Read dyu Isirayɛlidenw ka bɔko jɔnya la kitabu 14 Bible Online

Isirayɛlidenw ka bɔko jɔnya la kitabu 14 - dyu bible

Isirayɛlidenw ka bɔko jɔnya la kitabu 14

¹Masaba y'a fɔ Musa ye ko:

²«I k'a fɔ Isirayɛlidenw ye ko u ka kɔsegi ka taga sigi Piyayirɔti ɲafɛ, Migidɔli ni kɔgɔji furancɛ la, jida la, ka ɲasin Baalisefɔn ma.

³Masacɛ ben'a miiri ko aw tununa kongokolon kɔnɔ, ko aw te aw taayɔrɔ lɔn tugu.

⁴Ne ben'a dusu gwɛlɛya, a bena tugu aw kɔ. Nga ale n'a ka kɛlɛdenw bɛɛ bena kɛ sababu ye ne be boɲa sɔrɔ. Ezipitikaw ben'a lɔn ko ne ye Masaba le ye.» Fɛɛn min fɔra Isirayɛlidenw ye, u y'o le kɛ.

⁵Tuma min na a fɔra Ezipiti masacɛ ye ko Isirayɛli jama bolila ka taga, a n'a ka mɔgɔbabaw ka miiriya yɛlɛmana jama koo la. U ko: «Mun y'a to an ye nin kɛ, ka sira di Isirayɛlidenw ma ka taga? U tena baara kɛ an ye tugu!»

⁶Masacɛ y'a ka kɛlɛkɛwotoro labɛn ka wili n'a ka kɛlɛdenw ye.

⁷Kɛlɛkɛwotoro minw ka ɲi kosɔbɛ, a ye o kɛmɛ wɔɔrɔ ta, ani Ezipiti kɛlɛkɛwotoro tɔw bɛɛ. Kɛlɛkuntigiw tun b'u kelen kelen bɛɛ kɔnɔ.

⁸Masaba ye Ezipiti masacɛ dusu gwɛlɛya. O la, a tugura Isirayɛlidenw kɔ, minw hɔrɔnyanin tun be bɔra.

⁹Ezipitikaw tugura u kɔ, masacɛ ka soow, n'a ka wotorow, n'u bolibagaw n'a ka kɛlɛdenw bɛɛ. U tagara Isirayɛlidenw sɔrɔ u siginin be kɔgɔjida la, Piyayirɔti ɲafɛ, ka ɲasin Baalisefɔn ma.

¹⁰Masacɛ tun be gwɛrɛla u la, u ko u be filɛli kɛ, u ye Ezipitikaw natɔ ye u kɔfɛ. U siranna kosɔbɛ ka kasi Masaba nɔɔ fɛ.

¹¹U y'a fɔ Musa ye ko: «Kaburu tun te Ezipiti kɔnɔ wa? N'i be na n'an ye kongokolon nin kɔnɔ janko an ka sa yan kɛ? Mun y'a to i y'a kɛ an bɔra Ezipiti?

¹²K'an to Ezipiti, yala an m'a fɔ i ye ko i k'an to ɲasuma na, an be baara kɛ Ezipitikaw ye wa? An tun ka to yen ka baara kɛ, o tun ka fisa an ma ni saya ye kongokolon kɔnɔ yan!»

¹³Musa y'a fɔ jama ye ko: «Aw kana siran. Aw y'aw jaa gwɛlɛya. Masaba bena aw kisi cogo min na, aw bena o ye. Aw ɲaa be Ezipitika minw na bii, aw tena u ye tugu abada.

¹⁴Masaba le bena kɛlɛ kɛ aw nɔɔ na, aw k'aw hakili sigi.»

¹⁵Masaba y'a fɔ Musa ye ko: «Mun y'a to i be kasi ne nɔɔ fɛ? A fɔ Isirayɛlidenw ye k'u ka wili ka taama daminɛ.

¹⁶E kɔni k'i ka bere kɔrɔta kɔgɔji sanfɛ k'a cɛtigɛ fila, Isirayɛlidenw ka taama dugukolo janin kan k'a tigɛ.

¹⁷Ne bena Ezipitikaw dusu gwɛlɛya, olu bena tugu u kɔ ka don. Ne bena boɲa sɔrɔ Ezipiti masacɛ n'a ka kɛlɛdenw bɛɛ kosɔn, n'a ka wotorow n'a ka sotigiw kosɔn.

¹⁸Ni ne ye boɲa sɔrɔ masacɛ n'a ka wotorow, n'a ka sotigiw kosɔn tuma min na, Ezipitikaw ben'a lɔn ko ne ye Masaba le ye.»

¹⁹Ala ka mɛlɛkɛ min tun be Isirayɛlidenw ɲafɛ, ale yɛlɛmana u kɔfɛ. Sankaba fana bɔra u ɲafɛ ka taga lɔ u kɔfɛ,

²⁰ka don Ezipitikaw ni Isirayɛlidenw cɛ. A kɛra dibi ye faan dɔ fɛ, ka yeelen bɔ faan dɔ fɛ sufɛ. [1] A kɛra ten, u ma se ka gwɛrɛ ɲɔgɔn na o suu bɛɛ kɔnɔ.

²¹Musa y'a bolo wili kɔgɔji sanfɛ. O suu bɛɛ la, Masaba y'a kɛ fɔɲɔba dɔ bɔra kɔrɔn fɛ ka kɔgɔji fiyɛ k'a kɔsegi. Kɔgɔji cɛ tigɛra fila ye, kɔdingɛ jara.

²² Isirayɛlidenw donna k'a janin tigɛ o yɔrɔ la. Jii kɛra i n'a fɔ kogo u kinibolo la, ni u numanbolo la.

²³Ezipitikaw tugura u kɔ ka don. Ezipiti masacɛ ka soow, n'a ka wotorow bolibagaw n'a ka sotigiw bɛɛ donna u nɔɔ fɛ fɔɔ kɔgɔji cɛma.

²⁴Dugugwɛdafɛ, ka Masaba to tasuma ni sankaba la, a ye Ezipiti kɛlɛdenw ka koo ɲagami.

²⁵A y'a kɛ u ka wotorow seenw cɛnna, k'u ka taama gwɛlɛya, fɔɔ Ezipitikaw ko: «An ka bɔ Isirayɛlidenw kɔ! Masaba wilila an kama, ka kɛlɛ kɛ u nɔɔ na!»

²⁶O kɔ, Masaba y'a fɔ Musa ye ko: «I bolo wili kɔgɔji sanfɛ janko jii ka segi Ezipitikaw n'u ka wotorow, n'u ka sotigiw kan.»

²⁷Musa y'a bolo wili kɔgɔji sanfɛ. Dugu be gwɛra tuma min na, kɔgɔji daminɛna ka segi a nɔɔ na. Ezipitikaw k'u be boli ka bɔ tuma min na, jii karila. Masaba y'a kɛ u tununa jii la.

²⁸Masacɛ ka kɛlɛdenw ni wotorow ani sotigi minw tun donna kɔgɔji kɔnɔ Isirayɛlidenw nɔɔ fɛ, jii segira olu bɛɛ kan k'u tunu. Hali u kelen ma se ka kisi.

²⁹Nga Isirayɛlidenw taamana dugukolo janin kan kɔgɔji cɛma. Jii tun kɛra i n'a fɔ kogo u kinibolo n'u numanbolo la.

³⁰Masaba ye Isirayɛlidenw kisi ka bɔ Ezipitikaw bolo o loon na. Isirayɛlidenw ye Ezipitikaw suuw ye kɔgɔjida la.

³¹U y'a ye ko Masaba ye koo barikaman kɛ Ezipitikaw la tuma min na, u siranna a ɲa, ka la ale n'a ka baarakɛla Musa la.