Read dyu Ɛsitɛri ka kitabu 4 Bible Online

Ɛsitɛri ka kitabu 4 - dyu bible

Ɛsitɛri ka kitabu 4

¹Maridose y'o koo bɛɛ mɛn tuma min na, a y'a ka fani faran, ka dusukasifani ta k'o don, ka bugurigwɛ kɛ a yɛrɛ kan. O kɔ, a donna dugu kɔnɔ ka to ka kule kosɔbɛ.

²A tagara se masacɛ ka luu daa la ka lɔ, bari a tun latigɛra ko dusukasifani be mɔgɔ min kaan na, o tigi man kan ka don yen.

³Masacɛ ka cii ser'a ka mara o mara kɔnɔ, o yɔrɔ zuwifuw tun be makari la. U tun be to ka suun don, ka kasi kosɔbɛ. U caaman tun be to ka dusukasifaniw don ka la bugurigwɛ la.

⁴Ɛsitɛri ka baaraden musomanw, ni masacɛ ka muso kɔlɔsibagaw donna k'o fɔ Ɛsitɛri ye. A hakili ɲagamina kosɔbɛ, a ye fani di k'u ka taga di Maridose ma janko a ka dusukasifani bɔ a kaan na, nga Maridose ma sɔn.

⁵Kɔlɔsibaga nunu cɛma, masacɛ tun ye Ɛsitɛri ka koo don minw bolo, olu dɔ tun be yen min tɔgɔ ko Ataki. Ɛsitɛri y'ale ci ko a ka taga Maridose ɲininga, ko mun le kɛra, ani k'o sɔrɔla cogo di.

⁶Ataki tagara Maridose fɛ dugu forobayɔrɔ la, masacɛ ka luu daa la.

⁷Koo minw kɛra, Maridose y'o bɛɛ ɲafɔ Ataki ye. Aman tun ko ni masacɛ sɔnna zuwifuw ka faga ma, ko a bena warida min don a ka nafolo marayɔrɔ la, a y'o daa fɔ Ataki ye.

⁸U fagako min tun fɔra Suzi dugu kɔnɔ, a y'o sɛbɛ dɔ di Ataki ma, janko a ka taga o yira Ɛsitɛri la k'a ɲafɔ a ye. A y'a ɲini Ɛsitɛri fɛ ko a ka taga masacɛ fɛ k'a daali ko a ka sabali ka makari a ka siya la.

⁹Ataki kɔsegira ka na Maridose ka kuma fɔ Ɛsitɛri ye.

¹⁰Ɛsitɛri kɔsegira ka Ataki ci Maridose fɛ tugu k'a fɔ a ye ko:

¹¹«Masacɛ ka baaradenw n'a ka mara mɔgɔw bɛɛ b'a lɔn ko sariya dɔ be yen min b'a yira ko cɛɛ fara muso kan, ni mɔgɔ min donna masacɛ ka luu ɲafɛla la ni masacɛ m'a tigi wele, u b'o tigi faga, fɔɔ n'a y'a ka bere sanulaman wili ka sin min ma, o tigi le be kisi. A tile bi saba do ye nin ye, masacɛ ma ne wele ka ta'a fɛ.»

¹²O kuma tagara fɔ Maridose ye yɔrɔ min na,

¹³a ye Ɛsitɛri jaabi ko: «Kan'a miiri ko e ni zuwifu tɔw te kelen ye, k'o la, e bena kisi, bari e be masacɛ ka soo.

¹⁴N'i jera n'i ma foyi fɔ sisan, zuwifuw bena dɛmɛ sɔrɔ ka kisi sababu wɛrɛ la. Ele n'i faa ka somɔgɔw bena halaki. E Ɛsitɛri kɛra masacɛ ka muso ye, nin le kama wa, jɔn b'o lɔn?»

¹⁵O kɔ, Ɛsitɛri ye cii bila ka ta'a fɔ a ye ko:

¹⁶«Taga Suzi dugu kɔnɔ zuwifuw bɛɛ lajɛn. Aw ka suun don ne kama. Aw kana dumuni kɛ, aw kana minni kɛ tile saba kɔnɔ, suu fara tile kan. Ne fana bena suun don ni n ka baaraden musomanw ye, o kɔ, ne bena don masacɛ fɛ, hali n'o sariya nin be yen. N sara wo, n ma sa wo, o bɛɛ ka kan.»

¹⁷Ɛsitɛri ye fɛɛn min fɔ Maridose ye, a tagara o bɛɛ kɛ.