Read dyu Tobi ka kitabu 8 Bible Online

Tobi ka kitabu 8 - dyu bible

Tobi ka kitabu 8

¹U tilara dumuni na tuma min na, latuma sera. U tagara ni kanbelen ye o boon nin kɔnɔ.

²Tobiya hakili jigira Arafayɛli ka kumaw la. A ye jigɛ biɲɛ n'a dusukun bɔ a ka bɔɔrɔ kɔnɔ k'u bila wusulandaga kɔnɔ, takami kan.

³Jigɛ kasa ye jina gwɛn, a ye boli ta fɔɲɔ fɛ ka taga fɔɔ Ezipiti jamana na. Arafayɛli tugur'a kɔ ka ta'a minɛ k'a siri ni jɔrɔkɔ ye yɔrɔnin kelen.

⁴U ye Tobiya to yen ka boon daa tugu. A wilila ka bɔ dilan kan k'a fɔ Sara ye ko: «Ne muso, wili, an k'an Matigi dali ko a ka makari an na k'an kisi.»

⁵Sara wilila. U y'a daminɛ ka Matigi dali, k'a ɲini a fɛ ko a k'u kisi. Tobiya y'a fɔ ko: «An faaw ka Ala, an b'i tanu! I tɔgɔ ka tanu waati nataw bɛɛ la! Sankolo kɔnɔ danfɛnw ni dugukolo kan taw bɛɛ k'i tanu tuma bɛɛ!

⁶ Ele le ye Adama dan, e le ye dɛmɛbaga ni bolo layɔrɔ labɛn a ye, min ye a muso Awa ye. Adamadenw bɛɛ bɔra u mɔgɔ fila nunu na. Ele le y'a fɔ ko: ‹Cɛɛ ka to a kelen na, o ma ɲi, an ka dɛmɛbaga labɛn a ye, min y'a bɔɲɔgɔnko ye.›

⁷«O la sisan, musoko nigɛ te ne bilara muso nin furu la, nga ne b'a fɛ k'i ka kuma bato le, min ye tiɲɛkuma ye. Makari ne ni n muso la, a to an ka sijan sɔrɔ ɲɔgɔn fɛ.»

⁸O kɔ, u y'a fɔ ɲɔgɔn fɛ ko: «Amiina, amiina!»,

⁹ka sɔrɔ ka la.

¹⁰Waati dɔɔni tɛmɛnin kɔ, Araguwɛli wilila k'a ka baaradenw wele ko u ka taga kaburu sogi, u tagara. A tun b'a miiri ko: «Ni kanbelen nin sara, o tuma na, mɔgɔw bena yɛlɛ an ma k'an nɛni.»

¹¹U ye kaburu sogi ka ban tuma min na, Araguwɛli segira soo k'a muso wele

¹²k'a fɔ a ye ko: «I ka baaraden musomanw dɔ ci ka taga boon kɔnɔ k'a filɛ ni Tobiya be nii na. N'a sara, an bena se k'a suu don ni mɔgɔ ma bɔ an kala ma.»

¹³U ye baara denmusomanw dɔ wele ka fitinɛ don a bolo ka daa yɛlɛ. A donna k'a sɔrɔ u be sinɔgɔra kosɔbɛ ɲɔgɔn fɛ.

¹⁴A bɔra k'a fɔ u ye ko: «A be nii na, hɛrɛ be yen!»

¹⁵O la, Araguwɛli ye Sankolotigi Ala tanu k'a fɔ ko: «Ala, mɔgɔ o mɔgɔ kɔnɔ gwɛnin lo, i ka kan ni olu ka tanuli ye! U k'i tanu waati bɛɛ la!

¹⁶Ne b'i fo, bari, i ye ne nisɔndiya kosɔbɛ! Bari ne tun be miiri ko a bena kɛ cogo min na, a ma kɛ ten, i makarila an na k'an dɛmɛ.

¹⁷Ne b'i fo bari i hinɛna deen fila nunu na, deen wɛrɛ te minw wolobagaw fɛ! Matigi, makari u la k'u mara k'a to u be sigi hɛrɛ la i barika la!»

¹⁸O kɔ, Araguwɛli y'a fɔ a ka baaradenw ye ko u ka kaburu nin tugu sanni dugu ka gwɛ.

¹⁹Araguwɛli y'a fɔ a muso ye ko a ka buru caaman labɛn. O kɔ, a tagara ka misi fila ni sagajigi naani minɛ a ka begɛnkuluw la ka na n'u ye, k'a fɔ ko u k'o labɛn. U y'a daminɛ ka labɛnni kɛ.

²⁰A ye Tobiya wele k'a fɔ a ye ko: «I bena to yan fɔɔ tile tan ni naani. I ka to yan ka dumuni kɛ, ka minni kɛ ne fɛ. I ben'a kɛ ne denmuso be nisɔndiya tugu, ale min ye tɔɔrɔ caaman sɔrɔ.

²¹O kɔ, i be se ka ne ka nafolo tilan kelen minɛ ka segi i facɛ fɛ hɛrɛ la. Tilan tɔ kelen bena kɛ i ta ye, ne ni n muso sanin kɔ. N deen, la ne la. Ne ye i facɛ ye, Ɛdina ye i bamuso ye. An b'i fɛ, i n'a fɔ an b'i muso fɛ cogo min na, kabini sisan ni tuma bɛɛ. La o la, n deen!»