Read dyu Isirayɛlidenw ka bɔko jɔnya la kitabu 12 Bible Online

Isirayɛlidenw ka bɔko jɔnya la kitabu 12 - dyu bible

Isirayɛlidenw ka bɔko jɔnya la kitabu 12

¹ K'u to yen Ezipiti jamana kɔnɔ, Masaba y'a fɔ Musa ni Arɔn ye ko:

²«Nin kalo le bena kɛ saan kalo fɔlɔ ye aw fɛ, saan daminɛ kalo.

³Aw k'a fɔ Isirayɛli jama bɛɛ ye ko kalo nin tile tan, gwatigi kelen kelen bɛɛ ka sagaden minɛ u ka somɔgɔw tɔgɔ la, gwaso kelen, sagaden kelen.

⁴Ni gwaso dɔ ka dɔgɔ sagaden kelen ma, a n'a gɛrɛfɛ gwaso ka jɛn sagaden kelen kan ka kɛɲɛ n'u ka mɔgɔw daa ye. Mɔgɔ kelen be se ka sogo min ɲimi, u ka saga sogo nin tilan ka kɛɲɛ n'o ye.

⁵O begɛn nin ka kɛ cɛman ye min ye saan kelen sɔrɔ, fiɲɛ kana sɔrɔ a la, walima sankelen bakɔrɔnin, fiɲɛ te min na.

⁶Aw k'o mara fɔɔ kalo nin tile tan ni naaninan loon. Isirayɛli jama bɛɛ ben'o faga o loon na tile bennin kɔ.

⁷U bena o sogow dumu soo minw kɔnɔ, u ka saga nunu joli seriseri o soow daa la lɔgɔw kan, gɛrɛfɛ ni sanfɛ.

⁸O suu kelen na, u bena o sogo nunu wusunin ɲimi, ni buru ye, fununan te min na, ani ɲugu kunanman.

⁹Aw kana o sogo kɛnɛman ɲimi, walima a tobinin jii la, nga a ka wusu, a kungolo, n'a senkalaw, n'a kɔnɔnafɛnw.

¹⁰A tɔɔ man kan ka si. N'a dɔ sira aw k'o jɛni sɔgɔmadafɛ.

¹¹Aw ka kan k'o dumu cogo min na, o filɛ nin ye: aw k'aw cɛɛ siri k'aw ka sanbaraw don k'aw ka bere minɛ aw bolo. Aw k'a dumu teliya la. O ye Masaba ka *Hɔrɔnya loon ye.

¹²«O suu kelen na, ne bena Ezipiti jamana yaala ka Ezipitikaw deen fɔlɔw bɛɛ faga, mɔgɔw fara begɛnw kan. Ne bena kiti tigɛ Ezipiti joow bɛɛ kan. Ne ye Masaba le ye.

¹³Aw bena to soo minw kɔnɔ, joli le bena kɛ o taamasiɲɛ ye. Ni ne ye o joli nin ye tuma min na, ne bena tɛmɛ, kojugu si tena se aw ma tuma min na ne bena cɛnni kɛ Ezipiti jamana kɔnɔ.

¹⁴ Aw ka kan k'aw hakili to o loon nin koo la, k'a kɛ landa ye, a ɲanagwɛ ka to ka kɛ tuma bɛɛ aw kɔmɔgɔw cɛma.

¹⁵«Aw bena to k'a kɛ cogo min na, o filɛ: fununan te buru min na, aw k'o dumu tile wolonwula kɔnɔ. Loon fɔlɔ, aw ka fununan bɔ aw ka soow kɔnɔ, bari mɔgɔ o mɔgɔ ye buru dumu fununan be min na, k'a ta loon fɔlɔ ma fɔɔ ka taga se loon wolonwulanan ma, o tigi ka kan ka faga.

¹⁶O loon fɔlɔ la, aw ka ɲɔgɔn lajɛn ne tɔgɔ la, ani a wolonwulanan loon fana na. Aw kana baara si kɛ o loonw na n'a ma kɛ aw kelen kelen bɛɛ ka dumuni baara dama ye.

¹⁷Aw ka *Buru funubali ɲanagwɛ kɛ, bari ne ye aw ka jama bɔ Ezipiti jamana kɔnɔ o loon na tigitigi. Aw k'o loon bato k'o kɛ ɲanagwɛ loon ye saan o saan, a kana dabila.

¹⁸Burufununan ma don buru min kɔnɔ, aw ben'a daminɛ k'o dumu saan kalo fɔlɔ tile tan ni naaninan loon wuladafɛ fɔɔ ka taga se a tile mugan ni kelen wulafɛ ma.

¹⁹Fununan si ma kan ka sɔrɔ aw ka soow kɔnɔ o tile wolonwula kɔnɔ. Mɔgɔ o mɔgɔ be buru dumu ni fununan b'a la, dugulen fara lonan kan, o tigi bena faga ka bɔ Isirayɛli jama cɛma.

²⁰Aw kana buru si dumu, fununan be min na. K'aw to yɔrɔ o yɔrɔ, fununan te buru min kɔnɔ, aw k'o dumu.»

²¹O tuma na, Musa ye Isirayɛli cɛkɔrɔbaw bɛɛ wele k'a fɔ u ye ko: «Aw ye taga ka sagadenw minɛ, minw be bɛn aw ka somɔgɔw ma k'o faga k'o kɛ *Hɔrɔnya ɲanagwɛ saraka ye.

²²Aw k'o joli don minan dɔ kɔnɔ, ka *izɔpiyiri furaburu kɛ ka joli nin mɔn lɔgɔw kan minw be soo daa la sanfɛ ni gɛrɛfɛ. Aw si kana bɔ aw ka soow kɔnɔ sanni dugu ka gwɛ.

²³ Masaba bena tɛmɛ tuma min na ka Ezipitikaw faga, n'a ye o joli ye bonda lɔgɔ nunu kan, sanfɛ ni gɛrɛfɛ, a bena tɛmɛ u kan. A tena sɔn halakilikɛla ka don aw ka soow kɔnɔ ka fagalikɛ.

²⁴O bena kɛ sariya ye aw n'aw kɔmɔgɔw fɛ min tena dabila abada.

²⁵Masaba bena jamana min di aw ma ka kɛɲɛ n'a ka layidu ye, n'aw donna o yɔrɔ la tuma min na, aw k'o landako kɛ.

²⁶N'aw deenw ye aw ɲininga tuma min na, ko landako nin kɔrɔ ye mun ye aw fɛ,

²⁷aw k'u jaabi ko: ‹Hɔrɔnya ɲanagwɛ saraka lo Masaba tɔgɔ la, bari a tun be Ezipitikaw fagara tuma min na, a tɛmɛna an ka soow kan, k'an kisi k'an to yen.› » O tuma na, jama y'u kunbiri gwan duguma ka Masaba bato.

²⁸Masaba ye min fɔ Musa ni Arɔn ye, Isirayɛlidenw tagara o kɛ.

²⁹ Dugutilama, Masaba ye Ezipitikaw ka deen fɔlɔw bɛɛ faga, k'a daminɛ Ezipiti masacɛ deen fɔlɔ ma fɔɔ ka ta'a bila kasodenw nunu deen fɔlɔw ma, ani begɛnw deen fɔlɔw.

³⁰Ezipiti masacɛ n'a ka baarakɛlaw ani Ezipitikaw bɛɛ wilila o suu nin na. Mankanba kɛra Ezipiti jamana kɔnɔ, bari o soo si tun te yen mɔgɔ ma sa o min kɔnɔ.

³¹O suu kelen yɛrɛ la, Ezipiti masacɛ ye Musa ni Arɔn wele k'a fɔ u ye ko: «Aw ye wili ka taga ka bɔ ne ka jama cɛma, aw ni Isirayɛlidenw bɛɛ! Aw ye taga Masaba bato i n'a fɔ aw y'a fɔ cogo min na.

³²Aw ye taga n'aw ka begɛnw ye, a misɛnmanw fara a dabaw kan, i ko aw y'a fɔ cogo min na. Aw ka duba kɛ ne ye fana.»

³³Ezipitikaw ye Isirayɛli jama bagabaga, k'u ka bɔ jamana kɔnɔ joona joona. Bari u tun be miiri ko n'u ma bɔ joona, u bɛɛ bena sa.

³⁴Jama y'u ka mugu nɔɔninin ta, o tun ma funu fɔlɔ. U y'u ka burunɔɔniminanw siri u ka faniw na k'u dulon u gamanw na.

³⁵ Musa tun ye min fɔ, Isirayɛlidenw y'o kɛ: U ye warigwɛminanw ni sanulamanw ani faniw daali Ezipitikaw fɛ.

³⁶Masaba tun y'a kɛ jama koo diyara Ezipitikaw ye. U ye fɛɛn minw daali, Ezipitikaw ye olu d'u ma. A kɛra ten, u sera ka Ezipitikaw bololafɛnw cɛ.

³⁷Isirayɛlidenw bɔra Aramusɛsi ka taga se Sukɔti. U tun be cɛɛ waa kɛmɛ wɔɔrɔ (600 000) bɔ, musow ni denmisɛnw ma jati.

³⁸Siya wɛrɛ caaman bɔra n'u ye, ani begɛn caaman fana, a babaw fara a misɛnmanw kan.

³⁹U bɔra ni mugu min ye Ezipiti, u ye o yiran ŋɔmi ye. Fununan tun t'o la, bari u tun ye u gwɛn ka bɔ le, o la, u tun ma se ka dumuni labɛn.

⁴⁰ Isirayɛlidenw tun ye saan kɛmɛ naani ni bi saba kɛ Ezipiti.

⁴¹O saan kɛmɛ naani ni bi saba dafa loon yɛrɛ la, Masaba ka jamaw bɛɛ bɔra Ezipiti.

⁴²Masaba ye suu kuturu kɛ k'a ka jama Isirayɛli bɔ Ezipiti cogo min na, o cogo kelen na, u kɔmɔgɔw ka kan ka siɲana kɛ suu kelen ka Masaba bato.

⁴³Masaba y'a fɔ Musa ni Arɔn ye ko: «Lonan si man kan ka *Hɔrɔnya ɲanagwɛ dumuni dumu.

⁴⁴N'i ye jɔɔn san k'a kɛnɛkɛnɛ, ale be se k'a dumu.

⁴⁵Lonan min sigira aw fɛ n'a bena taga, ale ani baaraden man kan k'a dumu.

⁴⁶ Aw k'a dumu soo kɔnɔ, sogo si kana bɔ kɛnɛma, kolo si fana kana kari.

⁴⁷Isirayɛli jama bɛɛ ka Hɔrɔnya ɲanagwɛ nin kɛ.

⁴⁸Ni lonan dɔ min siginin be aw fɛ, n'ale b'a fɛ ka Hɔrɔnya ɲanagwɛ kɛ ka Masaba bato, a ka soo kɔnɔ cɛɛw bɛɛ ka kan ka kɛnɛkɛnɛ fɔlɔ, o kɔ, a be se k'o ɲanagwɛ nin kɛ i n'a fɔ dugulen. Nga cɛɛ kɛnɛkɛnɛbali si man kan k'a dumu.

⁴⁹O sariya kelen le bena sigi dugulen ni lonan kama.»

⁵⁰Masaba ye min fɔ Musa ni Arɔn ye, Isirayɛlidenw bɛɛ y'o le kɛ.

⁵¹O loon yɛrɛ la, Masaba ye Isirayɛlidenw bɔ Ezipiti jɛnkulu jɛnkulu.