Read dyu Zuditi ka kitabu 8 Bible Online

Zuditi ka kitabu 8 - dyu bible

Zuditi ka kitabu 8

¹O waati la, mankan nin sera Zuditi ma. Zuditi tun ye Merari denmuso ye, Merari tun ye Ɔkisi deen ye, Ɔkisi tun ye Yusufu deen ye, Yusufu tun ye Oziyɛli deen ye, Oziyɛli tun ye Ɛlikiya deen ye, Ɛlikiya tun ye Anani deen ye, Anani tun ye Zedeyɔn deen ye, Zedeyɔn tun ye Arafayin deen ye, Arafayin tun ye Akitɔbu deen ye, Akitɔbu tun ye Eli deen ye, Eli tun ye Kɛlikiyasi deen ye, Kɛlikiyasi tun ye Eliyabu deen ye, Eliyabu tun ye Natanayɛli deen ye, Natanayɛli tun ye Salamiyɛli deen ye, Salamiyɛli tun ye Sarasadayi deen ye, Sarasadayi tun ye Isirayɛli ka kɔmɔgɔ dɔ ye.

²A cɛɛ tun ye Manase ye, u fila tun be bɔ o kɔmɔgɔ kelen na, gwatigi kelen mɔgɔw. Manase tun sara sumantigɛwaati la.

³Manase tun be suman kannin siribagaw kɔlɔsira foro kɔnɔ. Tile tun ka fari kosɔbɛ fɔɔ a fari gwanna ka tɛmɛ, a tagara la. O kɛr'a ka saya ye Betuli, min ye a ka dugu ye. Foro min be Dotayimu ni Balamɔn cɛ, u y'a suu don a faaw gɛrɛfɛ o kɔnɔ.

⁴Zuditi tor'a ka soo kɔnɔ firiya la saan saba ni kalo naani.

⁵A tun y'a kɛ u ye boon lɔ a ka soo kunna. A tun be to ka dusukasifani ni firiyafani don.

⁶Kabini a cɛɛ sara, a tun be to ka suun don loon o loon, fɔɔ lafiɲɛlon n'a ɲasigilon, ni kalokura ɲanagwɛw n'u ɲasigilon, ni ɲanagwɛlon wɛrɛw, ani Isirayɛlidenw ka nisɔndiyalonw na.

⁷A tun cɛɛ ka ɲi kosɔbɛ, a ɲada filɛ tun ka di. A cɛɛ Manase tun ye sanu ni warigwɛ to a ye, ni baaraden cɛmanw ni musomanw, ani begɛnw ni forow. A tun be janto a ka nafolo la.

⁸Mɔgɔ si tun te se k'a tɔgɔjugu fɔ, bari a tun be siran Ala ɲa kosɔbɛ.

⁹Jii dɛsɛko ye jama jigi tigɛ. U ye kumajugu fɔ dugu ɲamɔgɔ ye cogo min na, a y'o mɛn. Oziyasi ye jama jaabi ni kuma min ye, a y'o fana mɛn. A tun y'a fɔ jama ye ko ale bena dugu don Asirikaw bolo tile duuru tɛmɛnin kɔ.

¹⁰A ka baaraden musoman min tun be janto a bololafɛnw bɛɛ la, a ye ale ci ka taga dugu cɛkɔrɔbaw wele, Oziyasi ni Kabirisi ani Karimisi.

¹¹U sera Zuditi fɛ tuma min na, a y'a fɔ u ye ko: «Betulikaw ɲamɔgɔw, aw ye mɛnni kɛ ne fɛ, bari aw ye min fɔ jama ɲana bii, o bɛnnin tɛ. Aw kalila ni Ala tɔgɔ ye k'a fɔ ko dugu ka kan ka don an juguw bolo ni Matigi ma aw dɛmɛ yanni tile duuru.

¹²Aw ye jɔnw ye, ni aw be Ala kɔrɔbɔ bii, ani k'aw yɛrɛ bila Ala nɔɔ na adamadenw cɛma?

¹³Ayiwa, sisan aw be Setigi, Matigi kɔrɔbɔra, k'a sɔrɔ aw ma foyi lɔn a ka kolatigɛninw na.

¹⁴Aw ma se ka adamaden yɛrɛ kɔnɔnako lɔn, ani k'a ka miiriya faamu we! Aw bena se ka Ala kɔnɔnakow lɔn cogo di, ale min ye fɛɛn bɛɛ dan? Aw be se k'a ka miiriya lɔn k'a ka kolatigɛnin faamu wa? Ayi n balimaw, aw kana Matigi, an ka Ala dusu dimi.

¹⁵Bari n'a t'a fɛ k'an dɛmɛ yanni tile duuru kɔnɔ, a be ale ma k'an tanga a diyanawaati la, walima k'an to an be halaki an juguw ɲana.

¹⁶Nga aw kana Matigi, an ka Ala wajibiya a ka kolatigɛninw na. Bari Ala te adamaden ye n'a be se ka bagabaga, k'a wajibiya ka koo kɛ, walima ka sɔn mɔgɔ ka kolatigɛnin na.

¹⁷O kosɔn, k'an to an kisiko makɔnɔni na, an ka to ka dɛmɛ ɲini a fɛ, a bena an jaabi n'a sago lo.

¹⁸Bari k'a ta an faaw ka tile la fɔɔ ka na se bii ma, an ka duguw kɔnɔ mɔgɔ si walima an ka somɔgɔw si ma joow sɔn, minw ye adamaden bololabaara ye. Fɔlɔfɔlɔ, dɔw tun b'o kɛ.

¹⁹O kosɔn, an faaw tɔɔrɔla kɛlɛ la. U juguw y'u ka nafolo cɛ, ani ka se u kɔrɔ kosɔbɛ.

²⁰Nga anw ma batofɛn wɛrɛ lɔn ni Matigi tɛ. O la, an ka l'a la ko a ten'an bila, a ten'an ka siya mɔgɔ si fili.

²¹Bari, n'u y'an minɛ, Zude mara bɛɛ bena minɛ fana, u bena an ka Alabatosoba kɔnɔ nafolow cɛ, Ala bena an ɲininga a nɔgɔko la. [1]

²²A ben'a kɛ an balimaw fagako hakɛ, ni jamanadenw minɛko, ani an faso halakiko hakɛ be la an kan. Siya minw bena se an kɔrɔ k'an kɛ u ka jɔɔnw ye, u bena an jati mɔgɔkolonw ye k'an lɔgɔbɔ.

²³An makari tena u minɛ an ka jɔnya la. Matigi Ala ben'o kɛ maloyako ye an fɛ.

²⁴«O la sisan balimaw, an k'a yira an balima tɔw la ko u kisiko b'an bolo, ko an be lɔ ni Ala ka soo kunko ye, o yɔrɔ senuman nin, ani sarakabɔyɔrɔ kunkow ye.

²⁵Ka fara o kan, an ka barika la Matigi, an ka Ala ye, ale min b'an kɔrɔbɔra i n'a fɔ a y'a kɛ an faaw la cogo min na.

²⁶A ye koo min bɛɛ kɛ Ibrayima la, ani a ye Isiyaka kɔrɔbɔ cogo min na, ni koo min bɛɛ kɛra Yakuba la k'a to Mezopotami jamana kɔnɔ, a tun b'a bamuso balima Laban ka sagaw dɛndɛ tuma min na, aw k'aw hakili to o la.

²⁷A kɛra i n'a fɔ a y'a kɛ u tɛmɛna tasuma kɔnɔ janko k'u kɔnɔnako lɔn. Nga a t'a dimi bɔra an na. Mɔgɔ minw be gwɛrɛ Matigi la, a b'olu ɲaa gwan waasa k'u lasɔmi.»

²⁸Oziyasi y'a fɔ a ye ko: «I ye min bɛɛ fɔ, i y'o fɔ ni hakilitigiya ye, mɔgɔ si tena i sɔsɔ.

²⁹Bii ma kɛ a fɔlɔ ye i ka hakilitigiya ka ye. Kabini i denmisɛn tuma, bɛɛ y'a lɔn ko hakili b'i fɛ, ko n'i ye min latigɛ, o ka ɲi.

³⁰«Nga minnɔgɔ gwanna jama na, u y'an wajibiya k'a kɛ i ko an y'a fɔ u ye cogo min na, ani ka kali, an te se ka min cɛn.

³¹O la sisan, i ka Matigi dali an ye, bari i be siran a ɲa, a bena sanji di k'an ka jii marayɔrɔw fa, an barika tena dɛsɛ tugu.»

³²Zuditi y'a fɔ u ye ko: «Aw ye mɛnni kɛ ne fɛ. Ne bena koo dɔ kɛ, an ka siya bena to ka min lakali ɲɔgɔn ye fɔɔ ka taga se waati nataw mɔgɔw ma.

³³Aw ye lɔ dugu donda la bii sufɛ, ne bena bɔ ni n ka baaraden musoman ye. Aw ye sarati di ko aw bena dugu don an juguw bolo waati min na, yanni o waati ka se, Matigi bena na Isirayɛlidenw dɛmɛ ne barika la.

³⁴Nga aw kana ɲiningali kɛ ne ka koo kɛtaw la, bari ne tena foyi fɔ aw ye fɔɔ ni ne y'a kɛ ka ban tuma min na.»

³⁵Oziyasi ni ɲamɔgɔw y'a fɔ a ye ko: «Taga hɛrɛ la, Matigi Ala ka bila i ɲa, k'an dimi bɔ an juguw la.»

³⁶U bɔra sanbon kɔnɔ ka sɔrɔ ka taga u ka kɔlɔsikɛyɔrɔw la.