Read dyu Zuditi ka kitabu 2 Bible Online

Zuditi ka kitabu 2 - dyu bible

Zuditi ka kitabu 2

¹Asirikaw ka masacɛ Nabukodonozɔri ka masaya saan tan ni seeginan kalo fɔlɔ tile mugan ni filanan loon na, a tun b'a fɛ k'a mɔnɛ bɔ siya murutinin nunu bɛɛ la i ko a tun y'a fɔ cogo min na. A n'a ladibagaw y'o latigɛ.

²A y'a ka kɛlɛkuntigiw n'a ka mɔgɔbabaw bɛɛ wele ka ɲɔgɔnye kɛ n'u ye dogo la. A tun y'a latigɛ k'o siya murutinin nunu ɲaa gwan cogo min na, a y'o bɛɛ fɔ u ye.

³Olu y'a fɔ ko minw tun ma sɔn a ka kuma ma, ko a ka kan k'u bɛɛ faga.

⁴U tilara ɲɔgɔnye la tuma min na, Asirikaw ka masacɛ Nabukodonozɔri ye Olofɛrine wele. Ale tun y'a kɛlɛdenw ka kuntigiba ye, min tun be gwan a kɔ fanga kɔnɔ. A y'a fɔ a ye ko:

⁵«Masacɛba ka kuma filɛ nin ye, ale min ye dugukolo kan mɔgɔw bɛɛ matigi ye: Wili ka taga kɛlɛdenŋanaw lajɛn, sennatigiw ka kɛ mɔgɔ waa kɛmɛ ni mugan (120 000) ye, ni sotigiw mɔgɔ waa tan ni fila (12 000).

⁶I bena taga kɔrɔn fɛ mɔgɔw bɛɛ kɛlɛ. Bari u ma ne ka kuma bato.

⁷I ben'a ɲini u fɛ ko u ka bɔgɔ ni jii labɛn, k'a yira k'u sɔnna ka kolo ne ye. Ne bena taga u kama ne ka dimi kosɔn. Ne ka kɛlɛdenw bena se dugukolo yɔrɔ bɛɛ la, k'o yɔrɔ mɔgɔw bololafɛnw bɛɛ minɛ.

⁸Dingɛyɔrɔw bena fa u ka mɔgɔmandimininw na, baa ni kɔɔw bɛɛ bena fa u suu la.

⁹Ne bena u ka mɔgɔ minw minɛ, ne bena taga n'u ye fɔɔ dugukolo daan na.

¹⁰E kɔni, e ka taga u ka maraw bɛɛ minɛ k'o yɔrɔw mara ne ye. N'u y'u yɛrɛ d'i ma tuma min na, i bena u mara ne ye k'u kitilon kɔnɔ.

¹¹Mɔgɔmurutininw kɔni, i kana makari olu la k'u to yen. Olu faga, k'a to mɔgɔw b'u ka nafolo cɛ.

¹²Ne ni n ka masayafanga tɔgɔ la, ne kalila ko n bena n mɔnɛ bɔ, ne ye min fɔ, ne bena o kɛ!

¹³E kɔni, i ka ne ka kuma kelen kelen bɛɛ bato, ne min ye i ka matigi ye. Ne ka fɔta kɛ a cogo la i ko ne y'a fɔ i ye cogo min na. I kana o bila ka suma.»

¹⁴Olofɛrine bɔr'a matigi fɛ ka Asiri kɛlɛdenw ɲamɔgɔw bɛɛ wele.

¹⁵Ka kɛɲɛ n'a ka masa ka kuma ye, a y'a ka mɔgɔw lajɛn, olu minw tun labɛnna kɛlɛ kama kosɔbɛ: sennatigi mɔgɔ waa kɛmɛ ni mugan (120 000), ni sotigi tontigi mɔgɔ waa tan ni fila (12 000).

¹⁶A y'u tilantilan k'u kɛ kɛlɛbolow ye.

¹⁷A ye ɲɔgɔmɛw ni faliw ani sofali caaman minɛ k'u ka minanw la olu kan. A tagara ni sagaw, ni misiw ani baaw ye fana, minw tun ka ca kosɔbɛ, u ka balo kama.

¹⁸U ye dumunifɛn caaman labɛn, kɛlɛdenw bɛɛ ta, ka taga ni masacɛ ka kɛsu kɔnɔ sanu ni warigwɛ caaman ye, o ka kɛ kɛlɛdenw ka sara ye.

¹⁹Olofɛrine n'a ka kɛlɛdenw bɛɛ ye sira minɛ ka bila masacɛ Nabukodonozɔri ɲa, ka taga kɔrɔn fɛ yɔrɔ bɛɛ fa n'u ka kɛlɛkɛwotorow ye, n'u ka sotigiw ani u ka sennatigi kɛlɛdenŋanaw ye.

²⁰Jamaba tagara n'u ye, u tun ka ca i n'a fɔ tɔɔnw, walima cɛncɛn, u tun te se ka jati k'u daa lɔn u caya kosɔn.

²¹U bɔra Ninivu ka tile saba taama kɛ n'u be tagara Bɛkitilɛti kɛnɛ faan fɛ. U bɔra Bɛkitilɛti ka taga sigi kuluyɔrɔ faan fɛ o min be Silisi kuluyɔrɔ la kɔgɔdugu ɲafan fɛ.

²²A bɔra yen ka taga kuluyɔrɔ faan fɛ n'a ka kɛlɛdenw ye, sennatigiw ni sotigiw, ani kɛlɛkɛwotorow bɛɛ.

²³A sera Fudi ni Ludi dugu kɔrɔ k'u cɛn, ka girin Arasisi ka fadenyabolo bɛɛ kan k'u bololafɛnw cɛ, ani Isimayɛli kɔmɔgɔw ta, minw siginin be kongokolon gɛrɛfɛ, Keleyɔn worodugu ɲafan fɛ.

²⁴A ye Efarati baji tigɛ, ka Mezopotami jamana cɛtigɛ ka cɛfariduguw ci pewu. Dugu minw be Aborona kɔɔ daa la, fɔɔ kɔgɔjida la.

²⁵A ye Silisi mara minɛ, k'a kɔnɔ mɔgɔ murutininw halaki, ani ka taga fɔɔ Zafɛti ka maraw la, worodugu ɲafan fɛ, Arabi gɛrɛfɛjamana dɔ la.

²⁶A ye madiyanw bɛɛ lamini k'u ka sigiyɔrɔw jɛni, k'u ka begɛnw minɛ ka taga n'u ye.

²⁷A jigira ka taga Damasi kɛnɛ na sumantigɛwaati la k'u ka forow bɛɛ jɛni, k'u ka sagaw n'u ka misiw halaki, k'u ka duguw kɔnɔ nafolo cɛ, ka cɛnni kɛ u ka kɛnɛyɔrɔw la, ka kanbelenw bɛɛ faga ni murujan ye.

²⁸Siranya ye kɔgɔjida la mɔgɔw minɛ fɔɔ u be yɛrɛyɛrɛ: Sidɔnkaw ni Tirikaw, ni Surikaw ni Okinakaw ani Zamuniyakaw bɛɛ, ni Azɔtikaw ni Asikalɔnkaw. U tun siranna kosɔbɛ.