana kɔfɛ, Bɛnzamɛn ni Asubu tun be lɔli kɛra u yɛrɛ ka soo ɲafɛ. Ananiya deen Maaziya dencɛ Azariya tun be lɔli kɛra olu fana kɔfɛ a ka soo gɛrɛfɛ.

²⁴Enadadi dencɛ Binuwi tun be kogo yɔrɔ dɔ lalagara ale kɔfɛ, k'a ta ale Azariya ka soo yɔrɔ la fɔɔ ka taga se kogo gɔngɔrɔyɔrɔ ma, kurubɔyɔrɔ la.

²⁵Uzayi dencɛ Palali tun be lɔli kɛra kogo gɔngɔrɔyɔrɔ la, masacɛ ka soo sanbon ɲafɛ, kasobon gɛrɛfɛ. Parewɔsi dencɛ Pedaya tun gunna ale fana kɔ.

²⁶Ala ka soo kɔnɔ baarakɛla minw tun siginin be Ofɛli tintin kan, olu ye lɔli kɛ fɔɔ ka taga se daa ma min tɔgɔ ko Jida, kɔrɔn ɲafan na, ani sanbon nin ɲafɛ.

²⁷Olu gɛrɛfɛ, Tekowakaw ye kogo dɔ lalaga k'a lɔ k'a ta sanbon nin ɲafɛ ka taga se kogo ma min be Ofɛli tintin kan.

²⁸Sarakalasebagaw tun be lɔli kɛra danna danna u yɛrɛ ka soo ɲafɛ Soow ka donda tɛmɛnin kɔ sanfɛ yɔrɔ la.

²⁹Imɛri dencɛ Sadɔki tun be lɔli kɛra ka gun olu la a ka soo ɲafɛ. Sekaniya dencɛ Semaya, min tun ye kɔrɔn ɲafan fɛ daa kɔlɔsibaga ye, ale tun be lɔli kɛra Sadɔki kɔfɛ.

³⁰Ale gɛrɛfɛ, Selemiya dencɛ Ananiya, ni Salafu deen wɔɔrɔnan Anuni, olu tun be kogo yɔrɔ dɔ lalagara fana. Berekiya dencɛ Mesulamu tun be lɔli kɛra olu kɔfɛ a ka soo ɲafɛ.

³¹Ale gɛrɛfɛ, sanufagala min tɔgɔ ko Malikiya, ale tun be lɔli kɛra fɔɔ ka taga se Ala ka soo kɔnɔ baarakɛlaw ni jagokɛlaw ka soow ɲafɛ, Mifikadi ka daa ɲafɛ, fɔɔ sangaso gɛrɛfɛ min be kogo gɔngɔrɔyɔrɔ la.

³²Sanufagalaw ni jagokɛlaw, tun be lɔli kɛra sangaso nin ni Sagaw ka donda cɛ.

³³Sanbala y'a mɛn tuma min na ko an be kogo nin lɔra, a dimina kosɔbɛ. O la, a tun be to ka zuwifuw lɔgɔbɔ,

³⁴ka to k'a fɔ a tɔɲɔgɔnw ni Samari kɛlɛdenw ɲana ko: «Zuwifuw dɛsɛbagatɔ nunu be mun baara le kɛra? An ka kan k'o to u b'o kɛ wa? U bena se ka saraka bɔ wa? U bena se ka baara nin kɛ k'a ban tile kelen kɔnɔ wa? U bena segi ka kabakuru nunu bɔ buguri la k'u lala ɲɔgɔn kan wa? K'a sɔrɔ tasuma y'u jɛni.»

³⁵Amonicɛ Tobiya tun b'a gɛrɛfɛ. Ale ko: «Aw y'o to u b'u ka baara kɛ sa. Ni kongowulu dɔ wilila ko a be yɛlɛ a kan, a kabakuru nunu bɛɛ bena yɛrɛkɛ!»

³⁶An ka Ala, mɛnni kɛ an fɛ bari u b'an lɔgɔbɔra. U ka nɛnili kɔsegi u yɛrɛ ma, k'a kɛ u be minɛ ka taga jɔnya la yɔrɔ wɛrɛ.

³⁷I kana yafa u ma u ka kojugu kosɔn, kana ɲinɛ n'u ka hakɛ ye, bari mɔgɔ minw be baara kɛ, u ye olu dɔgɔya.

³⁸Jama ye baara nin ta n'u sɔbɛ ye ten. An sera ka kogo nin lɔ fɔɔ a wilila ka se a jaɲa tilancɛ ma.