Read dyu Ɛsitɛri ka kitabu 9 Bible Online

Ɛsitɛri ka kitabu 9 - dyu bible

Ɛsitɛri ka kitabu 9

¹Saan kalo tan ni filanan tile tan ni sabanan loon, n'o ye *Adari kalo ye, ka kɛɲɛ ni masacɛ ka sariya n'a ka sira dinin ye, zuwifuw juguw tun be miiri k'olu le bena se u kɔrɔ loon min na, a ma kɛ ten tugu, zuwifuw le yɛlɛmana ka se u juguw kɔrɔ.

²Zuwifu minw tun be masacɛ Sɛrisɛsi ka maraw bɛɛ n'u duguw kɔnɔ, olu ye ɲɔgɔn lajɛn, mɔgɔ minw tun b'a fɛ k'u halaki, u wilila olu kama. Mɔgɔ si tun te se ka lɔ u ɲakɔrɔ, bari siya tɔw bɛɛ tun siranna u ɲa kosɔbɛ.

³Masacɛ ka mara bɛɛ kuntigiw n'a ka dakɔrɔsigiw, n'a ka lasigidenw, n'a ka baarakɛlaw tun be zuwifuw dɛmɛ, bari u tun be siran Maridose ɲa kosɔbɛ.

⁴Maridose tun kɛra mɔgɔbaba ye masacɛ ka soo kɔnɔ, a tɔgɔ bɔra fɔɔ ka se maraw bɛɛ la, a tun be barika sɔrɔla ka taga ɲa.

⁵Zuwifuw y'u juguw bɛɛ faga ni murujanjanw ye, k'u halaki k'u ban pewu. U y'u sago kɛ u juguw la.

⁶Zuwifuw tun ye mɔgɔ kɛmɛ duuru le faga Suzi dugu kɔnɔ min ye masadugu ye.

⁷U ye Parisandata faga, ani Dalifɔn, ni Asipata,

⁸ani Porata, ni Adaliya, ni Aridata,

⁹ani Parimasita, ni Arizayi, ani Aridayi, ni Wayizata,

¹⁰minw tun ye u jugu, Amedata dencɛ Aman, ka deen tan ye. Nga u ma u bololafɛnw ta.

¹¹O loon kelen na, mɔgɔ minw tun fagara Suzi dugu kɔnɔ, min ye masadugu ye, u nana o daa fɔ masacɛ ye.

¹²A y'a fɔ a ka muso Ɛsitɛri ye ko: «Zuwifuw ye mɔgɔ kɛmɛ duuru faga Suzi dugu kɔnɔ min ye masadugu ye, ani Aman deen tan fana. U ye mun le kɛ ne ka mara tɔ nunu kɔnɔ sa? I be mun le fɛ tugu? N bena o kɛ i ye. I be mun le ɲini tugu? N be o kɛ i ye.»

¹³Ɛsitɛri y'a fɔ masacɛ ye ko n'a be sɔn, ko a ka sira di zuwifuw ma, minw be Suzi dugu kɔnɔ, u k'o ɲɔgɔn kɛ tugu sini ka kɛɲɛ ni masacɛ ka sira dinin ye bii, ani k'u ka Aman deen tan nunu dulon lɔgɔ kan.

¹⁴Masacɛ ye sira di, u y'o fɔ Suzi dugu kɔnɔ, u ye Aman deen mɔgɔ tan nunu dulon lɔgɔ kan.

¹⁵Zuwifu minw tun be Suzi dugu kɔnɔ, olu ye ɲɔgɔn lajɛn Adari kalo tile tan ni naaninan loon tugu, ka mɔgɔ kɛmɛ saba faga Suzi dugu kɔnɔ, nga u ma maga u bololafɛnw na.

¹⁶Zuwifu tɔw minw tun be masacɛ ka maraw la, olu ye ɲɔgɔn lajɛn k'u juguw kɛlɛ janko k'u yɛrɛ kisi. U banbana o lonɲuman nin na k'u yɛrɛ bɔsi u juguw bolo. U y'u faga fɔɔ ka se mɔgɔ waa bi wolonwula ni duuru (75 000). Nga u ma maga u bololafɛnw na.

¹⁷O koow kɛra *Adari kalo tile tan ni sabanan loon. Tile tan ni naaninan loon na, zuwifuw lafiɲɛna ka ɲanagwɛ kɛ, ka nisɔndiya.

¹⁸Minw be Suzi dugu kɔnɔ, olu ye ɲɔgɔn lajɛn kalo tile tan ni sabanan loon, ani a tile tan ni naaninan loon fana. Kalo nin tile tan ni duurunan loon, olu fana lafiɲɛna ka ɲanagwɛ kɛ, ka nisɔndiya.

¹⁹O le y'a to zuwifu minw be kongoduguw kɔnɔ, olu be Adari kalo tile tan ni naaninan loon le kɛ u ka ɲanagwɛlon ye ka nisɔndiya kosɔbɛ, ka to ka fɛɛn dɔw di ɲɔgɔn ma.

²⁰Maridose y'o koow sɛbɛn k'o ci zuwifuw bɛɛ ma minw yɔrɔ tun ka surun ani minw yɔrɔ tun ka jan, masacɛ Sɛrɛsɛsi ka maraw bɛɛ la,

²¹k'a fɔ u ye k'u ka ɲanagwɛ kɛ saan o saan Adari kalo tile tan ni naaninan loon, ani a tile tan ni duurunan loon,

²²u k'u jati loonw ye u ye hɛrɛ sɔrɔ minw na, k'u yɛrɛ bɔsi u juguw bolo, ani k'u jati kalo ye, u ka dusukasi yɛlɛmana ka kɛ nisɔndiya ye, u ka nisɔngoya yɛlɛmana ka kɛ ɲanagwɛ ye min na. Ko u ka ɲanagwɛ, ka nisɔndiya o loon nunu na, ka to ka dumuni di ɲɔgɔn ma, ani ka dɛsɛbagatɔw sɔn.

²³Zuwifuw y'a latigɛ ko u tun y'a daminɛ ka koo min kɛ ka ban, ani Maridose ye min sɛbɛn, k'u bena o kɛ.

²⁴ Bari Agagi kɔmɔgɔ Amedata dencɛ Aman min tun ye zuwifuw jugu ye, ale tun y'u fagako latigɛ. A tun ye *kalabon le kɛ, u tun be min wele ko Purimu, waasa ka se k'u faga k'u halaki pewu.

²⁵Nga Ɛsitɛri tun tagara masacɛ fɛ, o la, [1] masacɛ y'a fɔ ani k'a sɛbɛn ko Aman ye kojugu min labɛn zuwifuw kama, o ka segi ka ben a yɛrɛ kuun na, ko ka Aman n'a deenw dulon lɔgɔ kan.

²⁶O le y'a to, u y'o loon nunu wele ko Purimu ɲanagwɛlon. O bataki nin kɔnɔnakuma kosɔn, u tun ye fɛɛn minw ye ani koo minw kɛra u la, o bɛɛ kosɔn,

²⁷Zuwifuw y'a latigɛ u ni u kɔmɔgɔw ye, ani mɔgɔ minw tugura u kɔ, k'u bena to k'o loon fila nunu bato saan o saan o waati kelen na, ka kɛɲɛ ni min fɔr'a kɛcogo la.

²⁸U kɔmɔgɔw bɛɛ ka kan k'u hakili to o loon nunu na, k'u bato u ka soow kɔnɔ ni maraw bɛɛ kɔnɔ ani dugubabaw bɛɛ kɔnɔ. Ko Purimu ɲanagwɛ kɛli man kan ka dabila abada zuwifuw fɛ, ani u kɔmɔgɔw ka kan k'u hakili to a la.

²⁹Abiyayili denmuso Ɛsitɛri, n'o ye masacɛ muso ye, ani zuwifucɛ Maridose ye sɛbɛ dɔ ci tugu janko ka se ka loon nunu wajibiya, min koo fɔra sɛbɛ dɔ nin kɔnɔ.

³⁰U ye batikiw ci masacɛ Sɛrisɛsi ka mara kɛmɛ ni mugan ni wolonwula kɔnɔ zuwifuw bɛɛ ma. Hakilisigi kuma ni hɛrɛkuma le tun be bataki nunu kɔnɔ.

³¹U cira janko Purimu ɲanagwɛlon nunu kɛwaati ka yira, ka kɛɲɛ ni zuwifucɛ Maridose ni masacɛ ka muso Ɛsitɛri ka koo latigɛli ye. U ye min latigɛ u yɛrɛw ye n'u deenw ye, u bena suun don ka kasi loon minw na.

³²A kɛra ten, Ɛsitɛri ka sɛbɛ sera ka Purimu ɲanagwɛlon nunu koo wajibiya, ani u y'o koo sɛbɛn sɛbɛ dɔ kɔnɔ.