Read dyu Zuditi ka kitabu 15 Bible Online

Zuditi ka kitabu 15 - dyu bible

Zuditi ka kitabu 15

¹Mɔgɔ minw tun be fanisow kɔnɔ, olu y'a mɛn tuma min na k'o koo nin kɛra, u kabakoyara haali.

²Siranyaba y'u minɛ, u jaa tigɛra, mɔgɔ si ma to a tɔɲɔgɔn gɛrɛfɛ, bɛɛ yɛrɛkɛra yɔrɔnin kelen ka boli kɛnɛyɔrɔ ni kuluyɔrɔ siraw bɛɛ fɛ.

³Minw tun siginin be kuluyɔrɔ la Betuli lamini na, olu fana ye boli ta. O kɔ, Isirayɛli kɛlɛdenw bɛɛ girinna u kɔ k'u gwɛn.

⁴Koo min kɛra, Oziyasi ye mɔgɔw ci ka taga Betomɛsitayimu ni Bebayi, ani Koba ni Kola, ani Isirayɛli mara kɔnɔ yɔrɔ bɛɛ, k'o fɔ ani k'a ɲini u fɛ ko u bɛɛ ka bɔ k'u juguw gwɛn, k'u halaki.

⁵Isirayɛlidenw y'o mɛn dɔrɔn, u bɛɛ jɛnna ka ben u kan k'u halaki fɔɔ ka se Koba. Zeruzalɛmukaw fana nana teliya la, ni minw tun be kuluyɔrɔ faan bɛɛ la, bari koo min tun kɛra u juguw ka sigiyɔrɔ la, o tun fɔra u ye. Galaadi ni Galile mara mɔgɔw wilila k'u juguw kɛlɛ minw tun be gɛrɛfɛ k'u caaman faga, fɔɔ ka taga se Damasi n'a mara la.

⁶Betulikaw tɔɔ jigira ka don Asirikaw ka sigiyɔrɔ la, k'u bololafɛnw cɛ ka taga ni nafolo caaman ye.

⁷Isirayɛlidenw segitɔ ka bɔ u fagayɔrɔ la, fɛɛn minw tora, u y'olu cɛ. Mɔgɔ minw tun be dugudenninw ni togodaw la, ni minw tun be kuluyɔrɔ la, ni kɛnɛyɔrɔ la, olu fana y'u juguw ka minan caaman cɛ ka taga n'o ye, bari fɛɛn caaman caaman tun be yen.

⁸Sarakalasebagaw kuntigi Zowakimu ni Isirayɛli cɛkɔrɔbaw ka jɛnkulu minw tun be Zeruzalɛmu, olu nana Betuli. Matigi tun ye koɲuman min kɛ Isirayɛlidenw ye, u tun b'a fɛ k'o ye, ani ka Zuditi fana ye k'a fo.

⁹U donn'a fɛ tuma min na, u bɛɛ y'a tanu ɲɔgɔn fɛ k'a fɔ a ye ko: «I kɛra Zeruzalɛmu ka boɲa sababu ye, ni Isirayɛli ka kunkɔrɔta sababu, ni an ka siya ka jigimafa sababu ye!

¹⁰I yɛrɛ le y'o bɛɛ kɛ! I ye koɲuman kɛ Isirayɛlidenw ye, o diyara Ala ye. Matigi Setigi ka hɛrɛ kɛ i ye tuma bɛɛ!» Jama bɛɛ ko: «Amiina!»

¹¹Isirayɛlidenw tora k'u juguw ka nafolo cɛ u ka sigiyɔrɔ la tile bi saba kɔnɔ. U ye Olofɛrine ka faniso, n'a ka warigwɛminanw, n'a ka dilanw, n'a ka minan wɛrɛw n'a ka sokɔnɔminan tɔw bɛɛ di Zuditi ma. A y'o minɛ, k'a dɔ la a ka fali kan, k'a tɔ tonton a ka wotorow kɔnɔ, ka begɛnw siri u la.

¹²Isirayɛli musow bɛɛ bolila ka n'a ye, ani k'a fo. U dɔw ye dɔnkili la ka dɔɔn kɛ k'a boɲa. A ye furaburuw ta ka dɔw di musow ma minw tun b'a bilara sira.

¹³Zuditi n'a bilasirabagaw ye olivuyiri bolomisɛnw ta k'u meleke k'u kɛ i n'a fɔ fugulanw, k'u biri u kuun na. Ale bilara u ɲa, n'u be dɔɔn kɛra. Isirayɛli cɛɛw bɛɛ tugura u kɔ ni kɛlɛkɛminanw ye u bolo, furaburu fugulan birinin be u kuun na, n'u be dɔnkili lara ɲanaman.

¹⁴O kɔ, Zuditi ye dɔnkili nin la ka barika la Ala ye Isirayɛlidenw bɛɛ cɛma, jama bɛɛ y'u kaan kɔrɔta kosɔbɛ k'o la n'a ye.