Read dyu Tobi ka kitabu 7 Bible Online

Tobi ka kitabu 7 - dyu bible

Tobi ka kitabu 7

¹U sera Ɛkibatani, Tobiya y'a fɔ ko: «N balimacɛ Azariya, tilen ni ne ye an balimacɛ Araguwɛli fɛ.» Mɛlɛkɛ y'a bila sira fɔɔ ka taga se Araguwɛli fɛ. U y'a siginin sɔrɔ luda la, u kɔnna k'a fo. A y'u jaabi ko: «Ne b'aw fo kosɔbɛ, n balimaw, aw dansɛ.» A y'u ladon a ka soo kɔnɔ.

²A y'a fɔ a muso Ɛdina ye ko: «Kanbelen nin bɔni be ne balimacɛ Tobi fɛ kosɔbɛ!»

³Ɛdina y'u ɲininga ko: «An balimaw, aw bɔra min?» U y'a jaabi ko: «An bɔra Ninivu, Nɛfutali kɔmɔgɔ minw tun minɛna ka taga Ninivu, an ye olu dɔw ye.»

⁴Muso y'a fɔ u ye ko: «Aw be an balima Tobi lɔn wa?» U y'a jaabi ko: «Ɔnhɔn, an b'a lɔn.»

⁵Muso ko: «A ka kɛnɛ wa?» U ko: «A ka kɛnɛ, a be sii la halibi.» Tobiya y'a fɔ ko: «Ne facɛ lo.»

⁶Araguwɛli panna ka wili k'a bolow meleke a kaan na ka daminɛ ka kasi. O kɔ, a y'a fɔ a ye ko: «Ala k'i dɛmɛ, n deen! Aa! I facɛ tun ye mɔgɔtilennin ye, n'a bɛ fantanw sɔn kosɔbɛ, ale ka kɛ fiɲɛntɔ ye, o ye bɔnɛ ye dɛ!» K'a bolo melekenin to Tobiya kaan na, a daminɛna ka kasi tugu.

⁷A muso Ɛdina n'u denmuso Sara fana kasira Tobi ka koo la.

⁸O kɔ, Araguwɛli ye sagajigi bɔ sagakulu la k'a faga, a y'u minɛ ka ɲa kosɔn.

⁹U kora ka ban tuma min na, u sigira dumuni na. Tobiya y'a fɔ Arafayɛli ye ko: «N balimacɛ Azariya, a ɲini Araguwɛli fɛ ko a ka ne balimamuso Sara di ne ma furu la.»

¹⁰Araguwɛli y'o kuma nin mɛn minkɛ, a y'a fɔ kanbelen ye ko: «Dumuni kɛ ka minni kɛ, ka nisɔndiya bii suu nin na. Bari mɔgɔ si te se ka ne denmuso Sara furu ni ele tɛ, ne balima. Ne te se k'a di mɔgɔ wɛrɛ ma, ni e tɛ, bari e le ka surun ne la balimaya la. O bɛɛ n'a ta, n deen, ne bena tiɲɛ bɛɛ fɔ i ye.

¹¹Ne y'a di an balima Isirayɛlidenw mɔgɔ wolonwula ma ka ye. Sufɛ, n'u ko u be jɛn n'a ye, u be sa. Nga sisan n deen, i ka dumuni kɛ ka minni kɛ, Matigi bena i dɛmɛ.»

¹²Nga Tobiya ko: «Ne tena foyi dumu, n tena foyi min yan, n'i ma koo nin perepere latigɛ.» Araguwɛli y'a fɔ a ye ko: «Ayiwa! Ne ben'o kɛ. A dira i ma ka kɛɲɛ ni Musa ka kitabu kɔnɔnakuma ye, Sankolotigi sago lo a ka d'i ma. A kɛ i muso ye. Kabini sisan, e kɛr'a cɛɛ ye, a kɛra i muso ye. A dira i ma k'a ta bii ma fɔɔ tuma bɛɛ. Matigi min ye Sankolotigi ye, ale ben'a kɛ aw be si hɛrɛ la bii suu nin na, n deen. A ka makari aw la ka hɛrɛ kɛ aw ye!»

¹³Araguwɛli y'a denmuso Sara wele, a nana. A y'a minɛ a bolo ma k'a di Tobiya ma k'a fɔ ko: «A minɛ a ka kɛ i muso ye ka kɛɲɛ ni Musa ka sariyasɛbɛ kɔnɔnakuma ye. A minɛ ka taga n'a ye hɛrɛ la i facɛ fɛ. Sankolotigi Ala k'aw bila sira hɛrɛ la, ani ka se n'aw ɲuman ye!»

¹⁴O kɔ, a ye Sara bamuso wele k'a fɔ a ye ko a ka na ni sɛbɛnnikɛminanw ye. A ye furusɛbɛ labɛn, ko a b'a denmuso di Tobiya ma furu la ka kɛɲɛ ni Musa ka sariyasɛbɛ kɔnɔna ta ye. O kɔ, u y'a daminɛ ka dumuni kɛ ani ka minni kɛ.

¹⁵Araguwɛli y'a muso Ɛdina wele k'a fɔ a ye ko: «N muso, i ka boon filanan labɛn ka taga ni an denmuso ye yen.»

¹⁶A muso tagara dilan labɛn boon nin kɔnɔ ka kɛɲɛ n'a cɛɛ ka kuma ye. A tagara n'a denmuso ye o boon kɔnɔ. A daminɛna ka kasi a kosɔn. O kɔ, a y'a ɲaji cɛ k'a fɔ a ye ko:

¹⁷«I jaa gwɛlɛya, n denmuso! Matigi min ye Sankolotigi ye, ale k'i ka dusukasi yɛlɛma k'a kɛ nisɔndiya ye. I jaa gwɛlɛya, n denmuso!» O kɔ, a bɔra.