Read dyu Tobi ka kitabu 6 Bible Online

Tobi ka kitabu 6 - dyu bible

Tobi ka kitabu 6

¹Kanbelen ni mɛlɛkɛ ye sira minɛ ɲɔgɔn fɛ, wulu fana tagara n'u ye k'u bila sira. Suu fɔlɔ min y'u ko, u lɔra Tigiri bada la ka si yen.

²Kanbelen jigira ka ta'a seen ko Tigiri baji la. Jigɛ belebeleba dɔ panna ka bɔ jii kɔnɔ. A tun b'a fɛ ka kanbelen seen kelen kunun, kanbelen kulera.

³Mɛlɛkɛ y'a fɔ a ye ko: «A minɛ ka ɲa kosɔbɛ!» Kanbelen sera jigɛ kɔrɔ, a y'a sama ka bɔ jii la k'a bila bada la.

⁴Mɛlɛkɛ y'a fɔ a ye ko: «A boso k'a kunakuna n'a dusukun n'a biɲɛ bɔ k'u bila gɛrɛfɛ, k'a kɔnɔnugu fili. Tiɲɛ na, a kunakuna n'a dusukun ani a biɲɛ ye furaɲuman ye.»

⁵Kanbelen ye jigɛ nin boso, k'a kunakuna n'a dusukun n'a biɲɛ bɔ, ka sɔrɔ k'a yɔrɔ dɔ jɛni k'o dumu, ani ka kɔgɔ kɛ a tɔɔ la janko k'a mara.

⁶O tɛmɛnin kɔ, u fila y'u ka sira minɛ tugu fɔɔ ka taga se Mɛdi jamana daan na.

⁷K'u to sira kan, kanbelen ye mɛlɛkɛ ɲininga ko: «N balimacɛ Azariya, jigɛ dusukun n'a biɲɛ n'a kunakuna ye fura sifa jumɛn le ye?»

⁸Mɛlɛkɛ y'a jaabi ko: «Ni cɛɛ, walima muso dɔ tɔɔrɔnin be jina bolo, walima Sutana ka nijugu dɔ fɛ, i ka jigɛ dusukun n'a biɲɛ kɛ k'o tigi wusu. O sisi bena jina, walima nijugu nin gwɛn, min tun b'a kɛlɛ. O la, a tena o tigi tɔɔrɔ tugu abada.

⁹Min ye kunakuna ye, ni gwɛɛ be mɔgɔ dɔ ɲaa kan, i k'o mɔn a tigi ɲaa na, ani k'i dafiɲɛ fiyɛ o gwɛɛ kan, a tigi bena kɛnɛya.»

¹⁰U donna Mɛdi jamana na. U gwɛrɛla Ɛkibatani la tuma min na,

¹¹Arafayɛli y'a fɔ kanbelen ye ko: «N balimacɛ Tobiya!» A y'a jaabi ko: «Naamu.» A y'a fɔ a ye ko: «Bii sufɛ, an ka kan ka si Araguwɛli fɛ, i ka somɔgɔ dɔ lo. Denmuso b'a fɛ, a tɔgɔ ko Sara.

¹²Dencɛ t'a fɛ, denmuso wɛrɛ t'a fɛ ni Sara tɛ. I ka surun a la balimaya la ka tɛmɛ tɔw bɛɛ kan, e le ka kan k'a furu, k'a facɛ cɛɛn ta fana. Sunguru nin ye hakilitigi ye, a jaa ka gwɛlɛ, a cɛɛ ka ɲi kosɔbɛ, a facɛ ye mɔgɔɲuman ye.

¹³A bɛnnin lo i k'a furu. Sɔn n ka fɔta la, n balimacɛ. Bii suu nin na, ne bena kuma sunguru nin facɛ fɛ janko a ka sɔn k'a d'i ma. N'an segira ka bɔ Aragɛsi tuma min na, an ben'a ka kɔɲɔya kɛ. Ne b'a lɔn ko Araguwɛli te se ka ban k'a d'i ma cogo si la. A te se k'a maminɛ mɔgɔ wɛrɛ ye fana, bari n'a y'o kɛ, o bena kɛ sababu ye u b'a faga ka kɛɲɛ ni Musa ka kitabu kɔnɔnakuma ye. Sabu a b'a lɔn ko ele ye mɔgɔ fɔlɔ ye a denmuso furubagaw cɛma. O la, sɔn n ka fɔta la, n balima, bii sufɛ yɛrɛ ne ni Araguwɛli bena kuma sunguru nin ka koo la, k'a ka furuko ɲanabɔ i fɛ. N'an segira ka bɔ Aragɛsi tuma min na, an ben'a minɛ ka taga n'a ye i ka soo.»

¹⁴Tobiya y'a fɔ Arafayɛli ye ko: «N balimacɛ Azariya, ne y'a mɛn ko a dira furu la siɲɛ wolonwula ka ye, ko a furucɛ nunu bɛɛ sara kɔɲɔbon kɔnɔ. Sufɛ ni u ko u be gwɛrɛ a la dɔrɔn, u be sa. N y'a mɛn dɔw fɛ ko jina le tun be to k'u faga.

¹⁵O kama, ne be siran. A te kojugu kɛ sunguru la, nga ni cɛɛ b'a fɛ ka gwɛrɛ a la dɔrɔn, a b'o tigi faga. Ne ye deen kelenpe ye n faa fɛ. Ni ne sara, o bena kɛ sababu ye ne facɛ ni n bamuso be sa dusukasi bolo. Deen wɛrɛ t'u fɛ k'u suu don.»

¹⁶Arafayɛli y'a fɔ a ye ko: «I ɲinɛna i facɛ ka ladiliw kɔ wa? Ko i ka kan ka muso ta i fasodenw cɛma. Ayiwa n balimacɛ, sɔn ne ka fɔta la ka Sara furu, kana hami ni jina nin ka koo ye. N b'a lɔn fana ko bii sufɛ yɛrɛ, u ben'a d'i ma.

¹⁷Nga n'i donna kɔɲɔbon na tuma min na, i ka jigɛ biɲɛ kunkurunnin ta, n'a dusukun, k'u bila wusulandaga kɔnɔ takami kan. A kasa bena wili, jina ben'o mɛn ka boli, a tena na sunguru nin gɛrɛfɛ tugu abada.

¹⁸N'i b'a fɛ ka jɛn n'a ye tuma min na, aw fila ka wili fɔlɔ ka Matigi dali, ale min ye Sankolotigi ye, ko a ka makari aw la k'aw kisi. Kana siran, bari Ala y'a latigɛ kabini fɔlɔfɔlɔ ko a ka kɛ i ta ye, e le ben'a kisi. A bena tugu i kɔ. Ne b'a fɔ i ye ko siga t'a la, i bena deenw sɔrɔ a fɛ minw koo bena diya i ye kosɔbɛ. Kana hami.»

¹⁹Tobiya ye Arafayɛli ka kuma nunu mɛn tuma min na, k'a lɔn ko sunguru nin y'a balimamuso ye, ko ale ka siya dɔ yɛrɛ lo, k'a bɔra ale faso la, o tuma na, sunguru nin koo diyar'a ye kosɔbɛ, a y'a kanu kosɔbɛ.