Read dyu Tobi ka kitabu 3 Bible Online

Tobi ka kitabu 3 - dyu bible

Tobi ka kitabu 3

¹Ne dusu kasininba daminɛna ka kasi ka to ka sigisigi. Ka ne to sigisigi la, n ye Ala dali ko:

²«Matigi, i tilennin lo, i ka kɛwaliw bɛɛ tilennin lo. I be koo bɛɛ kɛ ɲumanya ni kantigiya la. E le ye mɔgɔw bɛɛ kitibaga ye.

³O la, Matigi, e k'i hakili to ne la, i ka ne filɛ. Kana n tɔɔrɔ n ka hakɛ kosɔn. Ne ni n faaw filila i ma koo minw na, e kana ne tɔɔrɔ olu fana kosɔn. Tiɲɛ na, u donna i gasi la.

⁴U ma e ka sariyaw bato. O le kosɔn, i y'a to an juguw y'an bololafɛnw bɔsi. U y'an dɔw minɛ ka taga n'u ye jɔnya la, k'an dɔw faga. E y'a kɛ an jɛnsɛnna siya minw cɛma, olu bɛɛ be talenw la anw kosɔn. U be yɛlɛ an ma, u b'an nɛni.

⁵Ɔnhɔn, i ye i ka tilenninya yira i ka kiti bɛɛ la. I ye ne kolo, ne, ni n faaw ka hakɛ kosɔn. Tiɲɛ b'i fɛ k'o kɛ, bari an ma i ka sariyaw bato, an ma taama tilenninya la i ɲakɔrɔ.

⁶Sisan, min ye i diya, o kɛ ne la. I ka kalifa minɛ ne la. A minɛ janko ne ka bɔ diɲɛ na, ne ka segi buguri la. Saya ka fisa ne ma ne ka to nii na, bari u be ne nɛnina gwansan, ne nii tɔɔrɔnin lo kosɔbɛ. Matigi, ne bɔ dusukasi nin na. A to ne ka taga lafiɲɛyɔrɔ la ka to yen kudayi. Kana ban ne la, Matigi! Ɔnhɔn, saya ka fisa ne ma, ka to nii na tɔɔrɔba nin kɔnɔ, n'u be to ka n nɛni ni n b'a mɛnna n sii bɛɛ la.»

⁷O y'a sɔrɔ o loon kelen yɛrɛ la, ka Araguwɛli denmuso Sara to Ɛkibatani dugu kɔnɔ, Mɛdi jamana na, a facɛ ka baaraden musow dɔ tun b'ale fana nɛnina n'a b'a mɛnna.

⁸A nɛnikun filɛ: Sara tun dira furu la fɔɔ siɲɛ wolonwula, nga jinajugu dɔ, min tɔgɔ ye Asimɔde. [1] Ale lo tun be to k'a furucɛ nunu faga. U yɛrɛ tun tɛ se ka jɛn n'a ye. Baaradenmuso nin tun y'o le ta k'o fɔ a ye ko: «Ele le be to k'i furucɛw faga! A filɛ sa, i dira cɛɛ wolonwula ma ka tɛmɛ, u si tɔgɔ ma se ka wele i kan!

⁹Mun na i b'an tɔɔrɔ i cɛɛw ka saya kosɔn? E te tugu u kɔ wa? Mɔgɔ si ɲaa kana la i kan, walima i woloden kan fewu!»

¹⁰O loon na, Sara dusukasininba daminɛna ka kasi. A yɛlɛl'a facɛ ka sangaso kɔnɔ ko a b'a kaan dulon, nga a miirila k'a fɔ a yɛrɛ kɔnɔ ko: «U bena n facɛ nɛni k'a fɔ a ye ko: ‹Denmuso kelen dɔrɔn le tun b'i fɛ, min koo tun ka d'i ye. Ale y'a yɛrɛ kaan dulon a ka sigɛn kosɔn.› Aa! Ne facɛ kɔrɔla kosɔbɛ, ne ben'a dusu kasi fɔɔ a be taga lahara. Yanni n ka n kaan dulon, a ka fisa ne ka Matigi dali ko a k'a ka kalifa minɛ ne la. O la, ne tena nɛnili mɛn mɔgɔw daa la n sii kɔnɔ tugu.»

¹¹O yɔrɔnin kelen, a y'a bolow sin fenɛtiri faan fɛ ka Matigi dali ko: «Ne b'i tanu, makaritigi Ala! I tɔgɔ ka tanu tuma bɛɛ! I ka danfɛnw bɛɛ k'i tanu waati nataw bɛɛ la!

¹²Sisan, ne be n ɲaa kɔrɔta i faan fɛ ka n ɲaa sin e ma.

¹³A to ne ka bɔ diɲɛ nin na, ne kana nɛnili nin ɲɔgɔn mɛn tugu.

¹⁴Matigi, e b'a lɔn ko ne gwɛnin be, ko cɛɛ si ma jɛn ni ne ye ka ye.

¹⁵Ne ma n yɛrɛ tɔgɔ cɛnko kɛ, ne ma n facɛ tɔgɔ cɛnko kɛ jamana nin na fana, an minɛna ka na min kɔnɔ. Ne le ye n facɛ ka deen kelenpe ye, deen dɔ wɛrɛ te yen k'a cɛɛn ta. Dɔgɔcɛ te n facɛ fɛ, walima somɔgɔ dɔ wɛrɛ, min be se ka n furu, ne ka kan ka to sii la min kosɔn. Furucɛ wolonwula le sara n fɛ ka tɛmɛ, ne tokun te sii la tugu. Nga n'a man d'i ye ka i ka kalifa minɛ ne la, Matigi, e k'i tulo malɔ ne nɛni cogo la.»

¹⁶O yɔrɔnin kelen, nɔɔrɔtigi Ala ye Tobi ni Sara ka daliliw minɛ.

¹⁷A ye Arafayɛli [2] ci ko a ka taga u fila bɛɛ kɛnɛya, ko a ka gwɛɛ nunu tunu ka bɔ Tobi ɲadenw kan janko a ka se ka yeli kɛ tugu. Ko a ka jina Asimɔde gwɛn ka bɔ Araguwɛli denmuso Sara la k'a kɛnɛya, ka Sara di Tobi deen Tobiya ma furu la. Tobiya le tun ka surun a la balimaya la ka tɛmɛ tɔw kan, ale lo tun ka kan k'a furu. O waati yɛrɛ la, Tobi tun be donn'a ka soo kɔnɔ, Araguwɛli denmuso Sara tun be jigira ka bɔ sangaso kɔnɔ.