Read dyu Isirayɛlidenw ka bɔko jɔnya la kitabu 1 Bible Online

Isirayɛlidenw ka bɔko jɔnya la kitabu 1 - dyu bible

Isirayɛlidenw ka bɔko jɔnya la kitabu 1

¹ Yakuba, n'a be wele Isirayɛli fana, ale ka deen minw tun tagara n'a ye Ezipiti jamana na, n'u ka denbayaw ye, olu tɔgɔ filɛ nin ye:

²Urubɛn, ni Simeyɔn, Levi ni Zuda,

³Isakari ni Zabulɔn ani Bɛnzamɛn,

⁴Dan ni Nɛfutali, ni Gadi ani Asɛri.

⁵Yakuba kɔmɔgɔ bɛɛ lajɛnnin tun ye mɔgɔ bi wolonwula ye. O y'a sɔrɔ Yusufu tun be Ezipiti ka ban.

⁶Yusufu n'a balimaw bɛɛ, ani a ka waati mɔgɔ bɛɛ nana sa.

⁷ Isirayɛlidenw nana caya, ka caya, u tora ka buguya ani ka fanga sɔrɔ. U ye jamana fa.

⁸ O kɔ, masacɛkura dɔ sigira jamana kunna, min tun ma Yusufu lɔn.

⁹A y'a fɔ a ka mɔgɔw ye ko: «A filɛ, Isirayɛlidenw ka ca n'anw ye kojugu, u barika fana ka bon n'an ta ye.

¹⁰ Aw ye to, an be cogo ɲini k'u ka cayako bali. N'o tɛ, ni kɛlɛ wilila loon min na, u bena fara an juguw kan k'an kɛlɛ. O kɔ, u be bɔ jamana kɔnɔ.»

¹¹O la, Ezipitikaw ye baarakuntigiw sigi Isirayɛlidenw kunna, janko olu k'u tɔɔrɔ ni fangabaara ye. O cogo la, u ye suman maraduguw lɔ Ezipiti masacɛ ye, o minw ye Pitɔmu ni Aramusɛsi ye.

¹²Nga tuma min na u tora ka dɔ fara Isirayɛlidenw ka tɔɔrɔ kan, olu fana tora ka caya, ka yɛrɛkɛ ka tɛmɛ fɔlɔta kan fɔɔ Ezipitikaw nana siran u ɲa.

¹³U y'u bila jɔnyabaara la k'u tɔɔrɔ kosɔbɛ.

¹⁴U ye u nii tɔɔrɔ ni baaragwɛlɛn ye: U be bɔgɔ labɛn, ka biriki gosi, ka foro kɔnɔ baara sifa bɛɛ kɛ. U ye baaragwɛlɛn sifa bɛɛ la u kunna, u ma makari u la.

¹⁵Muso minw tun be eburuw fɛ n'u be u ka muso kɔnɔmanw dɛmɛ ka jigi, kelen tɔgɔ ko Sifira, kelen tɔgɔ ko Puwa. Ezipiti masacɛ y'a fɔ u ye ko:

¹⁶«Ni aw be eburumuso dɔ dɛmɛ jigiko la tuma min na, aw ka deen kɔlɔsi. Ni cɛɛ lo, aw k'a faga, ni muso lo, aw k'a to yen, aw kan'a faga.»

¹⁷Nga muso nunu tun be siran Ala ɲa. Ezipiti masacɛ tun ye min fɔ u ye, u ma o kɛ, u ye dencɛmanw ɲanaman to yen.

¹⁸O kɔ, Ezipiti masacɛ ye muso nunu wele k'u ɲininga ko: «Aw ye mun lo kɛ ten? Mun na aw ye dencɛmanw to yen n'aw ma u faga?»

¹⁹U y'a jaabi ko: «Eburumusow ni Ezipiti musow cogo te kelen ye. Fanga b'u la, u be jigi sanni u dɛmɛbagaw ka se.»

²⁰Ala ye jigibagatɔw dɛmɛbagaw dɛmɛ. Isirayɛlidenw cayara ka barika sɔrɔ kosɔbɛ.

²¹Ala ye jigibagatɔw dɛmɛbagaw ka denbaya caya, bari u tun be siran a ɲa.

²² Ezipiti masacɛ y'a fɔ a ka mɔgɔw bɛɛ ye k'a gwɛlɛya ko: «Eburuden min mana wolo, ni cɛɛ lo, aw k'o fili baji la, nga aw ka musomanw to, aw kana olu faga.»