Read dyu Tobi ka kitabu 13 Bible Online

Tobi ka kitabu 13 - dyu bible

Tobi ka kitabu 13

¹Tobi tun be dɔnkili nin lara ko:

²«Ala ka tanu, ale min be a ka masaya la tuma bɛɛ! Ale lo be mɔgɔ ɲaa gwan a ka kojugu kosɔn, a be makari mɔgɔ la. A b'a kɛ mɔgɔ be jigi fɔɔ lahara, o kɔ, k'a kɔrɔta tugu ka bɔ halakiyɔrɔ la. Foyi te se ka bɔsi ka bɔ a bolo.

³Isirayɛlidenw, aw ka Ala ka boɲa fɔ siya wɛrɛw ɲana, a ye aw jɛnsɛn minw cɛma.

⁴K'aw to o yɔrɔ la, a y'a ka boɲa yira aw la. Aw k'a boɲa nimanfɛnw bɛɛ ɲana, bari an Matigi lo, ni an ka Ala, n'an Faa, Ala lo tuma bɛɛ.

⁵A b'aw ɲaa gwan aw ka kojuguw kosɔn, nga a bena makari aw bɛɛ la k'aw bɔ siyaw bolo, aw jɛnsɛnnin be minw cɛma.

⁶Aw bena kɔsegi a ma loon min na n'aw dusukun bɛɛ ye ni hakili kelen ye, ka tiɲɛko kɛ a ɲakɔrɔ, o tuma na, a bena segi aw ma, a ten'a ɲada dogo aw la tugu.

⁷Ayiwa sisan, a ye koo min kɛ aw ye, aw ye miiri o la k'aw kaan kɔrɔta k'a boɲa fɔ. Aw ye Matigi tanu, ale min tilennin lo, aw k'a boɲa, tuma bɛɛ Masa lo!

⁸Ne kɔni b'a boɲa fɔ ne minɛna ka taga yɔrɔ min na. Ne b'a ka fanga n'a ka boɲa yira siya la, [1] minw ye kojugukɛlaw ye. Kojugukɛla nunu, aw ye kɔsegi ka tilenninya kɛ a ɲakɔrɔ. N'a sɔrɔ a bena sɔn aw ma, ka makari aw la.

⁹Ne be n ka Ala tanu bari a ka bon, ne be nisɔndiya kosɔbɛ sankolo Masa kosɔn.

¹⁰Bɛɛ k'a ka boɲa wango la k'a koo fɔ Zeruzalɛmu kɔnɔ! «Zeruzalɛmu, Ala ka dugu, Ala b'i ɲaa gwanna i deenw ka kɛwaliw le kosɔn. Nga a bena tila ka makari mɔgɔtilenninw na tugu.

¹¹Zeruzalɛmu, e ka Matigi ka boɲa yira kɛnɛ kan fɔɔ ka ɲa, k'a tanu, tuma bɛɛ Masa lo, janko a batoso ka se ka lɔ i kɔnɔ tugu, e kɔnɔ mɔgɔw ka nisɔndiya.

¹²Mɔgɔ minw minɛna ka taga jɔnya la, a k'olu bɛɛ nisɔndiya i kɔnɔ! I kɔnɔ mɔgɔ minw bɛɛ tɔɔrɔnin be, olu koo ka diya a ye tuma bɛɛ!

¹³Yeelenba bena bɔ i la ka se fɔɔ dugukolo daan na. Siya caaman bena bɔ yɔrɔjan ka na i fɛ. Mɔgɔ minw be dugukolo daanw bɛɛ la, u bena na don i kɔnɔ, Ala ka dugu, ni boɲafɛnw ye u bolo, u bena minw di sankolo Masa ma. Waati nataw mɔgɔw bena nisɔndiya i ka siraw la. Hali sini, u bena i wele ko dugu wolomanin.

¹⁴Mɔgɔ minw bena i bagabaga, Ala k'olu bɛɛ ta cɛn! Minw bena i halaki k'i laminikogow ben, k'i ka sangasow ci, k'i ka soow jɛni, a k'olu bɛɛ ta cɛn! Nga mɔgɔ minw b'i boɲa, a k'olu bɛɛ ta ɲa tuma bɛɛ!

¹⁵Zeruzalɛmu, nisɔndiya bena sɔrɔ i kɔnɔ, mɔgɔtilenninw kosɔn, bari u bɛɛ bena ɲɔgɔn lajɛn ka waati bɛɛ Matigi tanu. I koo ka di mɔgɔ minw ye, olu dagamunin lo! Minw be nisɔndiya i ka hɛrɛ kosɔn, olu dagamunin lo!

¹⁶Mɔgɔ minw dusu kasira e ka tɔɔrɔko la, olu bɛɛ dagamunin lo! E ka hɛrɛ bena kɛ hɛrɛ ye u ma, e ka nisɔndiya bena kɛ olu ta ye. Ɔnhɔn, ne be Matigi tanu, Masaba,

¹⁷bari Zeruzalɛmu bena lɔ kura ye, Matigi ka soo bena lɔ kura ye a kɔnɔ, ka to yen kudayi. Zeruzalɛmu, ni ne ka siya tɔɔ y'i ka ɲa ye, ni u ye sankolo Masa fo, o tuma na, ne bena nisɔndiya haali! I dondaw bena lɔ, u bena lɔ ni safiri kabakuruw ni emerodi ta ye, kogow bɛɛ bena lɔ ni kabakuru sɔngɔgwɛlɛnw ye. Sangasow bena lɔ ni sanu ye, u yɔrɔ barikamanw bena dilan ni sanu yɛrɛyɛrɛ ye. Siraw bena labɛn ni kabakuruwulen sɔngɔgwɛlɛnw ye, ani kabakuru minw bɔra Ofiri.

¹⁸Nisɔndiya dɔnkiliw bena la i dondaw la, u bena dɔnkili la soow bɛɛ kɔnɔ ko: ‹Aleluya! Isirayɛli ka Ala ka tanu!› Ala ka mɔgɔ wolomaninw ben'a tɔgɔɲuman tanu tuma bɛɛ.»