Read dyu Zuditi ka kitabu 3 Bible Online

Zuditi ka kitabu 3 - dyu bible

Zuditi ka kitabu 3

¹U ye mɔgɔw ci ka taga bɛɛn ɲini ni Olofɛrine ye. U ko:

²«An filɛ i ɲakɔrɔ, an ye masacɛba Nabukodonozɔri ka baarakɛlaw ye. I k'an minɛ, cogo min ka d'i ye.

³An ka wɛɛrɛw, ni an ka dugukolo bɛɛ, n'an ka forow bɛɛ, n'an ka begɛnw, misi fara begɛnmisɛnw kan, n'an ka sigiyɔrɔw bɛɛ b'i bolo. I sago kɛ u la.

⁴An ka duguw ye i ta ye, u kɔnɔ mɔgɔw ye i ka jɔɔnw ye. Na don u kɔnɔ i sago la.»

⁵O cɛɛ nunu sera Olofɛrine fɛ k'o kuma fɔ a ye.

⁶A tagara n'a ka kɛlɛdenw ye kɔgɔji dafɛ mara la k'a ka kɛlɛden dɔw sigi dugu farimanw kɔnɔ, ani k'o yɔrɔ cɛfariw fara u kan.

⁷O yɔrɔ mɔgɔw n'u laminiw y'a kunbɛn ni masirifɛn dɔw ye u kuun na, ka dɔɔn kɛ, ani ka dundunw fɔ.

⁸A ye cɛnni kɛ u ka mara bɛɛ kɔnɔ, k'u ka jolɔgɔw tigɛ, bari a tun y'a latigɛ ko a bena joow bɛɛ cɛn ka bɔ dugukolo kan janko jamana bɛɛ mɔgɔw ka Nabukodonozɔri kelenpe le bato, ani siyaw bɛɛ minw be kaan o kaan fɔ, u bɛɛ ka dɛmɛ ɲini ale lo fɛ i n'a fɔ batofɛn.

⁹A sera Zizireyɛli gɛrɛfɛ, Dotayimu masurun na, Zude mara kuluw yɔrɔ faan fɛ.

¹⁰U sigira Gebayi ni Sitopolisi cɛ. A tora o yɔrɔ la kalo kelen kɔnɔ janko k'a ka kɛlɛdenw ka minanw bɛɛ lajɛn.