Read dyu Zuditi ka kitabu 7 Bible Online

Zuditi ka kitabu 7 - dyu bible

Zuditi ka kitabu 7

¹O dugusagwɛ, Olofɛrine y'a fɔ a ka kɛlɛdenw bɛɛ ye ani jama min tun nan'a dɛmɛyɔrɔ, k'u ka wili ka sira minɛ ka taga Betuli faan fɛ, k'u dɔw ka to kuluyɔrɔ tɛmɛsiraw kan, ka Isirayɛlidenw kɛlɛ.

²O loon na, mɔgɔ minw bɛɛ tun ka kɛnɛ, olu bɛɛ wilila ka sira minɛ. Kɛlɛden sennatigi mɔgɔ waa kɛmɛ ni bi wolonwula (170 000), ni sotigi waa tan ni fila (12 000). Minanw, ni minw tun be janto u la, olu niin t'a la. Jama tun ka ca kosɔbɛ.

³U tagara sigi kɛnɛyɔrɔ la Betuli gɛrɛfɛ, u tun ka surun jii bɔyɔrɔ la. U yɛrɛkɛra ka taga jamana faan dɔ fɛ k'a ta Dotayimu fɔɔ Bɛlibayimu, faan dɔ wɛrɛ fɛ, k'a ta Betuli fɔɔ Kiyamɔn, min be Zizireyɛli gɛrɛfɛ.

⁴Tuma min na Isirayɛlidenw y'a ye k'u ka ca fɔɔ k'a dama tɛmɛ, u hakili ɲagamina kosɔbɛ, u tora k'a fɔ ɲɔgɔn ye ko: «Sisan u bena dugukolo yɔrɔ bɛɛ halaki. Kulujanw wo, kɔkɛnɛw wo, tintinw wo, yɔrɔ si tena se u ka kɛwali kɔrɔ.»

⁵U kelen kelen bɛɛ y'u ka kɛlɛkɛminanw ta ka tasuma mana u ka sangasow kunna. O kɔ, u tora ka ɲɔgɔn falen kɔlɔsili la o suu la.

⁶Tile filanan loon, Olofɛrine ko a ka sotigiw bɛɛ ka bɔ ka taga lɔ Betuli Isirayɛlidenw ɲakɔrɔ.

⁷A tagara tɛmɛyɔrɔw cogoya filɛ minw be yɛlɛ ka taga u ka dugu kɔnɔ, ka munumunu ka taga u ka jii bɔyɔrɔw filɛ. U ye kɛlɛden dɔw to yen k'u ka to ka kɔlɔsili kɛ. Ale yɛrɛ segir'a ka mɔgɔw fɛ.

⁸Edɔmuw ɲamɔgɔw bɛɛ, ni mowabu kɛlɛdenw kuntigiw, ani kɔgɔjida la kɛlɛkuntigiw gwɛrɛl'a la k'a fɔ a ye ko:

⁹«An tigi, n'i be sɔn ka mɛnni kɛ dɔɔni anw fɛ, i ka kɛlɛdenw si tena faga.

¹⁰Isirayɛliden nunu jigi t'u ka tamanw kan. U be kulu minw kan, u jigi be olu jaɲa le kan. Bari ka yɛlɛ ka se u ka kuluw kunna, o man nɔgɔ.

¹¹Ayiwa, sisan an tigi, kana tilen ka taga u kama, o la, i ka mɔgɔ si tena faga.

¹²To i ka sigiyɔrɔ la, e n'i ka kɛlɛdenw bɛɛ. I ka baarakɛlaw ka to ka jii bɔyɔrɔw kɔlɔsi kulu jukɔrɔ.

¹³Bari Betulikaw be jii bɔ o yɔrɔ le la. Minnɔgɔ bena u barika ban, u bena u ka dugu don i bolo. Anw n'an ka mɔgɔw, anw bena bila tɔw ɲa ka yɛlɛ kuluw kunna minw yɔrɔ ka surun, ka to yen janko mɔgɔ si kana se ka bɔ dugu kɔnɔ.

¹⁴U bɛɛ bena sa kɔngɔ bolo, cɛɛ fara musow kan, ni denmisɛnw. Sanni an ka se u ma ni murujan ye, u bena ben ka sa u ka dugu forobayɔrɔw la.

¹⁵I bena u sara ka juguya, bari u murutila, u ma sɔn ka na bɛɛn ɲini i fɛ.»

¹⁶U ka kuma diyara Olofɛrine n'a ka kɛlɛkuntigiw ye, u ye min fɔ, a k'u k'o kɛ.

¹⁷Asirikaw mɔgɔ waa duuru (5 000) farala amoniw kan, u bɔra u sigiyɔrɔ la ka taga kɔkɛnɛ na ka taga u ka mɔgɔ dɔw sigi Isirayɛlidenw ka jii bɔyɔrɔw la.

¹⁸Edɔmuw ni amoniw tagara sigi kuluyɔrɔ la Dotayimu gɛrɛfɛ. U y'u ka mɔgɔ dɔw ci worodugu ɲafan fɛ ni kɔrɔn fɛ Egerɛbɛli gɛrɛfɛ, min ka surun Kusi, Mɔkimuri kɔɔ daa la. Asiri kɛlɛden tɔw sigira kɛnɛyɔrɔ la ka dugukolo bɛɛ datugu. U ka fanisow n'u ka minanw ye yɔrɔba ta, mɔgɔ nunu tun ka ca kosɔbɛ.

¹⁹Isirayɛlidenw ye Matigi, u ka Ala dali kosɔbɛ bari u fari faganin tun lo. U juguw bɛɛ tun y'u lamini, fɔɔ boliyɔrɔ tun te yen.

²⁰Asiri kɛlɛdenw bɛɛ, u ka sennatigiw n'u ka kɛlɛkɛwotorow ani u ka sotigiw tora u lamini na tile bi saba ni naani kɔnɔ. Betulikaw y'u ka jii maranin bɛɛ ban.

²¹Jidingɛw jara, jii minta tun te yen tugu ni mɔgɔ be se ka jii min a sago la, hali loon kelen kɔnɔ, bari u tun bɛ jii tilantilan dɔɔni dɔɔni u kelen kelen bɛɛ cɛ.

²²U ka denmisɛnw barika nana ban, musow ni kanbelenw ani sunguruw sigɛnna kosɔbɛ minnɔgɔ bolo fɔɔ u be bɔ ka ben dugu forobayɔrɔw la ni dugu dondaw la. Fanga si tun t'u la tugu.

²³Jama bɛɛ, kanbelenw ni musow, ani denmisɛnw, bɛɛ ye ɲɔgɔn lajɛn Oziyasi ni dugu ɲamɔgɔw fɛ. U kulera kosɔbɛ k'a fɔ cɛkɔrɔbaw bɛɛ ɲana ko:

²⁴«Ala le bena tiɲɛ fɔ aw ni anw cɛ! Bari tile fila nin na aw ye kojuguba kɛ an na, sabu aw ma sɔn ka bɛɛn ɲini Asirikaw fɛ.

²⁵Sisan mɔgɔ si te yen k'an dɛmɛ! Ala y'an don u bolo, an bɛɛ bena sa u ɲana, minnɔgɔ tɔɔrɔ kosɔn.

²⁶O la sisan, aw ka Olofɛrine n'a ka kɛlɛdenw wele ka dugu don u bolo, u ka se k'a nafolo cɛ.

²⁷Bari an ka kɛ u ta ye, o ka fisa an ka sa minnɔgɔ bolo. An bena kɛ jɔɔnw ye, nga an bena to nii na, an ka denmisɛnw tena sa an ɲana, an musow n'an ka denmisɛnw nii tena bɔ an ɲana.

²⁸Sankolo ni dugukolo kama, ni an ka Ala tɔgɔ la, an faaw ka Matigi, ale min b'a dimi bɔ an na ka kɛɲɛ n'an ka filikow, ani an faaw ka hakɛ ye, an b'a ɲini aw fɛ ale kosɔn ko aw ka koo kɛ bii ka kɛɲɛ n'an ka fɔta ye.» [1]

²⁹U bɛɛ lajɛnnin daminɛna ka ŋunuŋunu kosɔbɛ, u y'u kaan kɔrɔta ka Matigi dali.

³⁰Oziyasi y'a fɔ u ye ko: «N balimaw, aw k'aw jaa gwɛlɛya! An ka muɲu tile duuru kɔnɔ tugu. O tile duuru kɔnɔ, Matigi, an ka Ala bena makari an na, a tena an fili pewu.

³¹Nga ni o loon nunu tɛmɛna ni dɛmɛ ma sɔrɔ, aw ye min ɲini, n ben'o kɛ.»

³²A ye jama labila k'u ka taga u ka kɛlɛkɛyɔrɔw la. U tagara u ka dugu laminikogo kan, n'a sangasow la, ka musow ni denmisɛnw bila ka taga u ka soow kɔnɔ. Dugu mɔgɔw fari tun faganin be kosɔbɛ.