Read dyu Tobi ka kitabu 12 Bible Online

Tobi ka kitabu 12 - dyu bible

Tobi ka kitabu 12

¹U ka nisɔndiya banna tuma min na, Tobi y'a deen Tobiya wele k'a fɔ a ye ko: «N deen, i hakili to a la k'i taamaɲɔgɔn ka sara d'a ma, ani ka dɔ fara a kan.»

²Tobiya y'a ɲininga ko: «Baba, n ka joli d'a ma? An segira ni fɛɛn minw ye, hali ni ne y'o tilan kelen d'a ma, o tɛ bɔnɛ ye ne fɛ.

³A segira ni ne ye hɛrɛ la. A ye n muso kɛnɛya, a ye ne dɛmɛ ka segi n'i ka wari ye, a y'i kɛnɛya. O bɛɛ kɔ, ne ka kan k'a sara ni mun ye?»

⁴Tobi ko: «N deen, aw nana ni fɛɛn minw bɛɛ ye, a bɛnnin lo a k'o tilan kelen sɔrɔ.»

⁵Tobiya y'a wele k'a fɔ a ye ko: «I segira ni fɛɛn minw bɛɛ ye, i k'o tilan kelen minɛ o ka kɛ i ka sara ye, ka taga hɛrɛ la!»

⁶Arafayɛli y'u wele ka bɔ gɛrɛfɛ k'a fɔ u ye ko: «Aw ka Ala tanu! A ye koo min bɛɛ kɛ aw ye, aw k'o wango la nimanfɛnw bɛɛ ɲana! A ka ɲi k'a tanu ani k'a makiri. Aw ka Ala ka kɛwaliw fɔ mɔgɔw bɛɛ ye, o bɛnnin lo. Aw kan'o wango dabila.

⁷Ka masacɛ ka gundo mara, o ka ɲi. Nga Ala ka kɛwaliw kɔni, a bɛnnin lo k'o yira kɛnɛ kan. O ka kan ka fɔ, k'o fɔ a fɔcogo la. «N'aw be koɲuman kɛ, kojugu tena aw sɔrɔ.

⁸Ka Ala dali sɔbɛ la, ani ka fantanw sɔn tilenninya la, o ka fisa ni nafolo ye min sɔrɔla tilenbaliya la. Mɔgɔ ka dɛsɛbagatɔw sɔn, o ka fisa ka sanu ɲini k'a ton i fɛ.

⁹Ka fantanw sɔn, o be mɔgɔ kisi saya ma, o be mɔgɔ saniya ka bɔ hakɛ bɛɛ la. Minw be fantanw sɔn, olu bena sijan sɔrɔ.

¹⁰Minw be hakɛ ni tilenbaliyako kɛ, olu ye u yɛrɛw jugu ye.

¹¹«Sisan, ne bena tiɲɛ bɛɛ fɔ aw ye, ne tena foyi dogo aw la. Ne tun y'a fɔ aw ye ka tɛmɛ ko, ka masacɛ ka gundo mara, o ka ɲi, nga a bɛnnin lo Ala ka kɛwali ka yira kɛnɛ kan fɔɔ ka ɲa.

¹²Ayiwa, e ni Sara ye Matigi dali tuma min na, ne le ye aw ka dalili lase Matigi kabakoman ma, ani e tun be suuw don tuma min na.

¹³I tun ma siga ka wili ka bɔ dumuni kunna ka taga mɔgɔ dɔ suu don. O tuma na, Ala ye ne ci i fɛ ko ne k'i kɔrɔbɔ.

¹⁴Nga a ye ne ci k'i n'i biranmuso Sara kɛnɛya fana.

¹⁵Ne ye Arafayɛli ye, mɛlɛkɛ wolonwula minw lɔnin bɛ Matigi kabakoman ɲakɔrɔ, n'u labɛnnin be ka baara kɛ a ye, ne ye olu dɔ ye.»

¹⁶U fila bɛɛ hakili ɲagamina, u y'u kunbiri gwan k'u ɲaa biri duguma, siranya y'u minɛ.

¹⁷Nga mɛlɛkɛ y'a fɔ u ye ko: «Aw kana siran. Ala ka hɛrɛ kɛ aw ye! Aw ka Ala fo tuma bɛɛ!

¹⁸Ne tun be ni aw ye tuma min na, o ma kɛ ne ka ɲuma nɔɔ ye, Ala sago tun lo. Aw ka kan k'ale lo fo aw sii tile bɛɛ la, k'ale tanu.

¹⁹Dumuni kɛtuma na, aw tun b'a yera ko ne tun be dumuni kɛra, k'a sɔrɔ ne tun te foyi kɛra. Aw ɲaa tun sirila le.

²⁰O la, aw ka Matigi Ala tanu dugukolo kan, k'a ka boɲa fɔ. Sisan ne bena kɔsegi ka yɛlɛ ka taga n cibaga fɛ. Koo min ye aw sɔrɔ, aw k'o bɛɛ sɛbɛn.» O kɔ, a yɛlɛla ka taga sankolo la.

²¹Tobi n'a deen wilila ka lɔ, u m'a ye tugu.

²²U ye Ala tanu ni dɔnkili ye. A ye koba minw bɛɛ kɛ o yɔrɔ la, u y'o fɔ, ka Ala ka mɛlɛkɛ yeko fana fɔ.