Read dyu Zuditi ka kitabu 10 Bible Online

Zuditi ka kitabu 10 - dyu bible

Zuditi ka kitabu 10

¹Zuditi tilara dalilijan nin na Isirayɛli ka Ala fɛ tuma min na,

²a wilila k'a ka baarakɛmuso wele. O kɔ, a jigira ka don soo kɔnɔ, a tun be to ka lafiɲɛlonw ni ɲanagwɛlonw kɛ min kɔnɔ.

³Dusukasifani min tun b'a kaan na, a y'o bɔ k'a ka firiyafaniw bɔ a kaan na, ka ko ka tulu kasadiman ɲanaman mɔn, k'a kunsigi lalaga, ka masirifɛn dɔ biri a kuun na, k'a ka ɲanagwɛlon faniɲumanw don, a tun be minw don n'a cɛɛ Manase be sii la.

⁴A ye sanbara don, ka kɔnɔkisɛw ni bololanigɛw ani tulolanigɛw don, n'a ka masirifɛnw bɛɛ, k'a yɛrɛ cɛɛ ɲa kosɔbɛ, janko a yebagaw ɲaa ka bɔ a fɛ.

⁵A ye duvɛnforoko ni tuludaga di a ka baarakɛmuso ma, ka bɔɔrɔ fa mugu la, ni ŋɔmi min dilanna ni yiriden janinw ye, ani burukun dɔw, ni naare. A y'a ka minanw bɛɛ siri ka ɲa k'u kalifa a ka baarakɛmuso ma.

⁶U bɔra ka taga Betuli donda faan fɛ ka taga Oziyasi ni dugu cɛkɔrɔba fila lɔnin sɔrɔ o yɔrɔ la, n'o ye Kabirisi ni Karimisi ye.

⁷Olu y'a ye tuma min na ko a ɲada yɛlɛmana, ni fani wɛrɛ b'a kaan na, a koo diyara u ye kosɔbɛ a ka cɛɲa kosɔn. U y'a fɔ a ye ko:

⁸«An faaw ka Ala k'i ta ɲa, k'a to i ka kokɛtaw ka ɲa, Isirayɛlidenw ka kunkɔrɔta, ni Zeruzalɛmu ka boɲa kosɔn!»

⁹Zuditi ye Ala bato, ka sɔrɔ k'a fɔ u ye ko: «Aw y'a fɔ k'u ka dugu donda yɛlɛ ne ye, an ye koo min fɔ, ne bena bɔ ka taga o kɛ.» U y'a fɔ kanbelenw ye ko u ka daa yɛlɛ a ye i ko a y'a fɔ cogo min na.

¹⁰U y'a kɛ ten, Zuditi bɔra n'a ka baarakɛmuso ye. Dugumɔgɔw tora k'a filɛ fɔɔ a jigira ka taga dingɛ tigɛ, o kɔ, u m'a ye tugu.

¹¹Zuditi n'a ka baarakɛmuso tilenna ka taga dingɛyɔrɔ la. Asiri kɛlɛden kɔlɔsilikɛbaga dɔw nan'a kunbɛn.

¹²U y'a lalɔ k'a ɲininga ko: «I ye siya jumɛn le ye? I bɔra min? I be taga min?» A y'u jaabi ko: «Ne ye eburusunguru ye, ne be bolila ka bɔ u fɛ bari yanni dɔɔni u bena don aw bolo.

¹³Ne kɔni, ne nana janko k'aw ka kɛlɛmasa Olofɛrine ye, ka na tiɲɛkuma fɔ a ye. Ne bena sira yira a la, a ka kan ka min ta janko ka se ka kuluyɔrɔ nin bɛɛ minɛ, ni a ka mɔgɔ si fana tena to kɛlɛ nin na.»

¹⁴Kɛlɛden nunu y'a ka kuma mɛn ani k'a ɲada ye fana. A tun cɛɛ ka ɲi u ɲana kosɔbɛ. U y'a fɔ a ye ko:

¹⁵«I teliyara ka jigi ka na an matigi ye minkɛ, i kisira. Sisan, na an dɔw bena i bila sira fɔɔ ka taga se a ka faniso kɔnɔ.

¹⁶N'i ser'a ɲakɔrɔ tuma min na, i kana siran, i ye min fɔ sisan, i ka segi k'o fɔ, a bena i minɛ ka ɲa.»

¹⁷U ye mɔgɔ kɛmɛ woloma u cɛma, olu farala ale n'a ka baarakɛmuso kan, k'a bila sira fɔɔ ka taga se Olofɛrine ka faniso la.

¹⁸Mɔgɔw girinna ka na ka bɔ kɛlɛdenw ka sigiyɔrɔ faan bɛɛ la, bari a nako tun fɔra fanisow bɛɛ la. U nan'a lamini Olofɛrine ka faniso daa la. A tun be o yɔrɔ la n'u b'a koo fɔra Olofɛrine ye.

¹⁹U ɲaa bɔr'a fɛ a ka cɛɲa kosɔn, u kabakoyara u m'a lɔn ko muso nin ɲɔgɔn be sɔrɔ Isirayɛlidenw cɛma. U tun b'a fɔra ɲɔgɔn ye ko: «Jɔn be se ka siya nin dɔgɔya, muso nin ɲɔgɔnw be minw fɛ? U fagako faan fɛ, k'u ka mɔgɔ kelen yɛrɛ dɔrɔn to nii na, farasi b'o la. Mɔgɔ minw mana kisi u cɛma, olu be se ka dugukolo kan mɔgɔw bɛɛ namara!»

²⁰Olofɛrine kɔlɔsibagaw n'a ka kɛlɛkuntigiw bɛɛ bɔra, ka sɔrɔ ka Zuditi to donna faniso kɔnɔ.

²¹Olofɛrine tun be lafiɲɛna a ka dilan kan, sanke kɔrɔ min tun dilanna ni faniwulen sɔngɔgwɛlɛn ye, ni sanu, ani emerodi ni kabakuru sɔngɔgwɛlɛn sifa dɔ wɛrɛw.

²²U ye Zuditi koo fɔ a ye, a wilila ka taga faniso daa la, mɔgɔ dɔw bilar'a ɲa ni fitinɛ warigwɛlamanw ye u bolo.

²³Zuditi sera Olofɛrine n'a ka kɛlɛkuntigiw fɛ, u bɛɛ ɲaa bɔr'a fɛ a ka cɛɲa kosɔn. A y'a kunbiri gwan k'a ɲaa biri duguma a kɔrɔ, Olofɛrine ka baarakɛlaw y'a wili k'a lɔ.