Read dyu Tobi ka kitabu 5 Bible Online

Tobi ka kitabu 5 - dyu bible

Tobi ka kitabu 5

¹Tobiya y'a facɛ Tobi jaabi ko: «N faa, i ye min fɔ ne ye, ne bena o bɛɛ kɛ.

²Nga ne ni Gabayɛli te ɲɔgɔn lɔn, ne bena se ka wari nin minɛ cogo di? Ne bena mun kɛ ka n yɛrɛ yira a la, janko a ka se ka ne lɔn, ani ka la ne la, ka wari nin di ne ma? Ne te Mɛdi sira lɔn fana!»

³Tobi y'a jaabi ko: «An tun ye sɛbɛ dɔ dilan, ale y'a bulonɔ bila a kan, ne fana ye n ta bil'a kan. Ne y'a faran fila ye. Ale tora n'a tilan kelen ye, ka wari fara o kan, kelen fana tora ne bolo. A saan mugan filɛ, ne ye wari nin mara yen. Sisan n deen, i ka mɔgɔsɔbɛ dɔ ɲini min bena i bila sira, an bena o tigi sara n'aw kɔsegira tuma min na. Ayiwa, taga wari nin minɛ Gabayɛli fɛ.»

⁴Tobiya bɔra ko a be taga mɔgɔ ɲini min b'o sira lɔn kosɔbɛ, n'a bena se k'a bila sira fɔɔ Mɛdi jamana na. A ye mɛlɛkɛ Arafayɛli lɔnin sɔrɔ kɛnɛma a ɲafɛ, nga a m'a lɔn ko Ala ka mɛlɛkɛ lo.

⁵A y'a fɔ a ye ko: «N teri, i bɔra min?» Mɛlɛkɛ y'a jaabi ko: «Ne ye i balima Isirayɛliden dɔ ye, ne nana yan janko ka baara ɲini.» Tobiya y'a fɔ a ye ko: «I be Mɛdi sira lɔn wa?»

⁶Mɛlɛkɛ y'a jaabi ko: «Ɔnhɔn, ne tagara yen siɲɛ caaman, n be sira nunu bɛɛ lɔn kosɔbɛ. Ne ye n ka taama caaman minw kɛ o yɔrɔ la, ne jigira an balima Gabayɛli fɛ Aragɛsi dugu kɔnɔ, Mɛdi jamana na. Tile fila taama be Ɛkibatani ni Aragɛsi cɛ, [1] o dugu fila nunu be kuluw yɔrɔ la.»

⁷Tobiya y'a fɔ a ye ko: «Ne kɔnɔ, n tericɛ, ne be taga n facɛ lasɔmi ka na. Ne mako b'i la, i ka ne bila sira, n bena i sara.»

⁸Mɛlɛkɛ ko: «Ayiwa, n b'i kɔnɔ yan, nga i kana mɛn.»

⁹Tobiya segira soo k'a facɛ lasɔmi, a ko: «Ne ye mɔgɔ dɔ sɔrɔ, an balima Isirayɛliden dɔ lo.» Tobi y'a fɔ a ye ko: «N deen, a wele ko a ka na, ne k'a lɔn a bɔra fadenyabolo min na, an'a buruju, janko k'a lɔn ni an be se k'an jigi la a kan, a k'i bila sira.»

¹⁰Tobiya bɔra k'a wele ko: «N tericɛ, n facɛ mako b'i la.» Mɛlɛkɛ donna soo kɔnɔ. Tobi kɔnna k'a fo. A y'a laminɛ ko: «Ala ka hɛrɛ kɛ i ye kosɔbɛ.» Tobi ko: «Ne be se ka hɛrɛ sɔrɔ tugu cogo di? N ɲaa cɛnna pewu, n te se ka tile ye tugu, n be dibi kɔnɔ i n'a fɔ suu, min te yeli kɛ tugu. Ne bɛ ɲanamanw ni suuw cɛ, n be mɔgɔw kumakan mɛn, nga n t'u ye.» Mɛlɛkɛ y'a fɔ a ye ko: «I jaa gwɛlɛya! Ala bena i kɛnɛya yanni dɔɔni, o la, e k'i jaa gwɛlɛya!» Tobi y'a fɔ a ye ko: «N deen Tobiya b'a fɛ ka taga Mɛdi. I bena se k'a bila sira ka to ka sira yir'a a la wa? Ne bena i sara, n balimacɛ.» A y'a jaabi ko: «Ne be se k'a bila sira. Ne be sira nunu bɛɛ lɔn. Ne tagara Mɛdi siɲɛ caaman, k'o mara kɛnɛyɔrɔw n'a kuluyɔrɔw bɛɛ yaala, ne b'o yɔrɔw siraw bɛɛ lɔn kosɔbɛ.»

¹¹Tobi y'a fɔ a ye ko: «N balimacɛ, i ka somɔgɔw ye jɔnw ye? I buruju ye jumɛn ye? A fɔ ne ye, n balimacɛ.»

¹²Mɛlɛkɛ ko: «Mun na i b'a fɛ k'o lɔn?» Tobi y'a fɔ a ye ko: «N balimacɛ, ne b'a fɛ k'a lɔn sɔbɛ la, i ye jɔn deen ye, ani i tɔgɔ.»

¹³Mɛlɛkɛ y'a jaabi ko: «Ne ye Ananiyasi kɔrɔba deen ye. I balima dɔ lo. Ne tɔgɔ ko Azariya.»

¹⁴Tobi y'a fɔ a ye ko: «E ni ce, n balimacɛ. Ala ka to n'i ye! Ne tun b'a fɛ ka tiɲɛ lɔn i somɔgɔw ka koo la, kana jigi n na o kosɔn. I ye ne balima dɔ ye, i ka mɔgɔw ka ɲi kosɔbɛ. Ne ye Semeliyasi kɔrɔba dencɛ fila nunu lɔn kosɔbɛ, Ananiyasi ni Natan. U tun be to ka taga ni ne ye Zeruzalɛmu, n'an be batoli kɛ ɲɔgɔn fɛ. U ma siraɲuman bila. I balimaw ye mɔgɔɲumanw ye, i bɛmaw ka ɲi. Ala ka sira diya.»

¹⁵A y'a fɔ tugu ko: «Ne bena i sara tile o tile, warigwɛ kuru kelen, dumunifɛn minw bena di ne dencɛ ma, o ɲɔgɔn bena d'i ma fana.

¹⁶N'i ye ne deen bila sira ka ɲa, n bena dɔ fara i ka sara kan.»

¹⁷Mɛlɛkɛ ko: «Ayiwa, ne ben'a bila sira. I kana siran, an bena taga hɛrɛ la ka segi yan hɛrɛ la. Bari siranyako tɛ sira nin na.» Tobi y'a fɔ a ye ko: «Ala ka hɛrɛ kɛ i ye, n balimacɛ!» O kɔ, a y'a deen wele k'a fɔ a ye ko: «N deen, i mako bena se fɛɛn min ma taama nin na, i k'o labɛn, ka taga n'i balimacɛ ye. Sankolotigi Ala k'aw mara o yɔrɔ la, k'aw ɲuman segi ne fɛ! A ka mɛlɛkɛ k'aw bila sira k'aw kɔlɔsi, n deen!» Tobiya bɔra ko a be sira ta tuma min na, a y'a bolo meleke a facɛ n'a bamuso kaan na k'u fo. Tobi y'a fɔ a ye ko: «Ala ka sira diya!»

¹⁸A bamuso daminɛna ka kasi, a y'a fɔ Tobi ye ko: «Mun na i y'a kɛ ne deen tagara do? Ale lo te an bololabere ye wa? Ale min be to ka bɔ ka na.

¹⁹Nafa jumɛn be wari caaman sɔrɔ la? An deen man fisa ni wari ye wa?

²⁰Matigi y'an bila yɔrɔ min na, o k'an wasa!»

²¹A cɛɛ y'a fɔ a ye ko: «I kana hami, an deen ka taama bena diya, a taatɔ n'a segitɔ fɔɔ yan. Loon min na a ɲuman bena segi i fɛ, i ben'o ye.

²²I kana hami, kana siran n'u ye, ne muso. Mɛlɛkɛɲuman ben'a bila sira, a ka taama bena ɲa, a bena kɔsegi hɛrɛ la.»

²³O kɔ, a muso ye kasi dabila.