Read dyu Zuditi ka kitabu 12 Bible Online

Zuditi ka kitabu 12 - dyu bible

Zuditi ka kitabu 12

¹Olofɛrine y'a fɔ ko u ka siyɔrɔ di Zuditi ma a ka dumunikɛyɔrɔ la, warigwɛminanw be yɔrɔ min na, ko u ka dɔ bɔ ale ka dumuni, n'a ka duvɛn na k'a d'a ma.

²Nga Zuditi ko: «Ne te se k'o dumuni nin kɛ, n'o tɛ, a be se ka kɛ sababu ye ne be ne ka Ala ka sariya cɛn. Ne nana ni fɛɛn min ye, ne bena o le dumu.»

³Olofɛrine y'a fɔ a ye ko: «N'i ka dumuni banna tuma min na, an bena o ɲɔgɔn sɔrɔ min k'o d'i ma? I ka siya mɔgɔ si do te an fɛ yan.»

⁴Zuditi y'a fɔ a ye ko: «K'i to sii la, ne matigi, fɛɛn min be ne fɛ, i ka jɔnmuso tena o bɛɛ dumu ka ban ni Matigi m'a ka koo latigɛnin kɛ ne barika la.»

⁵O kɔ, Olofɛrine ka kɛlɛkuntigiw tagara n'a ye faniso dɔ kɔnɔ. A lara ka sinɔgɔ fɔɔ dugutilama. Dugu tun be ɲini ka gwɛ tuma min na, a wilila.

⁶A ye cira sama Olofɛrine ma ko: «Ne matigi k'a fɔ k'u ka sira di i ka jɔnmuso ma a ka bɔ ka taga Ala dali.»

⁷Olofɛrine y'a fɔ a ka kɔlɔsibagaw ye k'u kan'a bali. Zuditi tora u ka sigiyɔrɔ la fɔɔ tile saba. Sufɛ, a be to ka taga dingɛyɔrɔ la min be Betuli gɛrɛfɛ, ka ko jii bɔyɔrɔ la. [1]

⁸A bɔtɔ o yɔrɔ la, a tun be Matigi, Isirayɛli ka Ala dali ko a ka sira yira ale la, a ka kokɛtaw ka se k'a ka siya kisi.

⁹A yɛrɛ saniyanin kɔ, a tun be taga to faniso kɔnɔ fɔɔ wulafɛ, u be na n'a ka dumuni ye tuma min na.

¹⁰Tile naaninan loon, Olofɛrine ye dumuniba labɛn a ka baarakɛlaw dama ye, a m'a ka kɛlɛkuntigiw si wele.

¹¹A y'a fɔ a ka baaraden Bagowasi ye, min tun ye a ka koow bɛɛ ɲanabɔbaga ye, ko: «I be eburumuso min kɔlɔsila, taga kuma a fɛ k'a nigɛnigɛ ko a ka na an fɛ ka dumuni kɛ ani ka minni kɛ n'an ye.

¹²Bari a bena kɛ maloya ye an fɛ n'an ye muso nin ɲɔgɔn to yen n'an ma la n'a ye. N'an t'a nigɛ k'an yɛrɛ mako ɲa n'a ye, a bena yɛlɛ an ma.»

¹³Bagowasi bɔra Olofɛrine kɔrɔ ka taga don Zuditi fɛ k'a fo ko: «E musoɲuman nin, i kana siga ka na ne matigi fɛ, o ye boɲa ye i fɛ. I bena duvɛn min n'an ye, i nisɔn be diya bii i n'a fɔ Asirikaw denmusow dɔ, minw be Nabukodonozɔri ka soo kɔnɔ.»

¹⁴Zuditi y'a jaabi ko: «Ne ye jɔn ye ni ne be n matigi sɔsɔ? Koo o koo diyara a ye, ne bena o kɛ teliya la, o bena kɛ nisɔndiya ye ne fɛ fɔɔ ne salon.»

¹⁵A wilila k'a ka faniw don n'a ka masirifɛnw bɛɛ, a ka jɔnmuso donna ka sagagolow la duguma Olofɛrine ɲa, Zuditi tɔgɔ la, Bagowasi tun ye minw d'a ma janko a ka la u kan loon o loon ka dumuni kɛ.

¹⁶Zuditi donna ka la, a yenin ye Olofɛrine dusu n'a hakili bɛɛ ɲagami, a nigɛ y'a minɛ kosɔbɛ, a tun b'a fɛ ka jɛn n'a ye. Kabini a tun y'a ye loon min na, a tun b'a la ka waatiɲuman ɲini k'a sungurutigɛ.

¹⁷Olofɛrine y'a fɔ a ye ko: «Minni kɛ ka nisɔndiya n'an ye.»

¹⁸Zuditi y'a jaabi ko: «Matigi, ne bena minni kɛ bari ne ye boɲa sɔrɔ bii, ne ma deli ka min ɲɔgɔn sɔrɔ kabini ne wololon.»

¹⁹A ka jɔnmuso tun ye fɛɛn min labɛn a ye, a y'o minɛ k'a dumu ani ka minni kɛ Olofɛrine ɲana.

²⁰Olofɛrine nisɔndiyanin tun lo a kosɔn, a ye duvɛn caaman min. A ye min min o loon na, a tun ma deli k'o ɲɔgɔn min ka ye loon kelen kɔnɔ kabini a wololon.