Read dyu Zuditi ka kitabu 16 Bible Online

Zuditi ka kitabu 16 - dyu bible

Zuditi ka kitabu 16

¹Zuditi ko: «Aw ye dɔnkili la ne ka Ala ye ni dundunw ye, aw ye nigɛw gosi ɲɔgɔn na ka Matigi makiri! Aw k'a tanu ni dɔnkili ye, aw k'a boɲa, ka dɛmɛ ɲini a fɛ!

²Bari Matigi ye Ala ye, min be kɛlɛ ban. A ye ne bɔsi n juguw bolo, a ye ne bɔ n kɔgwɛnbagaw bolo. A ye ne ɲuman segi a ka sigiyɔrɔ la, a ka mɔgɔw cɛma.

³Asiri kɛlɛdenw bɔra kɔgɔdugu ɲafan fɛ kuluyɔrɔ la ka na, u tun ka ca haali, u daa te se ka lɔn! O jamaba nin ye kɔɔw datugu, u ka sotigiw ye kuluw fa.

⁴Asirika nunu tun y'a fɔ k'u bena an ka mara jɛni, k'an ka kanbelenw halaki ni murujan ye, k'an ka denɲɛninw fili duguma, k'an ka denmisɛnw minɛ ka taga u bila jɔnya la, k'an ka sunguruw minɛ ka taga n'u ye.

⁵Matigi Setigi sera k'u bali muso le barika la.

⁶Kanbelen kɛnɛkɛnɛw ma u ka cɛfari bugɔ k'a ben. Barikatigiw m'a faga. Mɔgɔjanjanw m'a kɛlɛ. Merari denmuso Zuditi le ser'a kɔrɔ a ka cɛɲa barika la.

⁷A y'a ka firiyafani bɔ janko ka Isirayɛlidenw bɔ u ka tɔɔrɔ la. A ye tulu kasadiman mɔ a ɲada la,

⁸a ye masirifɛn biri a kuun na, a ye faniɲuman don, mɔgɔ nigɛ ta.

⁹A ka sanbara ye kɛlɛmasa ɲanamini, a ka cɛɲa y'a dusu minɛ. A y'a kaan tigɛ ni murujan ye.

¹⁰Pɛrɛsiw yɛrɛyɛrɛl'a ka jagwɛlɛya kosɔn, Mɛdiw hakili ɲagamin'a ka dusugwɛlɛya kosɔn.

¹¹O la, an ka mɔgɔ maloyaninw ye kɛlɛ kulekan ci, Asirikaw siranna. An ka mɔgɔ barikabanninw kulera, Asirikaw jaa tigɛra. U y'u kaan kɔrɔta, Asirikaw hakili ɲagamina.

¹²U tun be minw jati jitɔw ye, olu y'u sɔgɔ. U mandimina fɔɔ u tun be ɲini ka sa, u bolila i n'a fɔ siranbagatɔw. U tora ne ka Matigi ka kɛlɛ la.

¹³Ne b'a fɛ ka dɔnkilikura la n ka Ala ye. Matigi, i ka bon, i ka ɲi kosɔbɛ. Ele ye barikatigi kabakoman le ye! Fɛɛn si te se ka lɔ i ɲa.

¹⁴I ka danfɛnw bɛɛ ka kan ka baara kɛ i ye, e kumana dɔrɔn, u danna, e y'i ka Nii ci, a y'u lalaga. Mɔgɔ si te se ka ban i kumakan na.

¹⁵Kuluw bena yɛrɛyɛrɛ ka bɔ u sigiyɔrɔ la ka ben jii kɔnɔ, farakuruw bena yeelen i ko liɲaga i ɲakɔrɔ. Nga minw be siran i ɲa, i be makari olu la.

¹⁶Bari sarakaw bɛɛ ka dɔgɔ, u si te se ka diya Matigi ye. Sarakasogo tuluman minw be jɛni sarakabɔyɔrɔ la, olu barika ka dɔgɔ, Matigi te se k'u jati fɛɛn ye. Nga min be siran Matigi ɲa, ale ye mɔgɔbaba ye tuma bɛɛ.

¹⁷Siya minw be wili an ka mɔgɔw kama, bɔnɛ ye olu ta ye! Matigi Setigi ben'a mɔnɛ bɔ kitilon na. A ben'a kɛ tasuma ni tumuw b'u dumu, u bena kasi dimi fɛ tuma bɛɛ.»

¹⁸U sera Zeruzalɛmu tuma min na, u ye Ala bato. Jama y'u yɛrɛ saniya, o kɔ, u ye saraka jɛnitaw bɔ, k'u yɛrɛsago la sarakaw ni fɛɛn wɛrɛw di.

¹⁹Jama tun ye Olofɛrine bololafɛn minw di Zuditi ma, a y'o bɛɛ di Ala ma k'o to Alabatosoba kɔnɔ. A tun ye sanke min ta Olofɛrine ka sibon kɔnɔ, a y'o di Matigi ma a niyɔrɔ ye.

²⁰Jama bɛɛ tora ka nisɔndiya Alabatosoba ɲafɛ Zeruzalɛmu kalo saba, Zuditi tora n'u ye.

²¹O loonw tɛmɛnin kɔ, mɔgɔ kelen kelen bɛɛ segir'a ka soo. Zuditi ye Betuli sira minɛ ka taga to a ka sigiyɔrɔ la. A tɔgɔ bɔr'a ka tile la jamana faan bɛɛ la.

²²Mɔgɔ caaman tun b'a fɛ k'a furu, nga a ma sɔn ka furu mɔgɔ si ma a sii kɔnɔ kabini a cɛɛ Manase sara ka ta'a faaw fɛ.

²³A kɔrɔla ni boɲaba ye, a tor'a cɛɛ ka soo kɔnɔ fɔɔ ka saan kɛmɛ ni duuru sɔrɔ. A y'a ka baarakɛmuso hɔrɔnya sanni a ka sa Betuli. U y'a suu don a cɛɛ Manase ka kaburu kɔnɔ.

²⁴Isirayɛlidenw y'a sanga kɛ tile wolonwula kɔnɔ. Sanni a be sa, a tun y'a ka nafolo tilan a cɛɛ Manase ka mɔgɔw n'a yɛrɛ ka mɔgɔw cɛ.

²⁵Mɔgɔ si ma cogo ɲini ka siranya bila Isirayɛlidenw na tugu Zuditi ka tile la, ani waatijan kɔnɔ a sanin kɔ.