Read dyu Ɛsitɛri ka kitabu 7 Bible Online

Ɛsitɛri ka kitabu 7 - dyu bible

Ɛsitɛri ka kitabu 7

¹Masacɛ ni Aman tagara masacɛ ka muso Ɛsitɛri ka dumuni kɛyɔrɔ la.

²O loon filanan nin na, k'u to duvɛn min na, masacɛ ye Ɛsitɛri ɲininga tugu ko: «Masamuso Ɛsitɛri, i be mun le fɛ? O bena d'i ma. I be mun le ɲinina? Hali n'a kɛra ne ka mara tilan kelen ye, n'i b'a fɛ, ne ben'a d'i ma.»

³O tuma na, a y'a fɔ masacɛ ye ko: «Ni ne koo ka di ele masacɛ ye, n'i be sɔn ka ne nii kisi, ani ne ka siya fana, o le ye ne ka ɲinifɛn ye masacɛ fɛ ani n ka daalili.

⁴Bari ne ni n ka siya feerela, janko u k'an halaki, k'an faga ka ban pewu. N'u yɛrɛ tun y'an feere ka kɛ jɔɔnw ye dama, ne tun tena foyi fɔ, bari o tun tena masacɛ sigɛnkun bɔ.»

⁵Masacɛ y'a ka muso Ɛsitɛri ɲininga ko: «O tigi nin ye jɔn ye? Min b'a fɛ k'o kɛ, ale be min?»

⁶Ɛsitɛri y'a fɔ k'o cɛnnikɛbaga nin n'o jugu nin ye Aman ye, mɔgɔjugu nin! Siranya ye Aman minɛ k'a to masacɛ n'a ka muso ɲakɔrɔ.

⁷Masacɛ dimininba wilila ka bɔ dumunikɛyɔrɔ la ka ta'a ka nankɔ kɔnɔ. Aman tora yen ko a be masacɛ ka muso Ɛsitɛri daali janko u kan'a faga, bari a tun y'a ye ko ale fagako le be masacɛ kɔnɔ ka ban.

⁸Masacɛ bɔtɔ a ka nankɔ kɔnɔ n'a be nana dumunikɛso kɔnɔ, Ɛsitɛri fɛ kalaka kan, Aman tun be yi. Masacɛ kabara k'a fɔ ko: «O n'a ta bɛɛ a b'a fɛ ka ben masamuso kan n ka soo kɔnɔ ni n be yen!» O kuma nin fɔtɔ masacɛ fɛ, u ye fani biri Aman ɲaa kan. [1]

⁹Masacɛ ka baaraden Aribona y'a fɔ masacɛ ye ko Aman yɛrɛ tun ye lɔgɔ lalaga Maridose faga kama, min tun ye koɲuman kɛ masacɛ ye, k'o lɔgɔ nin be Aman ka soo, a jaɲa be mɛtɛrɛ mugan ni duuru ɲɔgɔn bɔ. Masacɛ y'a fɔ ko u ka taga Aman yɛrɛ dulon o kan.

¹⁰Aman tun ye lɔgɔ min lalaga Maridose faga kama, u y'ale yɛrɛ le dulon o kan. O kɔ, masacɛ dusu sumana.