Read dyu Neemi ka kitabu 4 Bible Online

Neemi ka kitabu 4 - dyu bible

Neemi ka kitabu 4

¹Tuma min na Sanbala ni Tobiya, ani arabuw, ni amoniw ani Asidɔdikaw y'a mɛn ko kogo nin lalagabaara be tagara ɲa ani ko yɔrɔ minw tun benna, k'olu daminɛna ka tugu, u dimina kosɔbɛ.

²U ye ɲɔgɔn lajɛn k'u bena na Zeruzalɛmu kɛlɛ ka cɛnni kɛ.

³An y'an ka Ala daali, o kɔ, an ye kɔlɔsilikɛbagaw sigi suu ni tile, janko k'an yɛrɛ tanga u ma.

⁴Nga Zuda mara mɔgɔw tun b'a fɔra ko: «Baarakɛbagaw barika banna, kogo nin cɛnyɔrɔw do ka ca, o la an tena se ka kogo nin lɔ tugu.»

⁵An juguw tun b'a fɔra k'olu bena na se an cɛma, ko an tena bɔ foyi kala ma, ko an tena u ye fɔɔ u bena se k'an faga, k'o la baara nin be lɔ.

⁶Zuwifu minw siginin be n'u ye, olu nana k'an lasɔmi siɲɛ tan ko u bena bɔ u sigiyɔrɔ bɛɛ la ka na an kama.

⁷O la, kogo yɔrɔ minw jiginin be, n ye mɔgɔ dɔw bɔ k'u lɔ o yɔrɔw kɔfɛ somɔgɔ somɔgɔ, n'u ka murujan n'u ka tamanw n'u ka toonw ye u bolo.

⁸Ne y'o filɛ ka ban dɔrɔn, ne y'a fɔ ɲamɔgɔw ni kititigɛlaw, ani jama tɔɔ ye ko: «Aw kana siran u ɲa! Aw k'aw hakili jigi Matigi ka koo la. A ka bon, mɔgɔ ka kan ka siran ale lo ɲa, aw ka kɛlɛ kɛ aw badenw n'aw dencɛw n'aw denmusow, n'aw ka musow n'aw ka somɔgɔ tɔw kosɔn.»

⁹Tuma min na an juguw y'a mɛn ko an tun lasɔminin lo, ani ko Ala y'a kɛ u ka kolatigɛnin cɛnna ten, an kɔsegira ka kogo lɔko daminɛ tugu, an kelen kelen bɛɛ n'an ta.

¹⁰K'a ta o loon ma, ne ka baarakɛlaw tilan kelen tun be kogo lɔra, tilan kelen lɔnin be n'u ka tamanw ni nigɛkunbɛnnanw, ni toonw, n'u ka fani nigɛlaman ye u kaan na. Minw kɛra kuntigiw ye, olu tun lɔnin be Zuda kɔmɔgɔw ka soow bɛɛ kɔfɛ,

¹¹minw tun be kogo lɔra. Minw tun be bɔgɔ ni kabakuru tara k'a di, olu tun be baara kɛ ni bolo kelen ye, ani maramafɛn be bolo kelen na.

¹²Minw be kogo lɔra, olu kelen kelen bɛɛ tun be baara kɛra, n'u ka murujan sirinin b'u cɛɛ la. Mɔgɔ min tun be ni buru fiyɛta ye, ale tun lɔnin be ne gɛrɛfɛ.

¹³N y'a fɔ ɲamɔgɔw ni kititigɛlaw, ani jama tɔɔ ye ko: «Baara nin ka ca, a fana te yɔrɔ kelen na, an jɛnsɛnnin be kogo kan, an yɔrɔ ka jan ɲɔgɔn na.

¹⁴N'aw ye buru kaan mɛn k'aw to yɔrɔ o yɔrɔ, aw ye na ɲɔgɔn lajɛn an gɛrɛfɛ buru fiyɛyɔrɔ la. An ka Ala bena an dɛmɛ ka kɛlɛ kɛ!»

¹⁵A kɛra ten, an sera ka baara nin kɛ, an tilancɛ kelen tun be ni tamanw ye u bolo k'a ta dugugwɛda ma, fɔɔ ka taga suu ko lolow ka bɔ.

¹⁶O waati la, n y'a fɔ jama ye tugu ko u kelen kelen bɛɛ ka to Zeruzalɛmu sufɛ ani u ka baaradenw, ko an ka to ka kɔlɔsili kɛ sufɛ, tilefɛ an be baara kɛ.

¹⁷Ne wo, n badenw wo, ne ka baaradenw wo, kɔlɔsilikɛbagaw wo, an ka fani tun b'an kaan na tuma bɛɛ, an labɛnnin tun be tuma bɛɛ la, n'an ka kɛlɛkɛminanw b'an bolo. [1]