Read dyu Zuditi ka kitabu 9 Bible Online

Zuditi ka kitabu 9 - dyu bible

Zuditi ka kitabu 9

¹Waati min na u tun be wusulan jɛnina saraka ye wulafɛ Zeruzalɛmu, Ala ka boon kɔnɔ, o waati kelen na, Zuditi y'a kunbiri gwan k'a ɲaa biri duguma, ka bugurigwɛ kɛ a kuun na, ani a ka dusukasifani tun be ye, a tun ye min don a ka faniw jukɔrɔ. A y'a kaan kɔrɔta ka Matigi dali ko:

²«Matigi, i ye ne bɛma Simeyɔn ka Ala ye. E le tun ye murujan don a bolo janko a k'a dimi bɔ siya wɛrɛw la minw tun lara n'a dɔgɔmuso ye fanga la. U tun y'a ka fani bɔ k'a dɔgɔya, u y'a ka fani bɔ fɔɔ ka se a maloyayɔrɔ ma. [1] U ye koo kɛ, i tun ko min man kan ka kɛ.

³O le kosɔn, i y'u ka ɲamɔgɔw faga, u tun ye sunguru nigɛ k'a maloya dilan min kan, u fana nigɛra, k'u joli bɔn o kan. I ye jɔɔnw n'u kuntigiw faga ɲɔgɔn fɛ, ka masaw faga u ka masasigilanw kan.

⁴I y'a to u juguw y'u musow minɛ ka taga n'u ye, u ka sunguruw bilara jɔnya la. U bololafɛnw bɛɛ donna siya bolo, min koo ka d'i ye, u k'o tilan ɲɔgɔn cɛ, minw tun b'i sago kɛ teliya la n'u dusu bɛɛ ye. U tun ma sɔn nɔgɔtɔya ma u somɔgɔw cɛma fewu, o le kosɔn, u ye dɛmɛ ɲini i fɛ. «Ee Ala, ne ka Ala, i ka ne jaabi, ne min cɛɛ te sii la tugu.

⁵Bari koo minw kɛra fɔlɔ la, ni minw be kɛra sisan, ani min bena kɛ sini, e le y'o bɛɛ latigɛ. Fɛɛn be cogo min na sisan, ni min bena kɛ sini, o ye i sago ye. I tun ye koo minw latigɛ, o le kɛra.

⁶A kɛra i ko i ka kolatigɛninw ye kɛta ye ka ban. I ka kokɛtaw bɛɛ labɛnnin lo, i bena fɛɛn min latigɛ, i b'o lɔn ka ban.

⁷A filɛ, Asirikaw nana ni fanga ye, u y'u yɛrɛ boɲa u ka soow n'u ka sotigiw kosɔn, u fanin be u yɛrɛ la u ka kɛlɛden sennatigiw kosɔn. U jigi lanin be nigɛkunbɛnnan ni taman, ani toon ni bɛrɛbonnanw le kan. U m'a lɔn ko i ye Matigi ye, ko i be se kɛlɛ la.

⁸«I tɔgɔ ko Matigi. I k'u barika ban i ka sebagaya barika la, k'u ka fanga cɛn i ka dimiba kosɔn. Bari u y'a latigɛ k'i ka yɔrɔ senumanw nɔgɔ, ka fanibugu nɔgɔ, i be yɔrɔ min na i ka nɔɔrɔ kɔnɔ, ani k'i ka sarakabɔyɔrɔ ci ni nigɛfɛnw ye.

⁹I k'u ka yɛrɛboɲa filɛ! I dimi bɔ u la! Cɛɛ te ne min fɛ tugu, i ka barika don ne la janko ne ye koo min latigɛ, ne ka se k'o kɛ.

¹⁰Tɛmɛ ne ka namarakumaw fɛ ka jɔɔn n'a kuntigi faga. Muso sababu la, i k'u ka hakilinataw bɛɛ cɛn, u b'u yɛrɛ boɲa minw kama.

¹¹Bari i ka fanga te bɔ mɔgɔw ka caya la, i ka sebagaya te sɔrɔ fangatigiw fɛ. I ye mɔgɔmajigininw ka Ala le ye, ni fantanw dɛmɛbaga, i be barikatanw mara. Mɔgɔ te minw fɛ, e b'olu mara, ka mɔgɔ jigitigɛninw kisi.

¹²Ɔnhɔn tiɲɛ na, ne faa ka Ala, Isirayɛli faso ka Ala, sankolo ni dugukolo kuntigi, jii danbaga, ele, danfɛn bɛɛ ka masacɛ, ne ka dalili minɛ.

¹³I bɛnna ni mɔgɔ minw ye, mɔgɔ minw ye kojuguba latigɛ olu kama, n'i ka soo senuman, ani Siyɔn kulu, n'i ka mɔgɔw ka jamana kama, i k'a kɛ ne ka namarakuma ka se u kɔrɔ k'u faga.

¹⁴A yira i ka mɔgɔw bɛɛ la, ni siyaw bɛɛ, ko i ye Ala ye, ko see b'i ye, ko fanga bɛɛ b'i fɛ, ko fɛɛn wɛrɛ si tɛ janto Isirayɛlidenw na ni ele yɛrɛ tɛ.»