Read dyu Tobi ka kitabu 4 Bible Online

Tobi ka kitabu 4 - dyu bible

Tobi ka kitabu 4

¹O loon kelen na fana, Tobi hakili jigir'a ka wari kɔ, a tun ye min bila Gabayɛli fɛ, Aragɛsi dugu kɔnɔ, Mɛdi jamana na.

²A y'a fɔ a yɛrɛ kɔnɔ ko: «Ne ye saya ɲini Ala fɛ. A ka fisa ne ka n dencɛ Tobiya wele ka wari nin koo fɔ a ye, yanni n be sa.»

³A ye Tobiya wele, ale nan'a fɛ, a y'a fɔ a ye ko: «Ni ne sara, i ka ne suu don cogo bɛnnin na, e k'i bamuso boɲa. K'a to sii la kan'a bila loon si. To k'a diyanakow kɛ, kan'a dusu kasi koo si la.

⁴N deen, a sɔnna farasi min bɛɛ ma i kosɔn k'i to a kɔnɔ, e k'i hakili to o la. N'a sara tuma min na, i k'a la ne gɛrɛfɛ kaburu kelen kɔnɔ.

⁵«N deen, e hakili to Matigi la i sii bɛɛ la, kana sɔn ka hakɛ kɛ, walima k'a ka sariyaw cɛn. I ka tilenninya kɛ i sii bɛɛ la, kana tilenbaliyako kɛ.

⁶Bari minw be to tiɲɛ kan, olu ka kokɛtaw bena ɲa.

⁷Mɔgɔ minw bɛɛ be tilenninya kɛ, e k'i bololafɛnw kɛ k'u dɛmɛ kosɔbɛ, kan'o kɛ ka nimisa a la. I kana ban fantan ma fewu, o la, Ala tena ban i la.

⁸I ka dɛmɛ kɛ ka kɛɲɛ n'i ka sɔrɔcogo ye, hali n'a ka dɔgɔ, walima a ka ca. Hali ni dɔɔni dɔrɔn le b'i fɛ, kana siran ka dɔ bɔ a la ka mɔgɔ sɔn.

⁹O la, i be nafoloɲuman le marala lonjugu kama,

¹⁰bari ka fantanw sɔn, o be mɔgɔ kisi saya ma, a be mɔgɔ bali ka taga lahara.

¹¹Tiɲɛ na, mɔgɔ o mɔgɔ mana fantanw sɔn, o tigi be boɲafɛn dira Fɛɛn bɛɛ kuntigi Ala le ma, min koo ka d'a ye.

¹²«N deen, i yɛrɛ kɔlɔsi furukolon ma. Min ka gwɛlɛ, e k'i fasoden furu. Kana lonanmuso furu, min te i ka buruju dɔ ye, bari anw ye kiraw kɔmɔgɔw le ye. I hakili to an bɛmaw la: Nuhun, ni Ibrayima, ni Isiyaka, ani Yakuba. Fɔlɔfɔlɔ, olu bɛɛ ye fasoden le furu. O la, Ala ye hɛrɛ kɛ u ye ka deenw d'u ma, k'a fɔ u ye ko u ka siya bena jamana tigiya sɔrɔ.

¹³Ayiwa n deen, o la, i ka nɔrɔ i balima Isirayɛlidenw na. Kana i yɛrɛ boɲa i balimaw ma, minw ye i ka siya ye, a kɛra cɛɛ ye, walima muso, kana u dɔgɔya ka ban ka muso furu yen. Bari yɛrɛboɲa be na ni bɔnɛ ni hakiliɲagami ye. Salabagatɔya be na ni dɛsɛ ani lakolonya ye, kɔngɔ bɔyɔrɔ lo.

¹⁴«Kana baaraden ka sara mara i fɛ fɔɔ ka dugu gwɛ, i k'a sara joona. N'i be baara kɛ Ala ye, i bena o sara sɔrɔ. N deen, i yɛrɛ kɔlɔsi i ka kokɛtaw bɛɛ la, k'a yira i ka kɛwaliw fɛ ko i ye mɔgɔsɔbɛ ye.

¹⁵Koo min man d'i ye, kana o ɲɔgɔn kɛ mɔgɔ si la. Kana dɔrɔ min fɔɔ ka fa, i kana sɔn ka kɛ dɔrɔtɔ ye.

¹⁶I ka dumuni tilan ni kɔngɔtɔw ye, k'i ka faniw tilan ni fɛɛrɛtɔw ye. I ka fantanw sɔn kosɔbɛ n'i ka nafolo ye, kana o kɛ ani ka nimisa a la.

¹⁷Mɔgɔ minw be mɔgɔtilennin suu kasi, i ka dumuni d'u ma, nga ni mɔgɔjugu lo, kana o kɛ. [1]

¹⁸«Mɔgɔ o mɔgɔ ye hakilitigi ye, i ka ladili ɲini ale fɛ. I ka ladiliɲuman minɛ n'i tigɛ fila ye.

¹⁹Matigi, i ka Ala tanu tuma bɛɛ, k'a ɲini a fɛ ko a ka siraɲuman don i seen kɔrɔ, ka i ka baara, n'i ka kokɛtaw bɛɛ ɲa. Tiɲɛ na, lɔnniya te siya kelen dama ta ye, Matigi yɛrɛ le ye koɲuman bɛɛ dibaga ye, nga n'a b'a fɛ ka min jigi fɔɔ lahara, a b'o kɛ. «Ayiwa n deen, ladilikuma nunu mara i kɔnɔ, kana ɲinɛ u kɔ fewu.

²⁰Sisan, ne ka kan k'a fɔ i ye ko ne ye warigwɛ kilo kɛmɛ saba to Gabiri dencɛ Gabayɛli fɛ, Aragɛsi dugu kɔnɔ, Mɛdi jamana na.

²¹N deen, an ye fantanw ye, nga kana siran. N'i be siran Ala ɲa, ani ka hakɛ sifa bɛɛ to yen, ka Matigi i ka Ala diyanakow kɛ, nafoloba b'i fɛ.»