Read dyu Neemi ka kitabu 5 Bible Online

Neemi ka kitabu 5 - dyu bible

Neemi ka kitabu 5

¹Mɔgɔ dɔw wilila jama cɛma, olu n'u ka musow, k'a fɔ k'u badenw y'u tɔɲɔ.

²Dɔw tun b'a fɔra k'olu ka ca u ka denbaya kɔnɔ, k'u ka dumuni di olu ma janko u ka se ka balo.

³Dɔw tun b'a fɔra k'olu be to k'u ka *ɛrɛzɛnforow n'u ka foro tɔw, n'u ka soow falen dumuni na kɔngɔ tuma na.

⁴Dɔw tun b'a fɔra fana k'olu ye wari dɔndɔ n'u ka forow n'u ka ɛrɛzɛnforow n'u ka foro tɔw tɔgɔw ye, ka sɔrɔ ka nisɔngɔ sara masacɛ ye.

⁵U k'olu bɛɛ do ye fɛɛn kelen ye, k'olu deenw n'u deenw bɛɛ ye kelen ye, o bɛɛ n'a ta, ko wajibi lo olu b'u dencɛw n'u denmusow d'u ma ka kɛ jɔɔnw ye. K'olu denmusow dɔw dira ka ban, ko see te olu ye tugu, k'u ka ɛrɛzɛnforow n'u ka foro tɔw kɛra mɔgɔ wɛrɛw ta ye.

⁶Ne y'o kuma nunu mɛn u fɛ tuma min na, ne dimina kosɔbɛ.

⁷ N y'a latigɛ ko n bena ɲamɔgɔw ni kititigɛla nunu jalaki, n y'a fɔ u ye ko: «Ee! Aw b'aw badenw dɔndɔ fɛɛnw na ka tɔnɔ ɲini o la kɛ?» O kɔ, n ye ɲɔgɔnyeba sigi k'u wele.

⁸N y'a fɔ u ye ko: «An y'an seko kɛ k'an baden zuwifuw hɔrɔnya ka bɔ siya wɛrɛw bolo, aw do b'u feerela, u fana be feere an yɛrɛw le ma tugu!» U jera, u ma se ka foyi fɔ.

⁹O kɔ, n y'a fɔ u ye ko: «Aw be fɛɛn min kɛra, o ma ɲi. Aw man kan k'aw ka kɛtaw kɛ k'o kɛɲɛ n'an ka Ala ɲasiran ye wa, janko an juguw siya wɛrɛw kana an nɛni?

¹⁰Ne ni n badenw ani n ka baaradenw, an y'u dɔndɔ wari ni dumuni na. An ka yafa u ma.

¹¹Bii yɛrɛ aw ye fɛɛn minw minɛ u fɛ, aw k'o segi u ma, u ka ɛrɛzɛnforo ni olivuforow n'u ka foro tɔw, n'u ka soow. Aw ye wari ni dumuni, ani duvɛnkɛnɛ ni tulu minw minɛ u fɛ k'o kɛ aw ka tɔnɔ ye, aw ka olu fana kɔsegi u ma.»

¹²U y'a fɔ k'olu ben'a kɔsegi k'o d'u ma, k'u tena foyi ɲininga u fɛ, ko ne ye fɛɛn min fɔ, k'u bena o kɛ. O kɔ, ne ye sarakalasebagaw wele, n ye mɔgɔ nunu wajibiya, u kalila olu ɲana k'olu ben'a kɛ ten.

¹³O la, ne ye n ka foroca minɛ k'a yuguyugu, k'a fɔ ko: «Ni mɔgɔ min ma sɔn k'a ka fɔta kɛ, Ala k'o tigi yuguyugu ten, k'a bɔ a ka soo kɔnɔ, a ka bɔnɔ a bololafɛnw na, a bololakolon ka to!» Jama bɛɛ y'a fɔ amiina, ka sɔrɔ ka Masaba tanu. Jama fana kɛra kantigi ye.

¹⁴K'a ta loon min na masacɛ Aritasɛrisɛsi ye ne kɛ a ka lasigiden ye u kunna Zuda mara la, a ka masaya saan mugannan na, fɔɔ ka taga se a saan bi saba ni filanan ma, o saan tan ni fila nunu kɔnɔ ne ni n badenw, an ma sɔn ka lasigidenya tɔnɔ minɛ u si fɛ.

¹⁵O y'a sɔrɔ lasigiden minw tɛmɛna ne ɲafɛ, olu tun be to ka jama tɔɔrɔ, u tun be to ka dumuni ni duvɛn minɛ u fɛ, ani warigwɛ kuru bi naani. U ka baaradenw fana tun be to ka kuntigiya kɛ jama kan. Alaɲasiran kosɔn, ne ma sɔn k'o kɛ.

¹⁶Ne fana ye kogo lɔbaara kɛ. An ma sɔn ka foro si san, ne ka baaradenw bɛɛ tun be kogo lɔbaara la.

¹⁷Kititigɛlaw ni zuwifu minw tun be dumuni kɛ ne fɛ, olu tun ye mɔgɔ kɛmɛ ni bi duuru ye, o be danna siya wɛrɛw la.

¹⁸Loon o loon, misi kelen ni saga ɲanaman wɔɔrɔ ani gaman be fɛɛn minw fɛ, olu dɔw le be bɔ ne fɛ ka faga ka tobi. Tile tan o tile tan, u tun be to ka duvɛn caaman dilan. O bɛɛ n'a ta, lasigiden ka kan ni fɛɛn minw ye, ne ma sɔn k'o minɛ u fɛ, bari kogo lɔbaara tun lanin be jama kunna.

¹⁹Ne ka Ala, i kana ɲinɛ ne kɔ, i ka hɛrɛ kɛ ne ye, ne ka baara kosɔn n ye min bɛɛ kɛ jama nin ye.