Read dyu Zuditi ka kitabu 14 Bible Online

Zuditi ka kitabu 14 - dyu bible

Zuditi ka kitabu 14

¹Zuditi y'a fɔ u ye ko: «Aw ye mɛnni kɛ ne fɛ, n balimaw. Aw ye kungolo nin minɛ k'a dulon an ka dugu laminikogo sanfɛ.

²Sɔgɔmada joona, tilekun bɔtuma na, aw kelen kelen bɛɛ k'aw ka kɛlɛkɛminanw ta. Mɔgɔ minw bɛɛ ka kɛnɛ, olu ka bɔ dugu kɔnɔ, ka mɔgɔ dɔ woloma ka kɛ u ɲamɔgɔ ye. U k'a kɛ i n'a fɔ u be jigira ka taga kɛnɛyɔrɔ la, Asirikaw ka kɛlɛdenw kɔlɔsilikɛbagaw faan fɛ. Nga aw kana jigi.

³U bena u ka minanw ta ka taga u ka sigiyɔrɔ la, ka Asiri kɛlɛdenw ɲamɔgɔw kunun, olu bena boli ka taga Olofɛrine ka faniso la, nga u ten'a sɔrɔ yen. Siranya bena u minɛ, u bena boli aw ɲa ka taga fɔɔ yɔrɔjan.

⁴Aw ni Isirayɛli jamanadenw bena tugu u kɔ k'u faga u ka sira kan.

⁵Nga sanni aw k'o kɛ, aw ka amonicɛ Akiyɔri wele ka na ne fɛ, janko mɔgɔ min ye Isirayɛlidenw dɔgɔya, k'a ci an ma i n'a fɔ a be tagara fagayɔrɔ la, a ka se k'o tigi kungolo ye k'a lɔn.»

⁶U tagara Akiyɔri wele Oziyasi ka soo kɔnɔ. A sera tuma min na, a ye Olofɛrine kuun ye mɔgɔ dɔ bolo jama cɛma, a kirinna ka bɔ ka ben a daa kan.

⁷U y'a wili tuma min na, a birila Zuditi seen kɔrɔ, k'a ɲaa biri duguma, k'a fɔ ko: «I ka tanu Zuda mara soow bɛɛ kɔnɔ, ani siyaw bɛɛ cɛma. Minw mana i koo mɛn, u hakili bɛ ɲagami.

⁸Sisan, i ye koo min bɛɛ kɛ tile fila nin na, i k'o bɛɛ fɔ ne ye.» Zuditi tun ye koo min bɛɛ kɛ kabini a bɔtuma na u fɛ fɔɔ ka na se o waati ma, a y'o bɛɛ ɲafɔ a ye jama ɲana.

⁹A tilara kuma na tuma min na, jama y'u kaan kɔrɔta k'a tanu, ka mankanba kɛ dugu kɔnɔ nisɔndiya la.

¹⁰Isirayɛli ka Ala ye koo min bɛɛ kɛ, Akiyɔri y'o ye tuma min na, a y'a jigi la Ala kan kosɔbɛ. U y'a kɛnɛkɛnɛ, a tora Isirayɛlidenw fɛ ka jati u dɔ ye fɔɔ ka na se bii ma.

¹¹O dugusagwɛ sɔgɔmada joona, u ye Olofɛrine kungolo dulon dugu laminikogo la. U kelen kelen bɛɛ y'a ka kɛlɛkɛminanw ta, bɛɛ bɔra jɛnkulu jɛnkulu, ka taga kulu jigijigiyɔrɔw faan fɛ.

¹²Asiri kɛlɛdenw y'u ye tuma min na, u ye cira bila ka taga o fɔ u kuntigiw ye, olu tagara o fɔ u kuntigiw bɛɛ ye.

¹³Olu tagara Olofɛrine ka faniso la k'a fɔ Olofɛrine ka koow ɲanabɔbaga Bagowasi ye ko: «An matigi kunun! Jɔɔn [1] nunu y'u jaa gwɛlɛya ka jigi ka na k'u be kɛlɛ kɛ n'an ye. U b'a fɛ u bɛɛ ka halaki hali kelen kana to!»

¹⁴Bagowasi donna faniso kɔnɔ k'a tigɛ gosi sibon daa la. A tun be miiri ko Olofɛrine lanin be ni Zuditi ye.

¹⁵Nga mɔgɔ si m'a jaabi minkɛ, a ye fani nin jɛngɛ ka don boon kɔnɔ. A ye Olofɛrine suu filinin ye dilan kɔrɔ sigilan kan, a kuun tun tigɛra ka bɔ yen.

¹⁶Bagowasi kulera kosɔbɛ, ka kasi, ka ŋunan, ka pɛrɛn, k'a ka faniw faran.

¹⁷Zuditi tun be la faniso min kɔnɔ, a donna yen, a m'a ye. A bolila ka taga jama yɔrɔ la ka kule ko:

¹⁸«Jɔɔn nunu y'an namara! Eburumuso kelen dama le ye masacɛ Nabukodonozɔri ka soo bɛɛ maloya! Olofɛrine suu bɛ duguma, a kuun tigɛra ka bɔ yen!»

¹⁹Asiri kɛlɛdenw ɲamɔgɔw y'o kuma mɛn tuma min na, u y'u ka forocaw faranfaran. U hakili ɲagamina kosɔbɛ, u mankan n'u kulekan bɔra fɔɔ ka se kɛlɛdenw sigiyɔrɔ bɛɛ la.