Read dyu Tobi ka kitabu 11 Bible Online

Tobi ka kitabu 11 - dyu bible

Tobi ka kitabu 11

¹Tuma min na u tun be gwɛrɛla Kaserin, Ninivu gɛrɛfɛ, Arafayɛli y'a fɔ ko:

²«An y'i facɛ to cogoya min na, i b'o lɔn.

³An ka bila i muso ɲa janko ka taga boon labɛn yanni a be se ni mɔgɔ tɔw ye.»

⁴U fila bilara ɲafɛ. Arafayɛli y'a fɔ Tobiya ye ko: «I ka jigɛ kunakuna to i bolo kɔrɔ.» Tobiya ka wulu tun bɛ tugura u kɔ.

⁵O waati la, Ana tun siginin be n'a be sira filɛra, a dencɛ tun ka kan ka segi ni min ye.

⁶A y'a natɔ ye tuma min na, a y'a fɔ a cɛɛ ye ko: «I dencɛ natɔ filɛ ni cɛɛ nin ye min tun y'a bila sira!»

⁷Yanni u ka se a facɛ fɛ, Arafayɛli y'a fɔ Tobiya ye ko: «Ne b'a lɔn ko a ɲaa bena yɛlɛ.

⁸I ka jigɛ kunakuna mɔn a ɲaa na, o fura nin ben'a kɛ gwɛɛ be ja ka bɔ a ɲaa na. O la, i facɛ ɲaa bena segi a ma, a bena se ka yeli kɛ tugu.»

⁹Ana bolila ka ta'a bolow meleke a dencɛ kaan na k'a fɔ a ye ko: «Ne ɲaa lara i kan tugu n deen. Sisan Ala be se k'a ka kalifa minɛ ne la!» A daminɛna ka kasi.

¹⁰Tobi talontalontɔ wilila ka bɔ ni luda ye.

¹¹Tobiya tagar'a kunbɛn ni jigɛ kunakuna ye a bolo. A y'a ɲaa fiyɛ k'a minɛ k'a fɔ a ye ko: «Baba, i jaa gwɛlɛya!» A ye fura nin mɔn a ɲaa na, k'a to a k'a ka baara kɛ.

¹²O kɔ, a ye gwɛɛ nunu tereke ka bɔ a facɛ ɲaden logologo la n'a bolo fila ye.

¹³Tobi y'a bolo meleke a dencɛ kaan na ka daminɛ ka kasi. A y'a fɔ a ye ko: «Ne ɲaa b'i la tugu, n deen, e min yeko be ne nisɔndiya!»

¹⁴A y'a fɔ tugu ko: «Ala ka tanu! A tɔgɔba ka tanu! A ka mɛlɛkɛw bɛɛ ka tanu! Ala min tɔgɔ ka bon, o k'an mara tuma bɛɛ! Mɛlɛkɛw bɛɛ ka tanu waati bɛɛ la! Bari Matigi ye ne kɔrɔbɔ, nga sisan, ne be se ka n dencɛ Tobiya ye tugu.»

¹⁵Tobiya nisɔndiyanin donna soo kɔnɔ n'a b'a kaan kɔrɔ tara ka Ala tanu. A y'a fɔ a facɛ ye ko a ka taama ɲana, ko a nana ni wari nin ye. A ye Araguwɛli denmuso Sara furu cogo min na, a y'o fana fɔ a ye. A y'a fɔ tugu ko: «A bena se sisan, a yɔrɔ man jan Ninivu la tugu.»

¹⁶Tobi nisɔndiyanin bɔra ka ta'a biranmuso kunbɛn Ninivu donda la, n'a be Ala tanura. Tuma min na Ninivukaw y'a taamatɔ ye a be tɛmɛna, a kɛnɛyanin, ni mɔgɔ si m'a bolo minɛ, u kabakoyara. Tobi y'a wango la u ɲana ko Ala makarila ale la k'a ɲaa yɛlɛ.

¹⁷A gwɛrɛl'a deen Tobiya muso Sara la tuma min na, a y'a fo k'a fɔ ko: «I dansɛ, n denmuso! I ka Ala ka tanu, ale min y'a kɛ i nana an fɛ! Ala ka hɛrɛ kɛ i facɛ ye, ka hɛrɛ kɛ ne deen Tobiya ye, ani e, n denmuso ye! Don i ka soo kɔnɔ, i dansɛ. Ala ka hɛrɛ kɛ i ye, k'i nisɔndiya! Don, denmuso!»

¹⁸O loon na, Zuwifu minw tun be Ninivu, olu bɛɛ nisɔndiyanin tun lo.

¹⁹Tobi balima deen Ayikari ni Nadan fana nana nisɔndiya ni Tobi ye.