Read dyu Zuditi ka kitabu 5 Bible Online

Zuditi ka kitabu 5 - dyu bible

Zuditi ka kitabu 5

¹U y'a fɔ Asiri kɛlɛmasa Olofɛrine ye ko Isirayɛlidenw b'u yɛrɛ labɛnna kɛlɛ kama, k'u ye kuluyɔrɔ tɛmɛsiraw datugu, ka mɔgɔ barikamanw bila kulujanjanw kunna, ani k'u ye kɛlɛdenw dogo u ka kɛnɛyɔrɔw la.

²A dimina kosɔbɛ. A ye mowabuw ka ɲamɔgɔw, ni amoniw ka kɛlɛdenw ɲamɔgɔw, ani kɔgɔjida la mara kuntigiw bɛɛ wele

³k'a fɔ u ye ko: «Ayiwa kanaanw, aw k'a fɔ ne ye, siya min siginin be kuluyɔrɔ la, o ye siya jumɛn ye? U be dugu jumɛnw kɔnɔ? U ka kɛlɛdenw ye mɔgɔ joli ye? U fanga n'u barika sɔrɔyɔrɔ ye mun ye? U ka masacɛ ye jɔn ye, min b'u ka kɛlɛdenw kunna?

⁴Mun na olu dama banna ka na ne kunbɛn i n'a fɔ kɔrɔn fɛ mɔgɔ tɔw bɛɛ?»

⁵Amoniw ka kuntigiba Akiyɔri y'a fɔ a ye ko: «Ne matigi, sɔn ka mɛnni kɛ i ka baaraden ka kuma na. Ne bena tiɲɛ fɔ i ye siya nin ka koo la, min siginin be kuluyɔrɔ nin na i gɛrɛfɛ. Galon tena bɔ i ka baaraden daa la.

⁶Siya nin bɔra *Kalidekaw la. [1]

⁷Fɔlɔ la, u tun be Mezopotami jamana na, bari u tun t'a fɛ k'u bɛmaw ka joow sɔn, minw tun be Kalidekaw ka mara la.

⁸U banna u bɛmaw ka sira la ka Sankolotigi Ala bato, u ye min kelen jati Ala ye. U y'u gwɛn ka bɔ u ka batofɛn nunu kɔrɔ. U tagara u yɛrɛ kalifa Mezopotami ka mɛn o yɔrɔ la.

⁹U ka Ala y'a fɔ u ye ko u ka bɔ o yɔrɔ la ka taga Kanaan jamana na. U tagara sigi yen. K'u to o yɔrɔ la, u ka sanu ni warigwɛ, ani begɛnw cayara kosɔbɛ.

¹⁰O kɔ, u tagara Ezipiti, bari kɔngɔ tun be Kanaan jamana kɔnɔ yɔrɔ bɛɛ. U tora yen k'u yɛrɛ balo, u cayara kosɔbɛ fɔɔ ka kɛ siyaba ye, min daa te se ka lɔn.

¹¹Ezipiti masacɛ wilila u kama ni cekuya ye janko k'u mako sa, a y'u bila birikigosi la. A y'u dɔgɔya k'u kɛ jɔɔnw ye.

¹²U y'u ka Ala dali kosɔbɛ, ale ye tɔɔrɔbaw la Ezipiti jamana bɛɛ kan, fura tun te minw na. Ezipitikaw y'u gwɛn ka bɔ u fɛ.

¹³Ala y'a kɛ Kɔgɔjiwulen tigɛra u ɲa, kɔdingɛ jara,

¹⁴a y'u bila sira ka taga Sinayi kulu ni Kadɛsi Barineya faan fɛ. U ye kongokolon kɔnɔ mɔgɔw bɛɛ gwɛn.

¹⁵U tagara sigi amoriw ka mara kɔnɔ, u sera ka Ɛsibɔnkaw bɛɛ halaki. O kɔ, u ye Zurudɛn baji tigɛ ka kuluyɔrɔ bɛɛ minɛ.

¹⁶U ye kanaanw ni periziw ani zebuziw ni Sisɛmukaw ani girigasiw bɛɛ gwɛn ka bɔ yen, ka sigi o yɔrɔ la waatijan kɔnɔ.

¹⁷Ni u ma hakɛ kɛ u ka Ala ɲakɔrɔ, u be yiriwa, bari Ala min b'u fɛ, tilenbaliyako man d'a ye fewu.

¹⁸Nga Ala tun y'a latigɛ ko u ka sira min taama, u m'o bato, u caaman halakira kɛlɛ caaman na, u juguw ye dɔw minɛ ka taga n'u ye jamana wɛrɛ la jɔnya la. U ka Ala nin batoso cira pewu. U juguw sera u kɔrɔ k'u ka duguw minɛ.

¹⁹Sisan, u kɔsegira u ka Ala fɛ. U tun jɛnsɛnin lo yɔrɔ minw na, u kɔsegira ka bɔ o yɔrɔw la. U sigira Zeruzalɛmu tugu, u ka Alabatosoba be dugu min kɔnɔ. U sigira kuluyɔrɔ la, mɔgɔ tun te yɔrɔ min na.

²⁰Ayiwa sisan, matigi, ni siya nin filinin be koo dɔ la, n'u ye u ka Ala hakɛ ta, n'an y'o kɔlɔsi u fɛ k'a ye k'o bena kɛ u ben sababu ye, o tuma na, an ka wili ka taga u kɛlɛ.

²¹Nga n'u ma kodagabali kɛ, n matigi k'u ye k'u to yen, n'o tɛ, u Matigi n'u ka Ala bena u tanga, anw bena maloya sɔrɔ dugukolo kan mɔgɔw bɛɛ ɲana.»

²²Ayiwa, Akiyɔri tilar'a ka kuma nin na tuma min na, jama min tun be faniso lamini na, olu bɛɛ daminɛna ka ŋunuŋunu. Olofɛrine ka kɛlɛkuntigibabaw ni kɔgɔjida la mɔgɔw bɛɛ, ani mowabuw ko u k'a bugɔ kosɔbɛ.

²³U ko: «Anw tena siran Isirayɛlidenw ɲa. Siya barikatan lo, fanga t'u la ka kɛlɛba kɛ.

²⁴An ka wili ka taga, u bena kɛ i n'a fɔ dumunifɛn, i ka kɛlɛdenw fɛ, an tigi Olofɛrine.»