Read dyu Ɛsitɛri ka kitabu 3 Bible Online

Ɛsitɛri ka kitabu 3 - dyu bible

Ɛsitɛri ka kitabu 3

¹O koow tɛmɛnin kɔ, masacɛ Sɛrisɛsi ye Agagi kɔmɔgɔ Amedata dencɛ Aman minɛ k'a sigi kuntigiya la a ka ɲamɔgɔw bɛɛ kunna.

²Mɔgɔ minw bɛɛ tun be baara kɛ masacɛ ka luu kɔnɔ, olu bɛɛ tun be to k'u kunbiri gwan Aman ɲakɔrɔ k'a boɲa, bari masacɛ le tun y'o latigɛ, nga Maridose tun te sɔn k'o kɛ.

³Masacɛ ka baaraden minw tun be to luda la, olu ye Maridose ɲininga ko: «Mun na i be masacɛ ka sariya cɛn?»

⁴U tun b'o fɔ Maridose ye loon o loon fɔɔ ka dɛsɛ. O la, u y'a fɔ Aman ye. U tun b'a fɛ k'a filɛ ni Maridose bena sɔn ka taga ɲa ni o koo ye, bari Maridose tun y'a fɔ u ye ko ale ye zuwifu ye.

⁵Aman y'a ye ko Maridose te sɔn k'a kunbiri gwan ale ɲakɔrɔ k'a boɲa minkɛ, a dimina kosɔbɛ.

⁶Nga a tun t'a fɛ ka Maridose kelen dama faga, bari u tun ye Maridose ka siya fɔ a ye. A tun b'a fɛ k'a ka siya bɛɛ halaki, minw ye zuwifuw ye, masacɛ Sɛrisɛsi ka mara bɛɛ kɔnɔ.

⁷Sɛrisɛsi ka masaya saan tan ni filanan kalo fɔlɔ la, min ye *Nisan kalo ye, u ye kalabon kɛ u be min wele ko Purimu, Aman ɲana, a ka kan ka kɛ loon min, ni kalo min na, janko o ka lɔn. U ka kalabon ye kalo tan ni filanan le yira min ye *Adari kalo ye.

⁸O kɔ, Aman y'a fɔ masacɛ Sɛrisɛsi ye ko: «Siya dɔ be i ka jama cɛma min be danna tɔw la, u yɛrɛkɛnin be i ka maraw bɛɛ la, u ka landa ni tɔw ta te kelen ye. U te ele masacɛ ka sariya bato. Kuun t'a la i k'o siya nin to ɲasuma na.

⁹Ni masacɛ be sɔn u be sɛbɛ dɔ sɛbɛn ka sira di k'u k'o siya nin bɛɛ faga, ne bena warigwɛ tɔni kɛmɛ saba don i ka baaradenw bolo u be ta'a bila i ka nafolo marayɔrɔ la.»

¹⁰O la, masacɛ y'a ka bololanigɛ [1] bɔ k'a di Agagi kɔmɔgɔ Amedata dencɛ Aman ma, min ye zuwifuw jugu ye,

¹¹k'a fɔ a ye ko: «To n'i ka wari ye, siya nin fana b'i bolo. Fɛɛn min ka d'i ye, i k'o kɛ n'u ye.»

¹²U ye masacɛ ka sɛbɛnnikɛlaw wele kalo fɔlɔ nin tile tan ni sabanan loon. Olu ye sɛbɛ nunu sɛbɛn, ka kɛɲɛ ni Aman ka fɔta bɛɛ ye, k'u ci masacɛ ka dakɔrɔsigiw, n'a ka maraw kɔnɔ lasigidenw bɛɛ, ani siyaw bɛɛ kuntigiw ma, ka kɛɲɛ ni mara bɛɛ ka siyakan sɛbɛncogo ye. Sɛbɛ nunu sɛbɛnna ni masacɛ Sɛrisɛsi tɔgɔ ye k'a ka bololanigɛ kɛ ka taamasiɲɛ la u kan.

¹³Cidenw tagara ni bataki nunu ye masacɛ ka maraw bɛɛ la, ko saan kalo tan ni filanan, min ye *Adari kalo ye, ale tile tan ni sabanan loon, ko u ka zuwifuw mɔgɔkɔrɔbaw ni denmisɛnw ani musow bɛɛ faga k'u sii tunu o loon kelen nin na, u kana mɔgɔ si to, o loon kelen nin na, k'u bololafɛnw ta.

¹⁴Bataki nunu tun ka kan ka jati i n'a fɔ sariya, u kɔnɔnako ka fɔ mara nunu bɛɛ kɔnɔ, ka fɔ siyaw bɛɛ ɲana, ko u k'u yɛrɛ labɛn o loon kama.

¹⁵Ciden nunu tagara teliman na ka kɛɲɛ ni masacɛ ka fɔta ye. O cii kelen nin fana fɔra Suzi min ye masadugu ye. Masacɛ ni Aman sigira ka to minni na, Suzi dugu bɛɛ gwanna.