Read dyu Tobi ka kitabu 2 Bible Online

Tobi ka kitabu 2 - dyu bible

Tobi ka kitabu 2

¹Ne segira soo Azaradɔn ka tile la, ka n muso Ana ni n dencɛ Tobiya ye tugu. An ka *Pantekɔti ɲanagwɛ waati la, an be min kɛ lɔgɔkun wolonwulanan na *Hɔrɔnya ɲanagwɛ tɛmɛnin kɔ, u ye dumuniɲuman labɛn ne ye. Ne sigira ko n be dumuni kɛ,

²u nana dumuni diman sifa caaman bila tabali kan ne ɲakɔrɔ. Ne y'a fɔ n deen Tobiya ye ko: «N deen, wili ka taga an balimaw cɛma, minw nana Ninivu jɔnya la. Banba ka dɛsɛbagatɔ dɔ sɔrɔ u cɛma min tilennin be Matigi ye. N'i ye dɔ sɔrɔ, na n'a ye a ka dumuni kɛ ni ne ye. N deen, ne bena kɔnɔni kɛ fɔɔ i ka kɔsegi ka na.»

³Tobiya wilila ka taga dɛsɛbagatɔ dɔ ɲiniyɔrɔ an balimaw cɛma, nga a segira ka n'a fɔ ko: «N faa!» Ne y'a jaabi ko: «Mun kɛra, n deen?» A ko: «N faa, u ye an ka siya dɔ faga k'a suu fili forobayɔrɔ la, a be yen halibi, u tun y'a kaan dɛrɛ le!»

⁴Ne wilila teliya la ka n ka dumuni to yen, ne tun ma maga a la fɔlɔ. N tagara cɛɛ nin suu ta forobayɔrɔ la, k'a bila gwata dɔ kɔrɔ yanni suu ka ko, n b'a suu don. [1]

⁵Ne segira soo, ka ko ka dumuni kɛ dusukasi la.

⁶ Ne hakili tora kira Amɔsi ka kuma na, a tun ye min fɔ Betɛli kama ko: «Aw ka ɲanagwɛw bena yɛlɛma ka kɛ sanga ye, aw ka dɔnkiliw bena yɛlɛma ka kɛ kasi ye.» O kɔ, ne daminɛna ka kasi.

⁷Suu kora tuma min na, ne bɔra ka taga dingɛ sogi ka suu nin don.

⁸Ne sigiɲɔgɔnw tun be ne lɔgɔbɔra k'a fɔ ko: «A tɛ siran halibi! U tun y'a yɔrɔ ɲini janko k'a faga o koo nin ɲɔgɔn kama, a bolila. A filɛ sisan, a b'a la tugu ka suu dɔw don!»

⁹O suu kelen na, ne konin kɔ, ne bɔra ka la luu kɔnɔ kogo kɔrɔ, ne ma fani biri n ɲada kan funteni kosɔn.

¹⁰Ne tun m'a lɔn ko kɔnɔnin dɔw tun be kogo nin na, ne sanfɛ. U boo gwanninman donna n ɲaaw na, o ye gwɛɛ bila n ɲadenw kan. Ne banbana, ka to ka taga furakɛlaw fɛ janko ka furakɛ, nga k'u to ni u be furaw kɛra ne ye, n ɲaa tora ka dibi ka taga gwɛɛ nin barika la. A laban, n kɛra fiɲɛntɔ ye. Ne tora ten saan naani kɔnɔ. N balimaw bɛɛ hakili ɲagamina n kosɔn la. Ayikari jantora ne la saan fila kɔnɔ fɔɔ ka taga se a taatuma ma Elimayide [2] mara la.

¹¹O waati la, ne muso Ana tun be fani dan k'an balo n'o ye.

¹²A tun be to k'o dan ka taga u di a sanbagaw ma, olu tun be to k'o sara a ye. Ayiwa, Disitirɔsi [3] kalo tile wolonwulanan loon, a tun ye fani dɔ dan ka ban, a tagar'o di a sanbagaw ma, olu y'o sɔngɔ d'a ma ka tila ka baden d'a ma naan na.

¹³A sera soo tuma min na, baden nin y'a daminɛ ka kasi. Ne ye n muso wele k'a ɲininga ko: «Baden nin bɔra min? Soɲalita tɛ fewu? Kɔsegi ka ta'a d'a tigiw ma! Fɛɛn min soɲana, an te se k'o dumu.»

¹⁴A y'a fɔ ne ye ko: «Ayi, boɲafɛn lo, u y'a di ne ma ka fara n ka sara kan!» O bɛɛ n'a ta, ne ma l'a la, ne tora k'a fɔ a ye ko a k'a kɔsegi a tigiw ma. Ne dimin'a kɔrɔ baden nin kosɔn. A ye ne jaabi ko: «I ye fantanw sɔn cogo min na, o ye mun ɲa i ye? I ka kɛwaliɲumanw tɔnɔ kɛra mun ye? Bɛɛ b'a lɔn o ye fɛɛn min ɲa i ye!»