Read dyu Isirayɛlidenw ka bɔko jɔnya la kitabu 11 Bible Online

Isirayɛlidenw ka bɔko jɔnya la kitabu 11 - dyu bible

Isirayɛlidenw ka bɔko jɔnya la kitabu 11

¹Masaba y'a fɔ Musa ye ko: «Ne bena tɔɔrɔ dɔ wɛrɛ lase Ezipiti masacɛ ni Ezipitikaw ma tugu. O seen fɛ, a ben'a to aw be taga. O tuma na, a bena aw gwɛn ka bɔ yan yɛrɛ.

²I k'a fɔ jama ye ko cɛɛ fara musow kan, k'o ka warigwɛminanw ni sanulamanw daali u sigiɲɔgɔnw fɛ.»

³Masaba tun y'a kɛ Isirayɛli jama koo diyara Ezipitikaw ye. Ezipiti masacɛ ka baarakɛlaw ni Ezipitikaw bɛɛ tun be Musa jati mɔgɔbaba ye fana.

⁴Musa y'a fɔ Ezipiti masacɛ ye ko: «Masaba ko dugutilama, ale bena Ezipiti jamana yaala.

⁵Ezipitikaw ka deen fɔlɔw bɛɛ bena sa, k'a ta Ezipiti masacɛ deen fɔlɔ ma ka ta'a bila jɔnmuso deen fɔlɔ ma, min be sinni kɛra. Begɛnw deen fɔlɔw fana bena sa.

⁶Kulekanba bena bɔ Ezipiti jamana faan bɛɛ la, min ɲɔgɔn ma deli ka kɛ, n'a ɲɔgɔn tena kɛ tugu fana.

⁷Nga wulu tena sɔngɔ mɔgɔ si kan, walima begɛn, Isirayɛlidenw ka yɔrɔ la janko aw k'a lɔn ko Masaba be faranfasi kɛ Ezipitikaw ni Isirayɛlidenw cɛ.

⁸I ka mɔgɔ nunu bɛɛ bena na ne fɛ k'u kunbiri gwan ne kɔrɔ k'a fɔ ko an ka bɔ jamana nin kɔnɔ, ne, ni n ka kɔmɔgɔw bɛɛ. O kɔ, ne bena bɔ.» O fɔnin kɔ, Musa dimininba bɔra Ezipiti masacɛ ka yɔrɔ la.

⁹Masaba y'a fɔ Musa ye ko: «Ezipiti masacɛ tena sɔn ka mɛnni kɛ i fɛ, janko ne ka kabakow ka caya Ezipiti jamana kɔnɔ.»

¹⁰Musa ni Arɔn y'o kabako nunu bɛɛ kɛ Ezipiti masacɛ ɲana, nga Masaba ye Ezipiti masacɛ dusu gwɛlɛya, a ma sɔn k'a to Isirayɛlidenw ka bɔ a ka jamana na.