Read dyu Isirayɛlidenw ka bɔko jɔnya la kitabu 15 Bible Online

Isirayɛlidenw ka bɔko jɔnya la kitabu 15 - dyu bible

Isirayɛlidenw ka bɔko jɔnya la kitabu 15

¹ O tuma na, Musa ni Isirayɛlidenw ye dɔnkili nin la Masaba ye ko: «Ne bena dɔnkili la ka Masaba boɲa, bari a ye koba kɛ. A ye soo ni sotigi fili kɔgɔji la.

² Masaba le be barika don ne la, ne b'a boɲa ni dɔnkili ye. A ye ne kisi. Ne ka Ala lo, ne ben'a tanu, ne faa ka Ala lo, ne ben'a boɲa.

³Masaba ye kɛlɛkuntigi ye, a tɔgɔ le ko Masaba.

⁴A ye Ezipiti masacɛ ka kɛlɛkɛwotorow n'a ka kɛlɛdenw fili Buruku kɔgɔji kɔnɔ. O kɛlɛkɛwaraw tora kɔgɔji kɔnɔ.

⁵Jii y'u tunu, u jigira fɔɔ jii jukɔrɔla la i ko kabakuru.

⁶Masaba, i kinibolo y'i ka sebagaya yira. Masaba, i kinibolo y'an jugu nɔɔni.

⁷Mɔgɔ minw wilila i kama, i ye olu bɛɛ ta k'u ben i ka sebagaya barika la. I ka dimi min be kɛ i ko tasuma, ale y'u jɛni i ko biin.

⁸I nunfɔɲɔ y'a kɛ jii lɔra. Jii woyotɔ lɔra ka kɛ i ko kogo, jikuruw lɔra kɔgɔji cɛmancɛ la.

⁹An juguw tun y'a fɔ ko u bena tugu an kɔ, k'u bena an sɔrɔ. K'an bololafɛnw bɔsi k'o tilantilan, k'u mɔnɛ bɔ, ka wasa. K'u bena u ka murujan bɔ k'an halaki.

¹⁰E y'i dafɔɲɔ kɛ ka kɔgɔji fiyɛ, jii y'u datugu. U jigira fɔɔ jii jukɔrɔ i ko nigɛkuru.

¹¹Masaba, i ɲɔgɔn be batofɛnw cɛma wa? Fɛɛn jumɛn ka senu i ko ele? Fɛɛn jumɛn ka fari i ko ele? I be se kobakɛ la.

¹²E y'i kinibolo wili, dugukolo y'an juguw kunun.

¹³E ye jama min kunmabɔ i ka makari kosɔn, i y'u dɛmɛ u ka taama na. I y'u dɛmɛ ka taga i ka yɔrɔ la, i ka sebagaya barika la.

¹⁴Siya wɛrɛw y'o kibaru mɛn, u be yɛrɛyɛrɛla, siranya ye filisiw minɛ kosɔbɛ.

¹⁵Edɔmu mara kuntigiw jaa tigɛra. Mowabu ɲamɔgɔw be yɛrɛyɛrɛla. Kanaankaw bɛɛ barika banna.

¹⁶U jaa tigɛra, siranya y'u minɛ. Ee Masaba! I bolo barikaman kosɔn, u kirinna ka to yɔrɔ kelen i ko kabakuru fɔɔ i ka jama ka tɛmɛ ka ban, i ye o minw kɛ i ta ye.

¹⁷I be na n'u ye k'u sigi i ka kulu kan, min ye i yɛrɛ ta ye, Masaba, i ye yɔrɔ min dilan ka kɛ i toyɔrɔ ye, i y'i ka sigiyɔrɔ min dilan n'i bolo ye.

¹⁸Masaba, i be masaya la kudayi.»

¹⁹Ezipiti masacɛ ka soow, n'a ka wotorow, n'a ka sotigiw bɛɛ donna kɔgɔji la tuma min na, Masaba y'a kɛ jii kɔsegira a nɔɔ na k'u tunu, nga Isirayɛlidenw tun taamana dugukolo janin kan kɔgɔji cɛma.

²⁰Arɔn kɔrɔmuso Miriyama, min ye kira ye, ale ye dundun ta a bolo. Musow bɛɛ bɔra ka tugu a kɔ ni dundunw ye u bolo la, n'u be dɔɔn kɛra.

²¹Miriyama ye dɔnkili la u ye ko: «Aw ye dɔnkili la ka Masaba boɲa, bari a ye koba kɛ. A ye soo ni sotigi fili kɔgɔji la.»

²²Musa bɔra ni Isirayɛlidenw ye Buruku kɔgɔji yɔrɔ la ka taga n'u ye Suri kongokolon kɔnɔ. U ye tile saba taama kɛ kongokolon kɔnɔ, u ma jii sɔrɔ.

²³U sera Mara tuma min na, u ma se k'o yɔrɔ jii min a kunanya kosɔn. O le y'a to u b'o yɔrɔ wele ko Mara, o kɔrɔ ko kunaman.

²⁴Jama tora ka Musa kɔrɔfɔ ko: «An bena mun min?»

²⁵Musa kasira Masaba nɔɔ fɛ. Masaba ye yiri dɔ yira a la. A y'o dɔ tigɛ k'o fili jii la, jii diyara. Masaba y'a ka kolatigɛninw ni sariya dɔw sigi a ka jama ye o yɔrɔ le la. A y'u kɔrɔbɔ o yɔrɔ la fana.

²⁶A ko: «Ni aw be mɛnni kɛ ne, Masaba aw ka Ala fɛ, n'aw be kotilennin kɛ ne ɲakɔrɔ, k'aw tulo malɔ ne ka kuma na, ka ne ka sariyaw bɛɛ bato, ne tun ye Ezipitikaw tɔɔrɔ ni bana minw ye, ne tena o si la aw kan, bari ne ye Masaba ye, min b'aw kɛnɛya.»

²⁷O kɔ, u sera Elimu. Jii bɔyɔrɔ tan ni fila, ani tamarosun bi wolonwula tun be yen. U sigira jida la yen.